ഹാമില്ട്ടണ്; ന്യൂസിലാണ്ടിനെതിരായ ഏകദിന പരമ്പരയില് ഇന്ത്യയ്ക്ക് ആദ്യ തോല്വി. നാലാം മത്സരത്തില് എട്ട് വിക്കറ്റിനാണ് കിവീസ് ഇന്ത്യയെ തകര്ത്തത്. അഞ്ച് വിക്കറ്റ് നേടിയ ട്രെന്ഡ് ബോള്ട്ടാണ് ഇന്ത്യന് ബാറ്റിംഗ് നിരയുടെ നട്ടെല്ലൊടിച്ചത്. 30.5 ഓവറില് 92 റണ്സിന് ഇന്ത്യന് താരങ്ങള് എല്ലാവരും പുറത്തായി. 18 റണ് നേടി പുറത്താകാതെ നിന്ന യുസ്വേന്ദ്ര ചാഹല് ആയിരുന്നു ഇന്ത്യയുടെ ടോപ് സ്കോറര്.
ടോസ് നേടിയ ന്യൂസീലാണ്ട് ക്യാപ്റ്റന് കെയ്ന് വില്യംസണ് ബൗളിംഗ് തിരഞ്ഞെടുക്കുകയായിരുന്നു. നായകന്റെ തീരുമാനം ഒട്ടും തെറ്റിയിട്ടില്ലെന്ന് ബോള്ട്ട് തുടക്കത്തിലെ തന്നെ തെളിയിച്ചു. ഒപ്പണര് ശിഖര് ധവാനെ(13) പുറത്താക്കി ഇന്ത്യയുടെ തകര്ച്ചയ്ക്ക് ബോള്ട്ട് തുടക്കം കുറിച്ചു. പിന്നാലെ 200-ാം ഏകദിന മത്സരത്തില് നായകനായി ഇറങ്ങിയ രോഹിത് ശര്മയും മടങ്ങി. ഏഴ് റണ്സാണ് നേടിയത്.
ഇന്ത്യയുടെ ഏഴ് താരങ്ങളാണ് രണ്ടക്കം കാണാതെ പുറത്തായത്. അരങ്ങേറ്റ മത്സരത്തിനിറങ്ങിയ ശുഭ്മാന് ഗില് ഒമ്പത് റണ്സ് നേടി പുറത്തായി. അമ്പത്തി റായിഡുവും ദിനേശ് കാര്ത്തിക്കും റണ് നേടുന്നതിന് മുമ്പേ പവലിയനില് മടങ്ങിയെത്തി. പിന്നാലെ എത്തിയ കേദാര് ജാദവ്(1), ഹര്ദിക് പാണ്ഡ്യ(16), ഭുവനേശ്വര് കുമാര് (1), കുല്ദീപ് യാദവ്(15), ഖലീല് അഹമ്മദ്(5) എന്നിവരും തുടരെ പവലിയനിലേക്ക് മടങ്ങിയതോടെ ഇന്ത്യന് പോരാട്ടം 92ല് അവസാനിച്ചു.
അഞ്ച് വിക്കറ്റ് നേടിയ ബോള്ട്ടാണ് ഇന്ത്യയുടെ തകര്ച്ചയ്ക്ക് മുന്കൈ എടുത്തത്. ഗ്രഹാണ്ട്ഹോം മൂന്ന് വിക്കറ്റ് നേടി. ആസ്റ്റ്ലിയും നീഷമും ഓരോ വിക്കറ്റ് വീതവും നേടി.
മറുപടി ബാറ്റിംഗിനിറങ്ങിയ ആതിഥേയര് 14.4 ഓവറില് രണ്ട് വിക്കറ്റ് നഷ്ടത്തില് ലക്ഷ്യം മറികടന്നു. ഗുപ്റ്റിലിന്റെയും(14) കെയ്ന് വില്യംസണിന്റെയും(11) വിക്കറ്റുകളാണ് കിവീസിന് നഷ്ടമായത്. 30 റണ് നേടി നിക്കോളാസും 37 റണ് നേടി റോസ് ടെയ്ലറും പുറത്താകാതെ നിന്നു. ഭുവനേശ്വര് കുമാറാണ് ഇന്ത്യയ്ക്കായി രണ്ട് വിക്കറ്റുകളും നേടിയത്.
അഞ്ച് മത്സരങ്ങള് അടങ്ങുന്ന പരമ്പരയില് ആദ്യ മൂന്നെണ്ണം ജയിച്ച് ഇന്ത്യ കിരീടം ഉറപ്പാക്കി കഴിഞ്ഞു.
