കൊച്ചി : തനിക്കെതിരെയുള്ള സൈബര് ട്രോളുകള്ക്ക് മറുപടിയുമായി എറണാകുളത്തെ എന്ഡിഎ സ്ഥാനാര്ത്ഥി അല്ഫോന്സ് കണ്ണന്താനം രംഗത്ത്. നിരാശ തീര്ക്കാന് ഒരു വഴിയുമില്ലാത്തവരാണ് തനിക്കെതിരെ ട്രോളുണ്ടാക്കി പ്രചരിപ്പിക്കുന്നത്. ഒരു തൊഴിലും ഇല്ലാത്ത യുവജനമാണ് ഇത്തരം ട്രോളുകള്ക്ക് പിന്നില്. ഇവര് മാനസിക സമ്മര്ദ്ദം കുറയ്ക്കുന്നത് തനിക്കെതിരെ ട്രോളുണ്ടാക്കിയാണെന്നും കണ്ണന്താനം പരിഹസിക്കുന്നു.
സ്വന്തം ഫേസ്ബുക്ക് ഐഡി പോലും എനിക്ക് അറിയില്ല. അതുകൊണ്ടു തന്നെ ട്രോളൊന്നും കാണാറില്ലെന്നും ഇനി കണ്ടാല് തന്നെ അതൊന്നും തന്റെ പ്രവര്ത്തനങ്ങളെ ബാധിക്കാറില്ലെന്നും കണ്ണന്താനം പറയുന്നു. എന്തായാലും ഞാന് കാരണം മലയാളികള് ചിരിക്കുന്നതില് സന്തോഷമുണ്ടെന്നും കണ്ണന്താണം കൂട്ടിച്ചേര്ത്തു.
എന്റെ പൊതു ജീവിതവും പാരമ്പര്യവും ട്രോളന്മാര്ക്ക് മുന്നില് അടിയറവ് വയ്ക്കില്ല. തൊഴിലുള്ള കേരളത്തിലെ യുവാക്കള് എന്ന സങ്കല്പ്പം നിലവില് ഗള്ഫില് മാത്രമാണ് ഉള്ളത്. അവിടുത്തെ പണിയും കഴിഞ്ഞ് തിരികെ കേരളത്തില് എത്തുന്നവര് ട്രോളുണ്ടാക്കിയാണ് ആശ്വാസം കണ്ടെത്തുന്നത്. ചുറ്റുപാടുകളിലെ ഫ്രസ്ട്രേഷന് തീര്ക്കാന് ഒരു വഴിയും ഇല്ലാത്തതുകൊണ്ടാണ് ട്രോളുണ്ടാക്കി തന്നെ വധിക്കുന്നതെന്നും കണ്ണന്താനം പറയുന്നു.
