ഉത്തര്പ്രദേശ്: ക്ലാസ് മുറിയില് കുട്ടികളെ പഠിപ്പിക്കുന്നതിനിടയില് അധ്യാപകന് കിടന്നുറങ്ങി. ചിത്രം സമൂഹമാധ്യമങ്ങളില് പ്രചരിച്ചതോടെ സ്വതന്ത്ര വിദ്യാഭ്യാസ ചുമതലയിലുള്ള മന്ത്രി അദ്ധ്യാപകനെ താല്ക്കാലികമായി പുറത്താക്കി. ഉത്തര്പ്രദേശിലെ സിതപ്പൂര് ജില്ലയിലാണ് സംഭവം. വാട്സ് ആപ്പിലൂടെ ഫോട്ടോകള് മന്ത്രിക്ക് ലഭിച്ചതിനാലാണ് അധ്യാപകനെ താല്ക്കാലികമായി പുറത്താക്കിയത്.
പ്രൈമറി അധ്യാപകനായ അതുല് കുമാര് മിശ്ര തറയില് കുട്ടികളുടെ നടുവില് തലയില് തുണിമൂടി കിടന്നുറങ്ങുന്ന ചിത്രമായിരുന്നു സോഷ്യല്മീഡിയയില് പ്രചരിച്ചത്. ഇത് മന്ത്രിയുടെ ഫോണില് എത്തിയതിനെ തുടര്ന്ന് നടത്തിയ അന്വേഷണത്തിലാണ് അധ്യാപകന് ഏതാണെന്നും ഏത് സ്കൂളിലാണ് സംഭവം എന്നതും കണ്ടെത്താന് കഴിഞ്ഞത്.
ക്ലാസ് മുറികളില് കുട്ടികള്ക്ക് ഡസ്ക്കും ബെഞ്ചും ഇല്ലെന്നുള്ളതും സോഷ്യല്മീഡിയയില് ചര്ച്ചയായിരുന്നു. കുട്ടികള് കാര്പ്പെറ്റിനു പുറത്ത് നിലത്തിരുന്നാണ് പഠിക്കുന്നതെന്നതും ചിത്രത്തില് കാണാന് സാധിക്കും.
സംഭവം ഒരാള് ചിത്രങ്ങള് പകര്ത്തി സമൂഹമാധ്യമങ്ങളില് പോസ്റ്റ് ചെയ്യുകയായിരുന്നു. മന്ത്രി അനുപമ ജെയ്സ്വാല് ഫോട്ടോ അധികൃതര്ക്ക് കൈമാറിയതിനെ തുടര്ന്നാണ് അധ്യാപകനെ പിരിച്ചുവിട്ടത്.
