ഇന്ത്യ ഫുട്ബോള് ലോകകപ്പില് കളിക്കുന്ന കാലം വിദൂരമല്ലെന്നും സുനില്ഛേത്രി ലോകകപ്പ് കളിക്കുന്നത് കാണാന് കൊതിക്കുന്നെന്നും ഇന്ത്യന് ക്രിക്കറ്റ് ടീം നായകന് വിരാട് കോഹ്ലി. ലോക ഫുട്ബോളിലെ ഏറ്റവും മികച്ച താരം ക്രിസ്ത്യാനോ റൊണാള്ഡോ ആണെന്നും പ്രതിബദ്ധതയുടേയും കഠിനാദ്ധ്വാനത്തിന്റെയും കാര്യത്തില് അദ്ദേഹം താരതമ്യങ്ങള് ഇല്ലാത്ത താരമാണെന്നും പറഞ്ഞു.
അന്താരാഷ്ട്ര ഫുട്ബോള് സമിതിയുടെ വെബ്സൈറ്റായ ഫിഫാ ഡോട്ട് കോമില് പ്രസിദ്ധീകരിച്ചിരിക്കുന്ന അഭിമുഖത്തിലാണ് ഇന്ത്യന് നായകന്റെ മറുപടി. ക്രിസ്ത്യാനോയാണോ മെസ്സിയാണോ ഏറ്റവും മികച്ച താരമെന്ന ചോദ്യത്തിന് ക്രിസ്ത്യാനോ റൊണാള്ഡോ എന്നാണ് മറുപടി.
റൊണാള്ഡോ എല്ലാവര്ക്കും മുകളില് നില്ക്കുന്ന ഫുട്ബോളിലെ പൂര്ണ്ണതയുള്ള കളിക്കാരനാണെന്നും കോഹ്ലി പറഞ്ഞു. ജോലിയോട് അദ്ദേഹം കാണിക്കുന്ന നൈതീകത അനുപമമാണ്. സഹകളിക്കാരെ പ്രചോദിപ്പിക്കുന്ന അദ്ദേഹത്തെ പോലെ അധികം ആള്ക്കാര് ഉണ്ടാകില്ല. അദ്ദേഹത്തിന്റെ ഈ നേതൃപാടവം താന് ഏറെ ഇഷ്ടപ്പെടുന്നതായും പറഞ്ഞു. ക്രിസ്ത്യാനോയും മെസ്സിയും പ്രായമായി വരികയാണ്. അടുത്ത തലമുറയിലെ പ്രതിഭ കോഹ്ലി കാണുന്നത് ഫ്രാന്സിന്റെ കിലിയന് എംബാപ്പയിലാണ്. 2018 ലോകകപ്പില് അര്ജന്റീനയ്ക്കെതിരേ അദ്ദേഹത്തിന്റെ ഓട്ടം ആര്ക്കാണ് മറക്കാന് കഴിയുകയെന്ന് കോഹ്ലി ചോദിച്ചു.
1998 ലെയും 2002 ലെയും ലോകകപ്പ് കണ്ട ഓര്മ്മയും കോഹ്ലി പങ്കു വെച്ചിട്ടുണ്ട്. ബ്രസീലിന്റെ തേരോട്ടം അവിശ്വസനീയമായിരുന്നു എന്ന് താരംപറഞ്ഞു. ബ്രസീലിന്റെ മുന് താരം റൊണാള്ഡോ മികച്ചു നിന്നതും അദ്ദേഹം ഓര്ത്തു. ഈ വര്ഷത്തിനിടയില് റൊണാള്ഡോ, റൊണാള്ഡീഞ്ഞോ, ഒളിവര് കാന്, ലൂക്കാ മോഡ്രിക്, ഇനിയേസ്റ്റ, സാവി, മെസ്സി, ക്രിസ്ത്യാനോ എന്നിവരുടെയെല്ലാം കളി കണ്ടു. എന്നാല് ക്രിസ്ത്യാനോ ഇവര്ക്കെല്ലാം മുകളിലാണ്. ടീമെന്ന നിലയില് ക്രിസ്ത്യാനോയുടെ സാന്നിദ്ധ്യം കൊണ്ട് പോര്ച്ചുഗലും ഇറ്റാലിയന് ക്ലബ്ബ് യുവന്റസുമാണ് ഇഷ്ടം. ക്രിസ്ത്യാനോ പോകുന്ന ക്ലബ്ബുകള് താന് ഏറെ ഇഷ്ടപ്പെടുമെന്നും പറഞ്ഞു.
ലോകകപ്പില് ഇന്ത്യയുടെ സാധ്യതകള് സംബന്ധിച്ച ചോദ്യത്തിന് അത് ഏറെ വിദൂരമല്ലെന്നും ഒരുപക്ഷേ 2026 എഡീഷനില് ഇന്ത്യ കളിച്ചേക്കുമെന്നും വിരാട് കോഹ്ലി പറഞ്ഞു. അടുത്ത കാലത്ത് ഇന്ത്യന് ഫുട്ബോള് ഏറെ മെച്ചപ്പെട്ടിട്ടുണ്ട്. ലോകകപ്പ് 48 ടീമാക്കുമ്പോള് ഇന്ത്യ കളിക്കും. ഇന്ത്യന് നായകന് സുനില്ഛേത്രി ലോകകപ്പില് കളിക്കാന് അര്ഹതയുള്ള താരമാണ്. ബംഗലുരു എഫ് സി നായകന്റെ അര്പ്പണബോധവും പ്രചോദനവും ലോകകപ്പില് യോഗ്യതനേടാന് ഇന്ത്യന് ടീം ഉപയോഗപ്പെടുത്തണം. കളിക്കാരനായും മനുഷ്യനായും ഛേത്രി മികച്ച വ്യക്തിയാണ്.
ഒരു യഥാര്ത്ഥ ചാമ്പ്യനും മാതൃകയുമായ അദ്ദേഹം രാജ്യാന്തര ടീമിന് വേണ്ടി ചെയ്യുന്ന കാര്യങ്ങള് ഓര്ത്താല് അദ്ദേഹം ലോകകപ്പ് കളിക്കാത്തത് ദു:ഖകരമാണ്. അതേസമയം കഴിഞ്ഞ മൂന്ന് നാലു വര്ഷമായി ഇന്ത്യന് ഫുട്ബോള് ശക്തമായി മെച്ചപ്പെട്ടുകൊണ്ടിരിക്കുകയാണ്. പുതിയ പ്രതിഭകള് വരുന്നത് കാര്യമായ മാറ്റം കൊണ്ടുവരുന്നു. സുനില് ഛേത്രി ടീമിനെ നയിക്കുന്നത് അസാധാരണമായ രീതിയിലാണ്. അടുത്തു തന്നെ ടീം യോഗ്യത നേടും. നിലവില് വെസ്റ്റിന്ഡീസിനെതിരേ ടി 20 മത്സര പരമ്പരയ്ക്കായി കോഹ്ലി ഫ്ളോറിഡയിലാണ്.
