ന്യൂഡല്ഹി: പുല്വാമ ആക്രമണത്തിന് പിന്നാലെ നിയന്ത്രണ രേഖയില് നടന്ന വ്യോമാക്രമണത്തില് പാകിസ്താന് വിമാനം വെടിവെച്ചിട്ട ഇന്ത്യയുടെ വിംഗ് കമാന്റര് അഭിനന്ദന് വര്ദ്ധമാന് വായുസേന വീരചക്രയ്ക്ക് പരിഗണിക്കുന്നു. അഭിനന്ദന് വര്ദ്ധമാന് പുറമേ പാകിസ്താന്റെ ബലാക്കോട്ടേയിലെ ജെയ്ഷ് ഇ മുഹമ്മദ് ക്യാമ്പില് ആക്രമണം നടത്തിയ മിറേജ് 2000 ജെറ്റിന്റെ അഞ്ചു പൈലറ്റുമാര്ക്കും പുരസ്ക്കാരം നല്കും.
ഇന്ത്യന് സൈന്യവുമായി ബന്ധപ്പെട്ട മൂന്നാമത്തെ വലിയ പുരസ്ക്കാരമാണ് വീര്ചക്ര. ഫെബ്രുവരി 14 ന് പുല്വാമയില് സൈനിക വാഹനവ്യൂഹത്തിന് നേരെ ചാവേര് ആക്രമണം നടന്നതിന് പിന്നാലെയുണ്ടായ ഇന്ത്യാ പാക് സംഘര്ഷത്തില് ഫെബ്രുവരി 27 നായിരുന്നു അഭിനന്ദന് വര്ദ്ധമാന് പാക് വിമാനം വെടിവെച്ചിട്ടത്. പിന്നീട് പാക് മണ്ണിലേക്ക് പാര്യച്യൂട്ടില് ഇറങ്ങിയ വര്ദ്ധമാനെ പാക് സേന ജീവനോടെ പിടികൂടിയിരുന്നു.
മൂന്ന് ദിവസത്തിന് ശേഷം ഇന്ത്യയ്ക്ക് തിരികെ കൈമാറുകയും ചെയ്തു. തിരികെയെത്തിയ വര്ദ്ധമാനെ ഇന്ത്യ സാമൂഹ്യ മാധ്യമങ്ങളില് അഭിനന്ദനങ്ങള് കൊണ്ടു പൊതിഞ്ഞു. രാഷ്ട്രീയക്കാര്, നയതന്ത്ര വിദഗദ്ധര്, സെലിബ്രിട്ടികള്, ഇന്ത്യന് ജനത എന്നിവരെല്ലാം ഒരുമിച്ച് രംഗത്ത വരികയും ചെയ്തു.
വ്യോമസേനയുടെ ചരിത്രത്തില് തന്നെ പുതിയ അദ്ധ്യായം എഴുതിചേര്ത്ത സംഭവത്തിന് തൊട്ടു മുമ്പായിരുന്നു ഇന്ത്യ പാകിസ്താനിലെ ബലാക്കോട്ടേയില് നടന്നിരുന്ന ജെയ്ഷെ ഇ മൊഹമ്മദ് ക്യാമ്പില് ആക്രമണം നടത്തിയത്. പുല്വാമയില് ഫെബ്രുവരി 14 ന് നടന്ന ആക്രമണത്തില് 40 ലധികം സിആര്പിഎഫ് ഭടന്മാര്ക്കാണ് ജീവന് നഷ്ടമായതിനുള്ള തിരിച്ചടിയായിട്ടായിരുന്നു ഈ ആക്രമണം.
