ന്യൂഡല്ഹി: കശ്മീര് അസം വിഷയങ്ങളില് ഇന്ത്യയ്ക്കെതിരെ വിമര്ശനവുമായി യു.എന് മനുഷ്യാവകാശ കമ്മീഷന്. കശ്മീരിന്റെ പ്രത്യേക പദവി എടുത്തു കളഞ്ഞതിനു ശേഷം പ്രദേശത്ത് ഏര്പ്പെടുത്തിയ വിലക്കുകളും മനുഷ്യാവകാശ ലംഘനങ്ങളും ആശങ്ക പുലര്ത്തുന്നുണ്ടെന്നാണ് കൗണ്സില് അറിയിച്ചത്. ഒപ്പം അസമില് പൗരത്വ പട്ടികയില് നിന്നും പുറത്താക്കപ്പെട്ടവര്ക്ക് മുമ്പുണ്ടായിരുന്ന എല്ലാ അവകാശങ്ങളും തുടര്ന്നും ലഭിക്കുമെന്നും കൗണ്സില് അറിയിച്ചു.
യു.എന് മനുഷ്യാവകാശ കൗണ്സിലിന്റെ കമ്മീഷ്ണറായ മിഷേല് ബാച്ച്ലെറ്റാണ് ഇക്കാര്യം അറിയിച്ചത്. കൗണ്സിലിന്റെ യോഗത്തിലാണ് തീരുമാനം അറിയിച്ചത്. കശ്മീരിന്റെ ഈ അവസ്ഥയില് ആശങ്കയുണ്ടെന്നും കശ്മീരിലെ ജനങ്ങളുടെ അവകാശങ്ങള് സംരക്ഷിക്കുന്നതില് ഇന്ത്യയും പാക്കിസ്ഥാനും ശ്രദ്ധിക്കണമെന്നും പറഞ്ഞ ബാച്ലെറ്റ് കശ്മീരില് ഏര്പ്പെടുത്തിയ എല്ലാ വിലക്കുകളും എടുത്ത് കളയണമെന്ന് ഇന്ത്യയോട് പ്രത്യേകമായി നിര്ദേശിച്ചു. ഒപ്പം കശ്മിരിന്റെ വിഷയത്തില് ഇന്ത്യ ഒരു തീരുമാനമെടുക്കുമ്പോള് കശ്മീരികളുടെ അഭിപ്രായത്തിനും സ്ഥാനമുണ്ടാകേണ്ടതാണെന്ന് എന്നും പറഞ്ഞു.
അസമിലെ 19 ലക്ഷത്തോളം പേര് നിയമ വ്യാഖ്യാനങ്ങള് കൊണ്ട് മാത്രം വിദേശിയാകുന്നില്ല. മുന്പ് ലഭിച്ചിരുന്ന എല്ലാ അവകാശങ്ങള്ക്കും അവര് ഇപ്പോഴും അര്ഹരാണ്. എന്നാണ് അസമിലെ എന്.ആര്.സി പട്ടികയില് ഉള്പ്പെടാതിരുന്നവരെ ഉദ്ദേശിച്ചുകൊണ്ട് കൗണ്സില് പറഞ്ഞത്.
അതേസമയം കശ്മീര് വിഷയം യു.എന് സുരക്ഷാ സമിതിയില് ചര്ച്ചയായപ്പോള് ഇത് ഇന്ത്യയുടെ ആഭ്യന്തരകാര്യമാണെന്നാണ് ഇന്ത്യ അറിയിച്ചത്. വിഷയത്തില് ഇന്ത്യയ്ക്കും പാക്കിസ്ഥാനും ഇടയില് മധ്യസ്ഥത വഹിക്കാന് തയ്യാറാണെന്ന് ഡോണാള്ഡ് ട്രംപ് അറിയിച്ചപ്പോഴും ഇന്ത്യ ഇതേ നിലപാടായിരുന്നു ആവര്ത്തിച്ചത്.
