ബംഗലുരു: കേരളം ഉള്പ്പെടെ എട്ടു സംസ്ഥാനങ്ങളില് ഭീകരാക്രമണം നടത്താന് തീവ്രവാദികള് പദ്ധതിയിടുന്നെന്ന സന്ദേശം വ്യാജം. ബംഗലുരു പോലീസ് ഇക്കാര്യം കേരളാപോലീസിനെ അറിയിച്ചു. വ്യാജ സന്ദേശം നല്കിയ ബംഗലുരു ആവലഹള്ളി സ്വദേശി സ്വാമി സുന്ദരമൂര്ത്തിയെ ബംഗലുരു പോലീസ് അറസ്റ്റ് ചെയ്തു. ബംഗലുരു പോലീസിന്റെ നിര്ദേശത്തെ തുടര്ന്ന് കേരളാപോലീസ് എല്ലാ ജില്ലകളിലും കനത്ത സുരക്ഷ ഏര്പ്പെടുത്തിയിരുന്നു.
വിരമിച്ച സൈനികനായ സുന്ദരമൂര്ത്തി ഇപ്പോള് ലോറി ഡ്രൈവറായി ജോലി ചെയ്തു വരികയാണ്. എട്ടു സംസ്ഥാനങ്ങളില് ഭീകരാക്രമണം ഉണ്ടാകുമെന്ന് ഇയാള് ബംഗലുരു പോലീസിനെ വിളിച്ച് അറിയിക്കുകയായിരുന്നു. ബംഗലുരു പോലീസ് നല്കിയ നിര്ദേശത്തെ തുടര്ന്ന് കേരളാപോലീസ് ശക്തമായ സുരക്ഷ ഒരുക്കിയിരുന്നു. എട്ടു സംസ്ഥാനങ്ങളില് ഭീകരാക്രമണം ഉണ്ടാകുമെന്നും രാമനാഥപുരത്ത് 19 തീവ്രവാദികള് എത്തിയതായുമായിരുന്നു ബംഗലുരു പോലീസിനെ ഇയാള് വിളിച്ചു പറഞ്ഞത്. ഇന്നലെ വൈകുന്നേരമാണ് ഇത്തരമൊരു സന്ദേശം ലഭിച്ചതെന്ന് കേരളത്തിനയച്ച ഫാക്സ് സന്ദേശത്തില് ബംഗലൂരു പൊലീസ് പറയുന്നു.
സംസ്ഥാനത്ത് എല്ലാ ജില്ലകളിലെയും പൊലീസ് മേധാവികളോട് ജാഗ്രത പാലിക്കാന് ഡിജിപി ലോക്നാഥ് ബെഹ്റ നിര്ദ്ദേശം നല്കി. കഴിഞ്ഞയാഴ്ചയായിരുന്നു ശ്രീലങ്കയില് സ്ഫോടന പരമ്പര ഉണ്ടായത്. 300 ലധികം പേരായിരുന്നു കൊല്ലപ്പെട്ടത്. ഭീകരാക്രമണത്തിന് സാധ്യതയുണ്ടെന്ന ഇന്ത്യന് രഹസ്യാന്വേഷണ വിഭാഗത്തിന്റെ മുന്നറിയിപ്പ് അവഗണിച്ചതിനെ തുടര്ന്നായിരുന്നു ശ്രീലങ്ക വന് ദുരന്തം ഏറ്റുവാങ്ങിയത്. പള്ളികളിലും ഹോട്ടലുകളിലുമായി ചാവേറാക്രമണം ഉണ്ടാകുകയായിരുന്നു.
