തിരുവനന്തപുരം: മുഖ്യമന്ത്രിയുടെ ദുരിതാശ്വാസ നിധിയിലെ തുക ഉപയോഗിച്ച് കുട്ടനാട്ടിലെ 12 പഞ്ചായത്തുകളില്‍ പ്രളയപ്രതിരോധ ശേഷിയുള്ള കമ്മ്യൂണിറ്റി ഷെല്‍ട്ടറുകള്‍ നിര്‍മ്മിക്കാന്‍ മന്ത്രിസഭാ തീരുമാനം. സര്‍ക്കാര്‍ സര്‍വീസില്‍ ഉള്‍പ്പെടെ വനിതകളെ ഡ്രൈവര്‍മാരായി നിയമിക്കാനും മന്ത്രിസഭാ തീരുമാനിച്ചു.
പൊതുമേഖല സ്ഥാപനങ്ങളിലും സര്‍ക്കാര്‍ സര്‍വീസിലും വനിതകളെ ഡ്രൈവര്‍മാരായി നിയമിക്കാനായി നിലവിലെ നിയമന ചട്ടങ്ങളില്‍ ഭേദഗതി വരുത്തും. എല്ലാ മേഖലകളിലും ലിംഗ സമത്വം ഉറപ്പാക്കാനുള്ള സര്‍ക്കാര്‍ തീരുമാനത്തിന്റെ അടിസ്ഥാനത്തിലാണ് പുതിയ നീക്കം.
കഴിഞ്ഞ വര്‍ഷത്തെ പ്രളയസമയത്ത് കെഎസ്എഫ്ഇ ദുരിതാശ്വാസ നിധിയിലേക്ക് നല്‍കിയ 35.99 കോടി രൂപ ഉപയോഗിച്ചാണ് കുട്ടനാട്ടില്‍ കമ്മ്യൂണിറ്റി ഷെല്‍ട്ടറുകള്‍ നിര്‍മ്മിക്കുന്നത്. സഹകരണ വകുപ്പിന്റെ കെയര്‍ഹോം പദ്ധതി മാതൃകയിലാണ് കമ്മ്യൂണിറ്റി ഷെല്‍ട്ടര്‍ ഉയരുന്നത്. ഇതിനുവേണ്ടി റോഡ് സൗകര്യമുള്ള ഒരേക്കര്‍ വീതം സ്ഥലം പഞ്ചായത്തുകള്‍ക്ക് ഉപയോഗിക്കാനും മന്ത്രിസഭ അനുമതി നല്‍കി.
വയനാട് ജില്ലയില്‍ സര്‍ക്കാര്‍ മെഡിക്കല്‍ കോളേജ് സ്ഥാപിക്കുന്നതിന് ചേലോട് എസ്‌റ്റേറ്റിലെ 50 ഏക്കര്‍ ഭൂമി വ്യവസ്ഥകള്‍ക്കു വിധേയമായി ഏറ്റെടുക്കാകനും മന്ത്രിസഭ തീരുമാനിച്ചു. പവര്‍ലൂം തൊഴിലാളികളെ കൂടി കേരള കൈത്തറി തൊഴിലാളി ക്ഷേമനിധി ആക്ടിന്റെ പരിധിയില്‍ കൊണ്ടുവരും. ഇതിനായി നിയമം ഭേദമഗതി ചെയ്യും.
ദേശീയ ഗെയിംസില്‍ കേരളത്തിനു വേണ്ടി വെള്ളി, വെങ്കല മെഡുകള്‍ നേടിയ 83 കായികതാരങ്ങള്‍ക്ക് വിവിധ വകുപ്പുകളില്‍ ജോലി നല്‍കും. ഇതിനായി സൂപ്പര്‍ന്യൂമററി തസ്തികകള്‍ സൃഷ്ടിച്ച് പൊതുഭരണവകുപ്പ് വഴിയാണ് നിയമനം നല്‍കുക. വിവിധ സര്‍ക്കാര്‍ വകുപ്പുകളില്‍ 2014 ജനുവരി മൂന്നിന് മുമ്പ് വിശേഷാല്‍ ചട്ടപ്രകാരം താഴ്ന്ന വിഭാഗം ജീവനക്കാര്‍ക്ക് പത്തു ശതമാനത്തിനുമേല്‍ തസ്തികമാറ്റ നിയമം അനുവദിച്ചിരുന്നത് തുടരാന്‍ തീരുമാനിച്ചു. ഔഷധിയില്‍ കരാര്‍ അടിസ്ഥാനത്തില്‍ ജോലി ചെയ്യുമ്പോള്‍ അപകടം സംഭവിച്ച് വലതു കണ്ണിന്റെ കാഴ്ച നഷ്ടപ്പെട്ട പി.എസ് മനേഷിന് ഇതേ സ്ഥാപനത്തില്‍ ജനറല്‍ വര്‍ക്കര്‍ വിഭാഗത്തില്‍ സ്ഥിരം നിയമനം നല്‍കാനും മന്ത്രിസഭാ തീരുമാനമായി.
Comments