ആലപ്പുഴ: വനിതാ മതില് ഗിന്നസ് ബുക്കില് ഇടം പിടിക്കുമെന്നും ഇത്രയും സ്ത്രീകളുടെ കൂട്ടായ്മ ചരിത്രത്തില് ആദ്യത്തേതാകുമെന്നുംപരിപാടിയുടെ സംഘാടകസമിതി ചെയര്മാനും എസ്.എന്.ഡി.പി. യോഗം ജനറല് സെക്രട്ടറിയുമായ വെള്ളാപ്പള്ളി നടേശന്. അതേസമയം ശബരിമല വിഷയത്തില് പ്രക്ഷോഭത്തിനിറങ്ങിയ ബി.ഡി.ജെ.എസും വനിതാമതിലിനൊപ്പം. ശബരിമല കര്മസമിതി സംഘടിപ്പിച്ച അയ്യപ്പ ജ്യോതിയില് ബി.ഡി.ജെ.എസ് അധ്യക്ഷന് തുഷാര് വെള്ളാപ്പള്ളിയുടെ അസാന്നിധ്യം വിവാദമായ പിന്നാലെയാണ് വനിതാമതിലിനുള്ള പിന്തുണ പ്രഖ്യാപിച്ചത്. ഇതോടെ ശബരിമല വിഷയത്തില് പരസ്യ പ്രതിഷേധങ്ങള്ക്കില്ലെന്ന് പ്രഖ്യാപിച്ച എസ്.എന്.ഡി.പി. യോഗവും പ്രക്ഷോഭരംഗത്തിറങ്ങിയ ബി.ഡി.ജെ.എസും വനിതാമതിലില് യോജിപ്പിന്റെ വഴിയിലെത്തി.
ശബരിമല വിഷയത്തിലല്ല വനിതാ മതില് ഒരുക്കുന്നതെന്നും കേരളത്തെ വീണ്ടും ഭ്രാന്താലയമാക്കാതിരിക്കാതിരിക്കാനാണ് സര്ക്കാര് ശ്രമിക്കുന്നതെന്നും വെള്ളാപ്പള്ളി നടേശന് പറഞ്ഞു. ജാതിമത രാഷ്ട്രീയമൊന്നും പരിഗണിക്കാതെ ആര്ക്കും മതിലില് പങ്കെടുക്കാം. എസ്.എന്.ഡി.പി അയ്യപ്പ ജ്യോതിക്ക് എതിരല്ല. ജ്യോതി ഇടയ്ക്ക് മുറിഞ്ഞെങ്കിലും കുറഞ്ഞ സമയം കൊണ്ട് ശബരിമല കര്മസമിതി നല്ല പ്രകടനം കാഴ്ചവച്ചു. ഇത് അംഗീകരിക്കേണ്ടതാണ്.
സ്വാമി വിവേകാനന്ദന് ഭ്രാന്താലയമെന്ന് വിശേഷിപ്പിച്ച കേരളം വീണ്ടും ഇത്തരത്തിലാകുന്ന സാഹചര്യമാണെന്ന തിരിച്ചറിവ് ഇടതുപക്ഷത്തിന് ഉണ്ടായതാണ് വനിതാ മതിലിന് പ്രേരിപ്പിച്ചത്. വനിതാ മതിലും ശബരിമലയുമായി കൂട്ടികെട്ടേണ്ടതില്ലെന്നും വെള്ളാപ്പള്ളി പറഞ്ഞു.
വനിതാമതിലില് ബി.ഡി.ജെ.എസ്. പ്രവര്ത്തകര്ക്ക് പങ്കെടുക്കാന് തടസമില്ല. സാഹചര്യം ഒത്തു വന്നാല് താനും പങ്കെടുക്കുമെന്ന് തുഷാര് വെള്ളാപ്പള്ളി മാധ്യമങ്ങളോട് പറഞ്ഞു. വനിതാമതിലിന്റെയും അയ്യപ്പജ്യോതിയുടെയും സംഘാടനം രണ്ടു വിഷയങ്ങളിലാണ്. അതുകൊണ്ടുതന്നെ രണ്ടുതലങ്ങളിലാണ് പിന്തുണ. വനിതാമതിലിനു രാഷ്ട്രീയമില്ലെന്നും ശബരിമലയ്ക്ക് എതിരല്ലെന്നും തുഷാര് പറഞ്ഞു.
