പിന്നണി ഗായകന് ബിജു നാരായണന്റെ ഭാര്യ ശ്രീലത നാരായണന്റെ വിയോഗവാര്ത്ത മലയാളി സംഗീതാസ്വാദകരെ സങ്കടപ്പെടുത്തുന്നതായിരുന്നു. പത്ത് വര്ഷത്തെ പ്രണയത്തിനു ശേഷം 1998 ജനുവരി 23 ന് ബിജു നാരായണനും ശ്രീലതയും വിവാഹിതരാകുന്നത്. എറണാകുളം മഹാരാജാസ് കോളേജില് ഒന്നിച്ച് പഠിച്ചവരാണ് ഇരുവരും. ക്യാന്സര് ബാധിതയായ ഭാര്യയ്ക്ക് രോഗം മൂര്ഛിച്ചതോടെ സ്റ്റേജ് ഷോകളും പാട്ടുകളും തന്റെ എല്ലാ തിരക്കുകളും മാറ്റിവെച്ച് ശ്രീലതയുടെ അരികില് തന്നെയുണ്ടായിരുന്നു ബിജു. വിടപറഞ്ഞ പ്രിയപത്നിയുടെ വേര്പാടില് മനസ് തുറക്കുകയാണ് ബിജു നാരായണന്.
''ശ്രീ എന്നെ പിരിഞ്ഞെന്ന് തോന്നുന്നേയില്ല. ചടങ്ങുകള് കഴിഞ്ഞു ഈ വീടിന്റെ ഏകാന്തതയിലേക്ക് വന്നപ്പോള് ഇവിടെ പലയിടത്തും ശ്രീയുടെ സാന്നിധ്യം എനിക്ക് നേരിട്ടനുഭവപ്പെടും പോലെ തോന്നി. ശ്രീ എന്റെ ജീവിതപങ്കാളിയും, ആത്മ സുഹൃത്തുമായിരുന്നു. എന്റെ എല്ലാ കാര്യങ്ങളും നോക്കിയിരുന്നത് ശ്രീയാണ്. മാര്ച്ച് മാസത്തില് ശ്രീയുടെ രോഗത്തിന് കുറവ് വന്നപ്പോള് അവള് രണ്ടു ആഗ്രഹങ്ങള് പറഞ്ഞു. എസ്പി ബാലസുബ്രഹ്മണ്യത്തിന്റെ സംഗീത പ്രോഗ്രാമില് പങ്കെടുക്കണം. പിന്നെ ഞങ്ങള് രണ്ടുപേരും മാത്രമായി ഒരു യാത്ര പോകണം. കുടുംബസമേതം ഞങ്ങള് ഒരുപാട് യാത്രകള് പോകാറുണ്ടായിരുന്നു.
'ഇത്തവണ നിങ്ങളെ കൂട്ടാതെ ഞാനും അച്ഛനും മാത്രമായി ഒരു യാത്ര പോകും'. ശ്രീ മക്കളോട് പറയുകയും ചെയ്തു. പോളണ്ടിലേക്ക് ഒരു യാത്ര പോകണമെന്ന് ഞാനും പ്ലാന് ചെയ്യുകയായിരുന്നു. പക്ഷെ ഒരിക്കലും സാധിക്കാത്ത മോഹങ്ങളായി മാറി അത് രണ്ടും'. വീട്ടിലെ ഒരു കാര്യം പോലും ഞാനറിഞ്ഞിരുന്നില്ല. ഞങ്ങളുടെ രണ്ടുപേരുടെയും വീട്ടുകാര്യങ്ങള് അറിഞ്ഞു ചെയ്തുകൊണ്ടിരുന്നത്, എന്റെ ബാങ്ക് അക്കൗണ്ട് പോലും കൈകാര്യം ചെയ്തു കൊണ്ടിരുന്നത്. എല്ലാം ശ്രീയായിരുന്നു.'- ബിജു പറയുന്നു. സിദ്ധാര്ത്ഥ്, സൂര്യനാരായണന് എന്നീ രണ്ട് ആണ്മക്കളാണ് ഇരുവര്ക്കും.
