കോഴിക്കോട്: കായംകുളം എംഎല്എ യു പ്രതിഭയെ വിമര്ശിച്ച് ആരോഗ്യമന്ത്രി കെ.കെ. ശൈലജ. വീണ ജോര്ജ് എംഎല്എയെ അഭിനന്ദിച്ചത് ചൂണ്ടിക്കാട്ടി തനിക്കും അഭിനന്ദനം കിട്ടാന് ആഗ്രഹമുണ്ട് എന്ന രീതിയിലായിരുന്നു പ്രതിഭയുടെ പരാമര്ശം. മന്ത്രിയുടെ ഫെയ്സ്ബുക്ക് കുറിപ്പിനു താഴെയാണ് പ്രതിഭ ഇത്തരത്തില് കമന്റിട്ടത്.
ഇത്തരത്തില് പ്രതികരണം ഉയര്ത്തിയതിനെയാണ് മന്ത്രി വിമര്ശിച്ചിരിക്കുന്നത്. കാര്യങ്ങള് പറയാന് വ്യവസ്ഥാപിതമായ രീതികളുണ്ട്. അതൊന്നും നോക്കാതെ ഇത്തരത്തില് ഫെയ്സ്ബുക്ക് കമന്റിട്ടത് ശരിയായില്ലെന്നും മന്ത്രി പ്രതികരിച്ചു. ആരോഗ്യ സെക്രട്ടറിയെ വിമര്ശിച്ചതും ശരിയായില്ല. വീണ ജോര്ജിനെ അഭിനന്ദിക്കാനുള്ള കാരണം എംഎല്എ എന്ന നിലയില് മികച്ച ഇടപെടല് നടത്തിയതിനാലാണെന്നും മന്ത്രി കൂട്ടിച്ചേര്ത്തു.
ആര്ദ്രം പദ്ധതിയുടെ ഭാഗമായി ജില്ലാ ആശുപത്രികള്ക്കും മെഡിക്കല് കോളേജുകള്ക്കും കാത്ത് ലാബ് അനുവദിച്ചത് സംബന്ധിച്ച പോസ്റ്റിനാണ് സിപിഎം എംഎല്എ കൂടിയായ പ്രതിഭ മറുപടി നല്കിയത്. ലാബ് സ്ഥാപിക്കാന് നേതൃത്വം നല്കിയ വീണ ജോര്ജ് എംഎല്എ ഉള്പ്പെടെയുള്ളവര്ക്ക് ടീച്ചര് പോസ്റ്റില് അഭിനന്ദനം അറിയിച്ചതിനു പിന്നാലെയാണ് ഞങ്ങള്ക്കും അഭിനന്ദനം കിട്ടാന് ആഗ്രഹമുണ്ടെന്ന് തുറന്നു പറഞ്ഞ് കായംകുളം താലൂക്ക് ആശുപത്രിക്കായി താന് സമര്പ്പിച്ച പ്രോജക്ട് തള്ളിയതിനെ പ്രതിഭ എംഎല്എ വിമര്ശിച്ചിരിക്കുന്നത്.
സോഷ്യല് മീഡിയയില് ഉള്പ്പെടെ വന് വിമര്ശനം ഉയര്ന്നതോടെ വിശദീകരണവുമായി എംഎല്എ തന്നെ രംഗത്ത് വന്നു. കായംകുളം താലൂക്ക് ആശുപത്രിയെ കുറിച്ച് ഷൈലജ ടീച്ചറിന്റെ കാത്ത് ലാബുകളെ സംബന്ധിച്ച പോസ്റ്റില് ഇട്ട കമന്റ് ആരും ആഘോഷിക്കേണ്ടതില്ലെന്നും പ്രതിഭ വ്യക്തമാക്കിയിരുന്നു.
ആരോഗ്യ വകുപ്പ് മന്ത്രി ചെയ്യുന്ന കാര്യങ്ങളെ അങ്ങേയറ്റം ആദരവോടെ കാണുന്ന സഖാവാണ് ഞാന്. എന്നാല്, താന് പ്രതിനിധീകരിക്കുന്ന കായംകുളം മണ്ഡലത്തിലെ താലൂക്ക് ആശുപത്രിയെ ധനമന്ത്രി ബജറ്റ് മറുപടി പ്രസംഗത്തില് കിഫ്ബിയില് ഉള്പ്പെടുത്തിയതാണ്. നാളിതുവരെ അതിന് പണം അനുവദിക്കപ്പെട്ടില്ല എന്നത് സത്യം തന്നെയാണ്. വികസനവും ജനങ്ങളുടെ ക്ഷേമവും മാത്രമാണ് എന്റെ ലക്ഷ്യമെന്നും പ്രതിഭ കുറിച്ചിരുന്നു.
