ബംഗളുരു: ചാന്ദ്രയാന് രണ്ടിന്റെ ഭാഗമായി ചന്ദ്രോപരിതലത്തില് ഇറങ്ങാനൊരുങ്ങിയ വിക്രം ലാന്ഡറിന്റെ സോഫ്റ്റ് ലാന്ഡിങ്ങില് അനിശ്ചിതത്വം. ചന്ദ്രന്റെ ഉപരിതലത്തില് നിന്നു 2.1 കിലോമീറ്റര് ഉയരെ വിക്രം ലാന്ഡറും ചന്ദ്രയാന് രണ്ടിന്റെ നിയന്ത്രണം ഏകോപിപ്പിക്കുന്ന ബെംഗളൂരുവിലെ പീനിയ ഐ.എസ്.ആര്.ഒ. ടെലിമെട്രി, ട്രാക്കിങ് ആന്ഡ് കമാന്ഡ് നെറ്റ്വര്ക്ക് കേന്ദ്രവുമായുള്ള ബന്ധം നഷ്ടമായി.
ഇന്നു പുലര്ച്ചെ 1:38.03-ന് ആരംഭിച്ച നിര്ണായക ലാന്ഡിങ് പ്രക്രിയ മൂന്നു ഘട്ടങ്ങള് പിന്നിട്ട് ഫൈന് ബ്രേക്കിങ്ങില് എത്തിയിരുന്നു. ഓര്ബിറ്ററില് നിന്നു നേരത്തെ വേര്പെട്ട വിക്രം ലാന്ഡര് ഒടുവില് വിവരം ലഭിക്കുമ്പോള് ചന്ദ്രന്റെ 2.1 കിലോമീറ്റര് അരികെയാണ്.പുലര്ച്ചെ മൂന്നു മണിയോടെയും സിഗ്നല് ലഭ്യമായിട്ടില്ല. അവസാന നിമിഷം വരെ കാര്യങ്ങള് അനുകൂലമായിരുന്നെന്നും സിഗ്നല് നഷ്ടമായതോടെ ഫൈന് ബ്രേക്കിങ് ഘട്ടത്തിലേക്കു കടക്കാനായില്ലെന്നും ഐ.എസ്.ആര്.ഒ. തലവന് കെ. ശിവന് പറഞ്ഞു. വിവരങ്ങള് പരിശോധിച്ചു വരികയാണെന്ന ഐഎസ്ആര്ഒ ചെയര്മാന് പറഞ്ഞു. പിന്തുണച്ച എല്ലാവര്ക്കും നന്ദി പറയുകയും കൂടുതല് വിശകലനം ആവശ്യമാണെന്ന് വ്യക്തമാക്കുകയും ചെയ്തിട്ടുണ്ട്.
ഇന്ന് നടത്താനിരുന്ന വാര്ത്താസമ്മേളനവും ഐഎസ്ആര്ഒ ചെയര്മാന് റദ്ദാക്കി. അതേസമയം ശാസ്ത്രജ്ഞരുടെ ഇതുവരെയുള്ള നേട്ടത്തില് പിന്തുണയുമായി രാജ്യം ഒന്നടങ്കം എത്തിയിട്ടുണ്ട്. ചാന്ദ്രയാന് ശാസ്ത്രജ്ഞരെ അഭിനന്ദിച്ച് രാഷ്ട്രപതിയും പ്രധാനമന്ത്രിയും രാഹുല്ഗാന്ധിയൂം എത്തി. ഇതുവരെ ഉള്ളത് അഭിമാനകരമായ നേട്ടമാണെന്നും നിരാശപ്പെടേണ്ടതില്ലെന്നും ധൈര്യത്തോടെ മുമ്പോട്ട് പോകാനുമാണ് ആഹ്വാനം.
ഐഎസ്ആര്ഒ യെക്കുറിച്ച് രാജ്യത്തിന് അഭിമാനമാണെന്ന് രാഷ്ട്രപതി പറഞ്ഞു. ഇതുവരെയുള്ള ശാസ്ത്രജ്ഞരുടെ പ്രവര്ത്തനങ്ങള് അഭിമാനാര്ഹമാണെന്നും അദ്ദേഹം വ്യക്തമാക്കി. ശാസ്ത്രജ്ഞരുടെ ധൈര്യത്തെയും സമര്പ്പണത്തെയും രാഷ്ട്രപതി അഭിനന്ദിച്ചു. ശാസ്ത്രജ്ഞരുടെ പ്രവര്ത്തനത്തില് രാജ്യം അഭിമാനിക്കുന്നതായി പ്രധാനമന്ത്രിയും പറഞ്ഞു. ഇതുവരെയുള്ള പ്രവര്ത്തനങ്ങള് മികച്ചതായിരുന്നെന്നും ഉയര്ച്ചയും താഴ്ചയും സ്വാഭാവികമാണെന്നും കൈവരിച്ച നേട്ടങ്ങള് ചെറുതല്ലെന്നും അദ്ദേഹം പറഞ്ഞു. ധൈര്യമായിരിക്കാന് ശാസ്ത്രജ്ഞരോട് മോഡി ആവശ്യപ്പെട്ടു. രാവിലെ എട്ടുമണിക്ക് പ്രധാനമന്ത്രി രാജ്യത്തെ അഭിസംബോധന ചെയ്യുന്നുണ്ട്. ശാസ്ത്രജ്ഞരെ അഭിനന്ദിച്ച് രാഹുല്ഗാന്ധിയും രംഗത്തു വന്നിരുന്നു.
റഫ് ബ്രേക്കിങ് ഘട്ടവും വിജയകരമായി പൂര്ത്തിയാക്കിയ ശേഷം ഫൈന് ബ്രേക്കിങ് ഘട്ടത്തിലാണ് ദൗത്യം. എന്നാല് ഇസ്രോ നേരത്തെ കരുതിയ ദിശയില് നിന്ന് അല്പം മാറിയാണ് വിക്രം ലാന്ഡിങ്ങിനു തയാറെടുക്കുന്നതെന്നാണ് ഒടുവില് വിവരം ലഭിച്ചത്. ചന്ദ്രന് 2.1 കിലോമീറ്റര് അകലെയെത്തിയ വിക്രത്തില് നിന്നു ഇസ്രോ കേന്ദ്രത്തിലേക്ക് പിന്നീട് സന്ദേശം ലഭിക്കാതാകുകയായിരുന്നു. 2.10 കിലോമീറ്റര് മുകളില് വരെ സന്ദേശം ലഭിച്ചിരുന്നെന്നും പിന്നീട് ആശയവിനിമയം സാധ്യമായില്ലെന്നും അതു പരിശോധിച്ചു വരികയാണെന്നും ഐ.എസ്.ആര്.ഒ. അറിയിച്ചു. 15 മിനിറ്റ് നീണ്ട സങ്കീര്ണമായ പ്രവര്ത്തനങ്ങള്ക്കൊടുവിലാണ് വിക്രം ലാന്ഡിങ്ങിന്റെ അവസാന ഘട്ടത്തില് എത്തിയത്.
കുറഞ്ഞ ഗുരുത്വാകര്ഷണം, അന്തരീക്ഷമില്ലായ്മ, വേഗനിയന്ത്രണം...ഭൂമിയില്നിന്നുള്ള നിയന്ത്രണമില്ലാതെ സോഫ്്റ്റ്വേര് സഹായത്തോടെ ഇവയെല്ലാം ലാന്ഡര് വിക്രം പൂര്ത്തിയാക്കി. മണിക്കൂറില് 6,000 കിലോമീറ്റര് വേഗത്തില് പാഞ്ഞ വിക്രം, വെറും 18 മിനിറ്റില് അതു കുറച്ചുകൊണ്ടുവന്നു. നാല് എന്ജിനുകള് പ്രവര്ത്തിപ്പിച്ചായിരുന്നു ആദ്യഘട്ടം. അപ്പോള് ഇറങ്ങേണ്ട സ്ഥലം വിക്രത്തില്നിന്ന് 587 കിലോമീറ്റര് അകലെയായിരുന്നു. ചന്ദ്രനുമായുള്ള അകലം 30 കിലോമീറ്ററായി ചുരുക്കി. ലാന്ഡിങ് സ്ഥലം തേടിയുള്ള 'അലച്ചിലി'നിടെയാണ് 2.1 കിലോമീറ്റര് അകലെ വച്ചു ആശയവിനിമയം നഷ്ടമായത്.
