ന്യൂഡല്ഹി: രാജ്യത്തെ ആതുരവിദ്യാഭ്യാസ രംഗത്ത് വന് മാറ്റങ്ങള്ക്ക് സാധ്യത ഇട്ടുകൊണ്ട് നഴ്സുമാര്ക്ക് ഡോക്ടര് പഠനം സാധ്യമാക്കും വിധം എംബിബിഎസിലേക്ക് ലാറ്ററല് എന്ട്രി കൊണ്ടുവരുന്നു. വൈദ്യ വിദ്യാഭ്യാസ രംഗത്ത് സമൂല മാറ്റങ്ങള് നിര്ദേശിക്കുന്ന 2019 ലെ ദേശീയ വിദ്യാഭ്യാസ നയത്തിലെ കരടിലാണ് ഈ നിര്ദേശമുള്ളത്. അഞ്ചുവര്ഷത്തെ എംബിബിഎസ് പഠനത്തിന്റെ ഭാഗമായി വരുന്ന ആദ്യ രണ്ടു വര്ഷത്തെ പഠനം നഴ്സിംഗ്, ദന്തല് വിഭാഗങ്ങള്ക്ക് കൂടി പൊതുവാക്കാനും ഇത് പൂര്ത്തിയാക്കിയവര്ക്ക് പിന്നീടുള്ള മൂന്ന്് വര്ഷത്തെ പഠനം സ്പെഷ്യലൈസ് ചെയ്യാന് അവസരം നല്കുന്നതുമായ രീതിയിലാണ് പുതിയമാറ്റം.
മെഡിസിന് പഠിക്കാനുള്ള പ്രവേശന പരീക്ഷയും എംബിബിഎസ് ബിരുദധാരികള്ക്ക് പ്രക്ടീസ് അനുവദിക്കുന്ന എക്സിറ്റ് എക്സാം എന്നിവ നിലനിര്ത്താന് നിര്ദേശമുണ്ട്. പൊതുവായി രണ്ടു വര്ഷത്തെ അടിസ്ഥാന പഠനം ഡോക്ടര്, നഴ്സ്, ദന്തിസ്റ്റ് എന്നീ കോഴ്സുകള്ക്ക് പൊതുവായി മാറും. അതിന് ശേഷം എംബിബിഎസ്, ബിഡിഎസ്, നഴ്സിംഗ് തുടങ്ങി വിദ്യാര്ത്ഥിക്ക് സ്പെഷ്യലൈസ് ചെയ്യാം. പിന്നീട് ലാറ്ററല് എന്ട്രി പ്രകാരം ഡോക്ടറാകാന് താല്പ്പര്യമുള്ളവര്ക്ക് അങ്ങിനെയാകാം. അതേസമയം ഈ ലാറ്ററല് എന്ട്രി എന്നാല് എംബിബിഎസിലേക്ക് എത്താനുള്ള കുറുക്കുവഴിയായി മാറുന്നില്ല. അവരും നീറ്റ് എഴുതിവേണം മെഡിസിന് എത്താന് എന്നാണ് നിര്ദേശം.
അതായത് ഒരു നഴ്സിംഗ് വിദ്യാര്ത്ഥി രണ്ടു വര്ഷത്തിന് ശേഷം എംബിബിഎസിന് ലാറ്ററല് എന്ട്രി ആഗ്രഹിക്കുന്നുണ്ടെങ്കില് അവരും നീറ്റ് എഴുതണം. അത് അനുസരിച്ചായിരിക്കും എംബിബിഎസിന്റെ മൂന്ന് വര്ഷ പഠനം. എംബിബിഎസിലെ എക്സിറ്റ് എക്സാം പോസ്റ്റ് ഗ്രാജുവേഷന് പ്രോഗ്രാമുകളുടെ എന്ട്രന്സ് എക്സാമായി മാറുമെന്നും പറയുന്നു. അതുപോലെ എംബിബിഎസ് വിദ്യാഭ്യാസം നല്കുന്ന സ്ഥാപനങ്ങള്ക്ക് സ്വയംഭരണാവകാശം നല്കാനും നിര്ദേശത്തില് പറയുന്നു. ഇതിന്റെ ഭാഗമായി ഫീസ് സ്ഥാപനങ്ങള്ക്ക് തീരുമാനിക്കാം. പക്ഷേ സ്കോളര്ഷിപ്പ് നിര്ബ്ബന്ധമായിരിക്കും. 50 ശതമാനം വിദ്യാര്ത്ഥികള്ക്ക് സ്കോളര്ഷിപ്പ് നല്കണം. ഇതില് 20 ശതമാനം പേര്ക്ക് പൂര്ണ്ണ സ്കോളര്ഷിപ്പ് നല്കണം.
സാമ്പത്തീകമായും സാംസ്ക്കാരികമായും പിന്നില് നില്ക്കുന്ന ആര്ക്കെല്ലാം സ്കോളര്ഷിപ്പ് നല്കണമെന്ന് ഇതിലൂടെ മാനേജ്മെന്റിന് തീരുമാനിക്കാനാകും. പ്രാദേശിക മേഖലയിലുള്ള വിദ്യാര്ത്ഥികള്ക്കും സാമ്പത്തീകമായി പിന്നോക്കം നില്ക്കുന്നവര്ക്കും എംബിബിഎസ് എന്ന സ്വപ്നം സാക്ഷാത്ക്കരിക്കാനും ഇത്തരം വിദ്യാഭ്യാസമേഖലയിലെ ചെലവ് കുറയ്ക്കാനുമാണ് ഈ നീക്കമെന്ന്് കരടുരൂപത്തിന് പിന്നില് പ്രവര്ത്തിച്ച നാരായണാ ഹെല്ത്ത് ചെയര്മാന് ഡോ. ദേവി ഷെട്ടി പറയുന്നു. ഇതിനൊപ്പം മെഡിസിന്, നഴ്സിംഗ്, ദന്തിസ്ട്രി എന്നിവയുമായി ബന്ധപ്പെട്ട വിവിധ കൗണ്സിലുകളുടെ അധികാരങ്ങള്ക്കും നിയന്ത്രണം വരും. പ്രൊഫഷണല് സ്റ്റാന്ഡേര്ഡുകള് സജ്ജമാക്കുക, ഔട്ട്സോഴ്സിംഗുമായി ബന്ധപ്പെട്ട ഇന്സ്പെക്ഷന്, അക്രഡിറ്റേഷന് തുടങ്ങിയ കാര്യങ്ങളിലേക്ക് കൗണ്സിലുകളുടെ അധികാരം ചുരുങ്ങും.
