തിരുവനന്തപുരം: വോട്ടിംഗ് യന്ത്രത്തിലെ പിഴവ് തെറ്റായ ആരോപണമെന്ന് മുഖ്യ തെരഞ്ഞെടുപ്പ് ഓഫീസര് ടീക്കാറാം മീണ. കളക്ടറുടെ പരിശോധനയില് ഇത് വ്യക്തമായെന്ന് ടീക്കാറാം മീണ പറഞ്ഞു. കോവളം ചൊവ്വരയിലെ 151 ാം നമ്പര് ബൂത്തില് കൈപ്പത്തിക്ക് കുത്തുമ്പോള് താമരയ്ക്ക് ലൈറ്റ് തെളിയുന്നു എന്ന ആരോപണവുമായി എത്തിയത് യുഡിഎഫുകാരായിരുന്നു.
മഴ കാരണമാകാം യന്ത്രങ്ങള് തകരാറിലായതെന്നും മുഖ്യ തെരഞ്ഞെടുപ്പ് ഓഫീസര് വ്യക്തമാക്കി. 76 പേര് വോട്ടു രേഖപ്പെടുത്തി കഴിഞ്ഞായിരുന്നു ഈ പിഴവ് ശ്രദ്ധിക്കപ്പെട്ടത്. പിന്നീട് പുതിയ വോട്ടിംഗ് യന്ത്രം സ്ഥാപിച്ച് വോട്ടെടുപ്പ് വീണ്ടും തുടങ്ങിയിട്ടുണ്ട്. അതേസമയം പരാതി പരിശോധിച്ചെന്നും സാങ്കേതിക തകരാര് മാത്രമാണെന്നും വോട്ടിംഗ് യന്ത്രത്തിന്റെ സ്വിച്ചുകള്ക്ക് ചില തകരാര് സംഭവിച്ചെന്നും കളക്ടര് വാസുകി വ്യക്തമാക്കി.
നേരത്തേ ചേര്ത്തലയിലെ കിഴക്കേ നാല്പ്പത് ബൂത്തിലും സമാന പിഴവ് കണ്ടെത്തിയിരുന്നു. ഇവിടെയും കൈപ്പത്തിക്ക് കുത്തുമ്പോള് തെളിഞ്ഞതു താമരയായിരുന്നു. എന്നാല് മോക്പോള് നടത്തിയപ്പോള് തന്നെ പിഴവ് കണ്ടെത്തിയതിനെ തുടര്ന്ന് ഈ യന്ത്രം മാറ്റി.
വോട്ടിംഗ് യന്ത്രത്തില് പിഴവ് വന്നതിനെ തുടര്ന്ന് പലയിടത്തും വോട്ടെടുപ്പ് താമസിച്ചിരുന്നു. നേരത്തേ മുഖ്യമന്ത്രി വോട്ടു ചെയ്യുന്നതിന് മുമ്പ് അദ്ദേഹത്തിന്റെ ബൂത്തിലും വോട്ടിംഗ് യന്ത്രത്തിന് തകരാറുണ്ടായിരുന്നു. പിന്നീട് അത് പരിഹരിച്ച ശേഷമാണ് വോട്ടെടുപ്പ് നടന്നത്.
വോട്ടിംഗ് യന്ത്രത്തെക്കുറിച്ച് വ്യാപകമായ പരാതി നേരത്തേ മുതലുണ്ട്. അതുകൊണ്ടു തന്നെ കുറ്റമറ്റ രീതിയില് യന്ത്രത്തിന് തകരാറില്ലെന്ന് ഉറപ്പുവരുത്തേണ്ട ചുമതല തെരഞ്ഞെടുപ്പ് കമ്മീഷനുണ്ട്. താന് വോട്ടു ചെയ്തിടത്തും യന്ത്രം ആദ്യം തകരാറിലായിരുന്നു. തൊട്ടടുത്ത ബൂത്തിലും അടുത്ത പഞ്ചായത്തിലും വോട്ടിംഗ് മെഷീന് തകരാറായി. കേരളത്തില് ഉടനീളം വോട്ടിംഗ് യന്ത്രം തകരാറിലായി. വോട്ടിംഗ് മെഷീന് തകരാറിലാകുന്ന കാര്യം തെരഞ്ഞെടുപ്പ് കമ്മീഷന് ഗൗരവമായി കാണേണ്ട കാര്യമാണെന്നും പിണറായി പറഞ്ഞിരുന്നു.
