ചിഞ്ച്വാട്(മഹാരാഷ്ട്ര): വിവാഹമോചനത്തിന് തയ്യാറാകാത്ത ഭാര്യയുടെ ശരീരത്തില് ഡോക്ടറായ ഭര്ത്താവ് എച്ച്.ഐ.വി വൈറസ് കടത്തിവിട്ടതായി പരാതി. മഹാരാഷ്ട്രയിലെ ചിഞ്ച്വാട് സൗധാകര് സ്വദേശിനിയായ 27കാരിയാണ് പരാതിയുമായി രംഗത്തെത്തിയത്. തനിക്ക് എയ്ഡ്സ് രോഗമുണ്ടെന്ന് വരുത്തിതീര്ത്ത് വിവാഹമോചനം നേടാനാണ് ഭര്ത്താവ് ശ്രമിക്കുന്നതെന്നും യുവതി ആരോപിക്കുന്നു.
നേരത്തെ ഒരു അസുഖത്തിന് ചികിത്സയിലായിരുന്ന തനിക്ക് ഭര്ത്താവ് വീട്ടില്വച്ച് നല്കിയ സലൈന് ഡ്രിപ്പില് എച്ച്ഐ.വി വൈറസ് ഉണ്ടായിരുന്നുവെന്നും അങ്ങനെ തനിക്ക് എയ്ഡ്സ് ബാധിച്ചുവെന്നുമാണ് യുവതി പരാതിയില് പറയുന്നത്. ശാരീരിക അസ്വസ്ഥതയെ തുടര്ന്ന് 2017 ഒക്ടോബറിലാണ് താനും കൂടെ ഭര്ത്താവും സ്വകാര്യ ലാബില് രക്തപരിശോധന നടത്തി. രണ്ടു പേര്ക്കും എച്ച്.ഐ.വി ബാധിച്ചതായി കണ്ടെത്തിയിരുന്നു. തുടര്ന്ന് ഒരു സര്ക്കാര് ലാബില് നടത്തിയ പരിശോധനയില് ഭര്ത്താവില് എച്ച്.ഐ.വിയുടെ അണുക്കള് ഉണ്ടായിരുന്നില്ല.
2015ലാണ് ഹോമിയോ ഡോക്ടറും യുവതിയും വിവാഹിതരായത്. അന്നു മുതല് കൂടുതല് സ്ത്രീധനം ആവശ്യപ്പെട്ട് ഭര്തൃവീട്ടുകാര് തന്നെ നിരന്തരം പീഡിപ്പിച്ചിരുന്നുവെന്നും അവരുടെ ആവശ്യം നടക്കാതെ വന്നതോടെ തന്നെ രോഗിയാക്കി മാറ്റി ഉപേക്ഷിക്കാനായിരുന്നു പദ്ധതിയെന്നും യുവതി പറയുന്നു. അതിനായി അവര് തന്നെ ശാരീരികമായും മാനസികമായും പീഡിപ്പിച്ചിരുന്നുവെന്നും അവര് ചൂണ്ടിക്കാട്ടുന്നു.
വിവാഹമോചനത്തിന് താന് വിസമ്മതിച്ചതോടെ അസുഖക്കാരിയാക്കി ഒഴിവാക്കാനായി നീക്കം. അതിനായി ഭര്ത്താവ് മനഃപൂര്വ്വം തന്റെ ദേഹത്ത് എച്ച്.ഐ.വി കടത്തിവിടുകയായിരുന്നുവെന്നാണ് യുവതിയുടെ ആരോപണം. സെക്ഷന് 498(എ), സെക്ഷന് 323, 504, 506, 34 തുടങ്ങിയ വകുപ്പുകള് പ്രകാരം പോലീസ് കേസ് രജിസ്റ്റര് ചെയ്തിട്ടുണ്ട്.
