പാരീസ്: സ്പാനീഷ് ക്ളബ്ബ് ബാഴ്സിലോണ വിടാന് കാരണം അര്ജന്റീനയുടെ സൂപ്പര്താരം ലയണേല് മെസ്സി ആല്ലെന്ന് വ്യക്തമാക്കി ബ്രസീലിയന് സൂപ്പര്താരം നെയ്മര്. മറ്റൊരു ലീഗിനെ ശ്രദ്ധേയമാക്കാന് ഒരു പുതിയ താരത്തെ ലക്ഷ്യമിട്ട് പിഎസ്ജിയില് നിന്നും ഓഫര് വന്നപ്പോള് സ്വീകരിച്ചു എന്നേയുള്ളെന്ന് നെയ്മറിന്റെ പതാവ് വ്യക്തമാക്കി. ബാഴ്സയില് നിന്നും പിഎസ്ജിയിലേക്ക് നെയ്മര് ചേക്കേറിയത് 222 ദശലക്ഷം യൂറോയ്ക്കായിരുന്നു.
ലാലിഗയില് എംഎസ്എന് സഖ്യം എന്ന് പ്രസിദ്ധിയാര്ജ്ജിച്ച് ബാഴ്സിലോണ വന് വിജയവുമായി കുതിക്കുമ്പോള് നെയ്മര് ഫ്രാന്സിലേക്ക് കൂടുമാറിയത് ലോക ഫുട്ബോളില് തന്നെ വലിയ വാര്ത്തയായിരുന്നു. ബാഴ്സയില് മെസ്സിയെ പോലെ ഒരു താരം കളിക്കുമ്പോള് ആര്ക്കും സൂപ്പര്താരപദവി നേടാന് കഴിയാത്തതിനാല് മെസ്സിയുടെ നിഴലില് നിന്നും പുറത്തു കടക്കാനാണ് നെയ്മര് പോകുന്നത് എന്നാണ് അന്ന് മാധ്യമങ്ങള് എഴുതിയത്. 2017 ല് ക്ളബ്ബ് വിട്ട നെയ്മര് പിന്നീട് ഫ്രാന്സ് ക്ളബ്ബിനൊപ്പം മികച്ച പേര് സമ്പാദിക്കുകയും ചെയ്തു.
മെസ്സി - സുവാരസ് - നെയ്മര് സഖ്യത്തെ ലോകത്തെ ഏറ്റവും കിടയറ്റ മുന്നേറ്റ നിരയായിട്ടായിരുന്നു ഫുട്ബോള് ലോകം വിലയിരുത്തപ്പെട്ടത്. ഗോള് നേടുകയും അവസരം ഒരുക്കിയും മൂവരും ലോകത്തിന്റെ നെറുകയില് നില്ക്കുമ്പോഴായിരുന്നു വേര്പിരിയലില് ഏറ്റവും ഒടുവില് കേള്ക്കുന്നത് നെയ്മര് ലാലിഗയിലേക്ക് മടങ്ങും എന്നായിരുന്നു. എന്നാല് ബാഴ്സയിലേക്കോ റയലിലേക്കോ നെയ്മര് കളിക്കാന് എത്തുമെന്ന അഭ്യൂഹങ്ങളും നെയ്മറിന്റെ പിതാവ് തള്ളിക്കളഞ്ഞിട്ടുണ്ട്.
ലാലിഗയില് ബാഴ്സിലോണയുടെ കടുത്ത എതിരാളികളായ റയല് മാഡ്രിഡ് നെയ്മറെ സ്വന്തമാക്കാന് വലിയ ശ്രമമാണ് നടത്തുന്നത്. ഇത്തവണത്തെ ട്രാന്സ്ഫര് വിപണിയില് റയല് മോഹിപ്പിക്കുന്ന വില മുന്നോട്ടു വെച്ചെങ്കിലും നെയ്മറിന്റെ ക്ളബ്ബ് പിഎസ്ജിയോ താരമോ അതില് കൊത്തിയിട്ടില്ല. തല്ക്കാലം താന് ഫ്രഞ്ച് ക്ളബ്ബില് സന്തുഷ്ടനാണെന്ന് നെയ്മര് പറയുമ്പോള് വില്പ്പനയ്ക്കില്ല എന്ന് പിഎസ് ജിയും പറയുന്നു.
