ഗോള്മഴ, പെനാല്റ്റി, ചുവപ്പുകാര്ഡുകള്, ഫൗളുകള്, ഇഞ്ചുറിടൈം ഗോള് എന്തിനേറെ ഗോളവസരങ്ങള് തുലയ്ക്കുന്ന കാര്യത്തിലും ഗോളിമാരുടെ സേവുകളും വരെ ഏകദേശം ഒരുപോലെയിരുന്ന സമാനതകളും കൗതുകങ്ങളും ഏറെയുണ്ടായിരുന്ന മത്സരത്തില് ജര്മ്മന് ക്ളബ്ബ് എഫ്സി ബയേണ് മ്യൂണിക്കും ഡച്ച് ക്ളബ്ബ് അയാക്സ് ആംസ്റ്റര് ഡാമും 3-3 സമനിലയില് പിരിഞ്ഞു. യുവേഫാ ചാമ്പ്യന്സ് ലീഗിലായിരുന്നു ഇരുവരും ഏറ്റുമുട്ടിയത്.
ബയേണിന്റെ ജര്മ്മന് സൂപ്പര്താരം മുള്ളറും അയാക്സിന്റെ വോബറും ചുവപ്പ് കാര്ഡ് കണ്ട മത്സരത്തില് രണ്ടു ടീമിനും ഓരോ പെനാല്റ്റി വീതവും ഇഞ്ചുറി ടൈം ഗോളുകളും അവസരങ്ങള് തുലച്ചതിന്റെ സാമ്യവും ഉണ്ടായിരുന്നു. മത്സരം സമനിലയില് കലാശിച്ചെങ്കിലും രണ്ടു ടീമും നോക്കൗട്ട് റൗണ്ടില് കടക്കുകയും ചെയ്തു. ഒരു പെനാല്റ്റി ഉള്പ്പെടെ ടാഡിക്കിന്റെ ഇരട്ടഗോളുകളും ടാഗ്ളിയാഫിക്കോയുടെ ഇഞ്ചുറി സമയ ഗോളുകളുമായിരുന്നു അയാക്സിന്റെ സ്കോര്ബോര്ഡില് തെളിഞ്ഞത്. പെനാല്റ്റി ഉള്പ്പെടെ ലാവന്ഡോവസ്കിയുടെ ഇരട്ടഗോളുകളും കോമാന്റെ ഇഞ്ചുറി സമയ ഗോളുമായിരുന്നു ബയേണിന്റെ പക്ഷത്ത് ഉണ്ടായിരുന്നത്.
അത്യന്തം വാശിയേറിയ മത്സരത്തില് ഇരു ടീമുകളും അവസരം തുലയ്ക്കുന്നതിലും മത്സരത്തിച്ചു. ഇരു ടീമിന്റെയും ഗോളിമാര് മികച്ചു നിന്ന മത്സരത്തില് ഗോളെന്ന് ഉറപ്പിച്ച പല അവസരങ്ങളും അസാധ്യ സേവുകളും കണ്ടു. അപകടകരമായ ഫൗളിന് 67 ാം മിനിറ്റില് ഡച്ച് ക്ളബ്ബിന്റെ ഓസ്ട്രിയന് പ്രതിരോധതാരം മാക്സിമിലിയാന് വോബറായിരുന്നു മത്സരത്തില് ആദ്യം ചുവപ്പ് കണ്ടത്. അയാക്സ് പത്തു പേരായി ചുരുങ്ങി മൂന്ന് മിനിറ്റ് കഴിഞ്ഞപ്പോള് അയാക്സിന്റെ അര്ജന്റീനതാരം നിക്കോളാസ് ടാഗ്ളിയാഫിക്കോയുടെ തലയില് ചാടിചവിട്ടിയതിന് മുള്ളറും പുറത്തു പോയി.
ആദ്യപകുതിയില് ഒരുഗോള് മാത്രമാണ് വന്നത്. ലാവന്ഡോവ്സ്കി ജര്മ്മന് ചാമ്പ്യന്മാരെ മുന്നിലെത്തിച്ചു. സൂപ്പര്താരം ലാവന്ഡോവ്സ്ക്കി പതിമൂന്നാം മിനിറ്റില് സെര്ജി നാബറിയുടെ കോര്ണറില് നിന്നും കിട്ടിയ പന്ത് ബോക്സിന് നടുവില് നിന്നും തൊടുത്ത സുന്ദരന് വലങ്കാലനടിയിലൂടെ വലയിലാക്കി. സെര്ബിയന് യുവതാരം ഡ്യുസാന് ടാഡിക്കായിരുന്നു അയാക്സിനായി ഗോള് മടക്കിയത്. ഡാനി വാന് ഡീ ബീക്ക് നല്കിയ പന്ത് ക്ളോസ്റേഞ്ച് ഷോട്ടിലൂടെ ടാഡിക്ക് വലയുടെ ഇടതുമൂലയിലേക്ക് പായിച്ചു. 81 ാം മിനിറ്റില് ബയേണിന് കിട്ടിയ പെനാല്റ്റി ലാവന്ഡോവ്സ്കി തന്നെ മുതലാക്കി. ഏഴു മിനിറ്റ് കഴിഞ്ഞപ്പോള് അയാക്സിന്റെ പെനാല്റ്റി ടാഡിക്ക് വലയില് എത്തിച്ചു.
കളി അവസാന മിനിറ്റിലേക്ക് കടന്നപ്പോള് കോമാനിലൂടെ ബയേണ് വീണ്ടും മുന്നില് എത്തിയെങ്കിലൂം വിട്ടുകൊടുക്കാന് ഭാവമില്ലാതിരുന്ന അയക്സ് ഫൈനല് വിസിലിന് തൊട്ടുമുമ്പ് ഇഞ്ചുറി സമയത്തിന്റെ അവസാനം ടാഗ്ളിയാഫിക്കോയിലൂടെ തിരിച്ചടിച്ചു. രണ്ടു ക്ളബ്ബുകളും നോക്കൗട്ടിലേക്ക് കടക്കുകയും ചെയ്തു. ഈ സീസണില് ബയേണിന്റെ പോളിഷ് സ്ട്രൈക്കര് ലാവന്ഡോവ്സ്കിയുടെ ഗോള്നേട്ടം 21 ആയി.
