മുഖ്യമന്ത്രിയുടെ ദുരിതാശ്വാസ നിധിയിലേക്കുള്ള ധനസമാഹരണത്തിനായി ഡി.വൈ.എഫ്.ഐ കാട്ടായിക്കോണം മേഖലാ കമ്മിറ്റി നാടന് തട്ടുകട ആരംഭിച്ചു. ഇന്നലെ ആരംഭിച്ച തട്ടുകട മൂന്നു ദിവസത്തേയ്ക്കാണ് പ്രവര്ത്തിക്കുക. ഇവിടെ നിന്നും ലഭിക്കുന്ന തുക മുഖ്യമന്ത്രിയുടെ ദുരിതാശ്വാസ നിധിയിലേക്ക് സംഭാവന ചെയ്യും. നാടിനൊരു കൈത്താങ്ങ് എന്ന പേരില് ആരംഭിച്ച തട്ടുകട മന്ത്രി കടകംപള്ളി സുരേന്ദ്രനാണ് ഉദ്ഘാടനം ചെയ്യ്തത്.
ഒരു തവണ അതിജീവനത്തിന്റെ ചരിത്രം രചിച്ചവരാണ് നമ്മളെന്നും ആരൊക്കെ എങ്ങനൊക്കെ നമ്മളെ തകര്ക്കാന് ശ്രമിച്ചാലും അവര് പരാജയപ്പെടുകയേ ഒള്ളൂ എന്നും ഉദ്ഘാടനം ചെയ്ത് കൊണ്ട് മന്ത്രി കടകം പള്ളി സുരേന്ദ്ര പറഞ്ഞു. മേയര് വി. കെ പ്രശാന്തും ഇന്നലെ തട്ടുകടയിലെത്തിയിരുന്നു. അടുക്കളയുടെ ഉദ്ഘാടനം ദോശ ചുട്ട് നിര്വ്വഹിച്ചത് മേയറാണ്.
'കാതില് അണിഞ്ഞിരുന്ന കമ്മലുകള് ഊരി മുഖ്യമന്ത്രിയെ ഏല്പ്പിച്ച കുട്ടി മുതല് ചിത്രങ്ങള് വരച്ചു നല്കിയിട്ടും പാട്ടുപാടിയുമെല്ലാം ധനസമാഹരണം നടത്തുന്ന ഒട്ടനവധി പേരെ നമുക്ക് കാണുവാന് കഴിയും. ഒരു തവണ അതിജീവനത്തിന്റെ ചരിത്രം രചിച്ചവരാണ് നമ്മള്. ആരൊക്കെ എങ്ങനൊക്കെ നമ്മളെ തകര്ക്കാന് ശ്രമിച്ചാലും അവര് പരാജയപ്പെടുകയേ ഒള്ളൂ' മന്ത്രി കടകംപള്ളി അറിയിച്ചു.
തെങ്ങുവിള ദേവീക്ഷേത്രത്തിന്റെ ഉത്സവകമ്മിറ്റി ഓഫീസിലാണ് തട്ടുകട ഒരുക്കിയിരുന്നത്. ഡി.വൈ.എഫ്.ഐ പ്രവര്ത്തകരുടെ ഉദ്ദേശശുദ്ധി കണക്കിലെടുത്ത് ഉത്സവ കമ്മിറ്റി ഓഫീസില് തട്ടുകട നടത്താന് അമ്പലക്കമ്മിറ്റി അനുവദിക്കുകയായിരുന്നു. ഭക്ഷണം കഴിക്കുന്നതിന് ബില് നല്കുന്ന രീതി ഇവിടെയില്ല. കഴിക്കാന് വരുന്നവര് അവിടെ വച്ചിരിക്കുന്ന ബക്കറ്റില് ഇഷ്ടമുള്ള തുക നിക്ഷേപിച്ചാല് മതിയാകും. ഇനി ഇട്ടില്ലെങ്കിലും കുഴപ്പമില്ലെന്നാണ് മേഖല സെക്രട്ടറി സെബിന് പറഞ്ഞത്.
മേഖലാ കമ്മിറ്റി അംഗങ്ങളുടെ വിഹിതമാണ് ഇവരുടെ പ്രവര്ത്തന മൂലധനം. ഇത് ഉപയോഗിച്ച് മേഖലയില് മൂന്ന് ദിവസങ്ങളിലായി തട്ടുകട നടത്തിയാണ് ഫണ്ട് സമാഹരണം. ദുരിതാശ്വാസ നിധിയിലേക്ക് നല്കുന്നതിനോടൊപ്പം വിശക്കുന്നവര്ക്ക് ആഹാരം നല്കുക എന്നൊരു ഉദ്ദേശം കൂടി അവര്ക്കുണ്ടെന്നാണ് മേഖലാ പ്രസിഡന്റ് പ്രവീണ് പറയുന്നത്.
