പാലാ : പാചക പരീക്ഷണങ്ങള് പാളിപ്പോകുക ഒരു സാധാരണ സംഭവമാണ്. ഉപ്പും പഞ്ചസാരയും തമ്മിലും മറ്റ് പൊടികള് തമ്മിലും മാറിപ്പോകുക ധാരാളം കേട്ടുകേള്വിയുമുണ്ട്. ഇതൊക്കെ പലപ്പോഴും കുടുംബത്തിലെ പല പൊട്ടിത്തെറികള്ക്കും കാരണമാകാറുമുണ്ട്. എന്നാല്, ഇത്തരത്തില് അടുക്കളയിലുണ്ടായ ഒരു അബദ്ധം കൊണ്ട് തലനാരിഴയ്ക്ക് ജീവന് തിരിച്ചു പിടിക്കാന് കഴിഞ്ഞതിന്റെ ആശ്വാസത്തിലാണ് കോട്ടയത്തെ ഒരു യുവദമ്പതികള്.
അടുക്കളയില് മീന് വറുത്തുകൊണ്ടിരിക്കെ കരണ്ടുപോയതതാണ് പണിയായത്. മീന് വറുക്കാന് എടുത്തുവച്ചപ്പോഴാണ് കരണ്ട് പോയത്. പിന്നെ ഉപ്പും മുളകും കുരുമുളകുമെല്ലാം തപ്പിത്തടഞ്ഞ് എടുത്ത് മീനില് ഇട്ടു പുരട്ടി. കരണ്ട് വരാന് താമസിച്ചതോടെ മീന് വറുക്കുകയും ചെയ്തു. എന്നാല്, കുരുമുളക് പൊടി എന്നു കരുതി മീനില് പുരട്ടിയത് എലിവിഷം ആയിരുന്നുവെന്ന് മാത്രം. കരണ്ട് വന്നതോടെ വറുത്ത മീന് കൂട്ടി ഇരുവരും വയറു നിറയെ ചോറും ഉണ്ടു. പിന്നാലെ ഛര്ദ്ദിയും തുടങ്ങി. ഇതോടെ അടുക്കളയിലെത്തി പരിശോധിച്ചപ്പോഴാണ് കുരുമുളക് പൊടിക്ക് പകരം ഇട്ടത് എലിവിഷമാണെന്ന് തിരിച്ചറിഞ്ഞത്.
ഉടന് തന്നെ പാലാ താലൂക്ക് ആശുപത്രിയിലേയ്ക്കും അവിടെ നിന്നും കോട്ടയം മെഡിക്കല് കോളജിലേയ്ക്കും എത്തിച്ചു. ഇവര്ക്ക് ഏഴുമാസം മാത്രം പ്രായമുള്ള ഒരു കുഞ്ഞുണ്ട്. കുട്ടി മീന് വറുത്തത് കഴിച്ചിരുന്നില്ല എന്നതും ആശ്വാസകരമായി. എന്തായാലും ഇരുവരുടെയും ആരോഗ്യനില ഇപ്പോള് മെച്ചപ്പെട്ടതായി ഡോക്ടര്മാര് അറിയിച്ചു.
