ന്യൂഡല്ഹി: ട്വന്റി20 യിലെ ബാറ്റിംഗ് വിസ്ഫോടനങ്ങള് ഏകദിന ക്രിക്കറ്റിനെയും മാറ്റി മറിക്കുന്നു. 80 കളില് 200 വലിയ സ്കോറും 90 കളില് 300 വലിയ സ്കോറും ആയിരുന്നിടത്ത് ഇപ്പോള് സ്കോര് ബോര്ഡ് കയറുന്നത് 400 കളിലേക്ക്. വെസ്റ്റിന്ഡീസിനെതിരേ കഴിഞ്ഞ മത്സരത്തില് വമ്പന് സ്മകാര് നേടിയ ക്രിക്കറ്റില് വലിയ പാരമ്പര്യമുള്ള ഇംഗ്ളണ്ട് 400 റണ്സ് മറികടന്നത് നാലാം തവണ.
സെന്റ് ജോര്ജ്ജിലെ ഗ്രാനേഡയില് നടന്ന മത്സരത്തില് വെസ്റ്റിന്ഡീസിനെതിരേ ഇംഗ്ളണ്ട് കുറിച്ചത് 418 റണ്സായിരുന്നു. 2015 ലോകകപ്പിന് ശേഷം നാലാം തവണയാണ് ഇംഗ്ളണ്ട് 400 കടക്കുന്നത്. ഈ കാലയളവിനിടയില് ഇംഗ്ളണ്ടിനെ കൂടാതെ 400 കടന്ന ഏക ടീം ദക്ഷിണാഫ്രിക്ക ആയിരുന്നു. 2015 ഒക്ടോബറില് അവര് ഇന്ത്യയ്ക്ക് മേല് മുംബൈയില് നടന്ന മത്സരത്തില് അടിച്ചത് 438 റണ്സായിരുന്നു.
400 റണ്സ് സ്കോര് ചെയ്യുന്ന കാര്യത്തില് ഇംഗ്ളണ്ട് രാജാക്കന്മാരായി മാറുകയാണ്. കഴിഞ്ഞ വര്ഷം ജൂണില് ഓസ്ട്രേലിയയ്ക്കെതിരേ ഇംഗ്ളണ്ട് സ്കോര് ചെയ്തത് 481 റണ്സായിരുന്നു. ഏകദിനത്തില് 20 തവണയാണ് സ്കോര് 400 ന് മുകളില് പോയത്. ഒരുകളിയില് രണ്ടു ടീമും 400 അടിച്ചു. ഏറ്റവും കൂടുതല് തവണ 400 മുകളില് സ്കോര് ചെയ്തത് ദക്ഷിണാഫ്രിക്കയാണ്. ആറു തവണ. തൊട്ടുപിന്നില് അഞ്ചു തവണയുമായി ഇന്ത്യയും മൂന്നാമത് നാലു തവണയുമായി ഇംഗ്ളണ്ടും നില്ക്കുമ്പോള് ഓസ്ട്രേലിയയും ശ്രീലങ്കയും രണ്ടു തവണ വീതവും ന്യൂസിലന്റ് ഒരു തവണയും 400 എന്ന സ്കോര് നേടുകയുണ്ടായി.
2006 ല് ജോഹന്നാസ് ബര്ഗില് ദക്ഷിണാഫ്രിക്കയ്ക്ക് എതിരേ ഓസ്ട്രേലിയയാണ് 400 എന്ന അക്കം ആദ്യമായി കടന്നത്. നാലിന് 434 എന്ന സ്കോറാണ് ഉയര്ത്തിയത്്. ഏറ്റവും കൂടുതല് തവണ 400 അനുവദിച്ചത് വെസ്റ്റിന്ഡീസാണ്. മൂന്ന് തവണ. ഓസ്ട്രേലിയ, ഇന്ത്യ, ദക്ഷിണാഫ്രിക്ക, അയര്ലന്റ്, ശ്രീലങ്ക എന്നിവര് രണ്ടു തവണയും അഫ്ഗാനിസ്ഥാന്, ബര്മുഡ, അയര്ലന്റ്, നെതര്ലന്റ്, ന്യൂസീലാന്റ്, പാകിസ്താന്, സിംബാബ് വേ എന്നിവര് ഓരോ തവണ വീതവും എതിരാളികളെ അനുവദിച്ചു.
400 കള് ഏറ്റവൂം കൂടുതല് പിറന്നത് ഇന്ത്യയില് വെച്ചാണ് ആറു തവണ. ദക്ഷിണാഫ്രിക്കയില് നാലു തവണയും ഇംഗ്ളണ്ടിലും ഓസ്ട്രേലിയയിലും മൂന്ന് തവണയും പിറന്നപ്പോള് നെതര്ലന്റ്, സ്കോട്ട്ലന്റ്, ഗ്രനാഡ, ട്രിനിഡാഡ് എന്നിവിടങ്ങളില് ഓരോ തവണ വീതവും 400 എന്ന സംഖ്യ പിറന്നു. ഒന്നാം ഇന്നിംഗ്സില് 400 പിറന്നത് 18 തവണയാണ്. രണ്ടാം ഇന്നിംഗ്സില് രണ്ടു തവണയും. ഇതില് ഒരു തവണ മാത്രമാണ് ചേസ് ചെയ്യപ്പെട്ടത്. ശ്രീലങ്കയ്ക്കെതിരേ അഞ്ചിന് 404 റണ്സ് അടിച്ച ഇന്ത്യയ്ക്കായി 264 റണ്സ് എടുത്ത രോഹിത് ശര്മ്മയുടേതാണ് 400 കളിലെ ഏറ്റവും മികച്ച വ്യക്തിഗത സ്കോര്.
