ലഖ്നൗ : ഹെല്മറ്റ് ധരിക്കാതെ വാഹനമോടിച്ചതിന് പിഴയടച്ച പോലീസിനോട് അന്നുതന്നെ പകരം വീട്ടി വൈദ്യുതി വകുപ്പ് ജീവനക്കാരന്. കാലങ്ങളായി വൈദ്യുതി ബില് അടയ്ക്കാറില്ലെന്ന കാരണം ചൂണ്ടിക്കാട്ടി പോലീസ് സ്റ്റേഷനിലെ ഫ്യൂസ് ഊരിക്കൊണ്ടാണ് ജീവനക്കാരന് പകരം വീട്ടിയത്.
ഉത്തര്പ്രദേശിലെ ഫിറോസാബാദ് ജില്ലയില് ചൊവ്വാഴ്ച വൈകിട്ടോടെയാണ് സംഭവം. ശ്രീനിവാസ് എന്ന വൈദ്യുതി വകുപ്പ് ജീവനക്കാരനാണ് ഡ്യൂട്ടിക്കിടെയുള്ള യാത്രയില് ഹെല്മറ്റ് വച്ചില്ലെന്നു പറഞ്ഞ് തന്നോട് 500 രൂപ ഈടാക്കിയ പോലീസുകാരോട് പകരം വീട്ടാന് ലായിന്പര് പോലീസ് സ്റ്റേഷനിലെ വൈദ്യുതിബന്ധം വിച്ഛേദിച്ചത്.
ഹെല്മറ്റ് ധരിച്ചില്ലെന്നു പറഞ്ഞ് പിഴ അടയ്ക്കാന് നിര്ദേശിച്ചപ്പോള് താന് ഡ്യൂട്ടിയിലാണെന്നും അതിനിടെ അപ്രതീക്ഷിതമായി ഉണ്ടായ സംഭവമാണെന്നും പറയുകയും ജൂനിയര് എഞ്ചിനീയറെ കൊണ്ട് ഫോണില് സംസാരിപ്പിക്കുകയും ചെയ്തുവെങ്കിലും എസ്ഐ വഴങ്ങിയില്ലെന്ന് മാത്രമല്ല, മറ്റ് പോലീസുകാരോടൊപ്പം ചേര്ന്ന് ഗതാഗത നിയമം ലംഘിക്കുന്നതിന്റെ പ്രത്യാഘാതത്തെ കുറിച്ച് വിശദീകരിക്കുകയായിരുന്നു എസ്.ഐ ചെയ്തതെന്ന് ശ്രീനിവാസ് പറഞ്ഞു. കഴിഞ്ഞ നാലു മാസമായി ശമ്പളം കിട്ടിയിട്ടില്ലെന്നും 500 രൂപ ഫൈന് അടയ്ക്കുന്നത് ഏറെ ബുദ്ധിമുട്ടാണെന്നും ശ്രീനിവാസ് പറഞ്ഞിരുന്നു.
ഇതിന് പകരമായി ബില്ല് അടയ്ക്കാതിരുന്ന പോലീസ് സ്റ്റേഷന്റെ ഫ്യൂസ് ഊരുകയും വൈദ്യുതി ബില് കൃത്യമായി അടയ്ക്കാത്തതുമായി ബന്ധപ്പെട്ട നിയമങ്ങളും പിഴകളും സംബന്ധിച്ച് ശ്രീനിവാസും പോലീസുകാരോടും പറഞ്ഞു. 6.62 ലക്ഷം രൂപയുടെ ബില്ലാണ് ലായിന്പുര് സ്റ്റേഷന് അടയ്ക്കാന് ഉണ്ടായിരുന്നത്.
