ന്യൂഡല്ഹി: ഹിന്ദി ഭാഷ അടിച്ചേല്പ്പിക്കുന്നുവെന്ന വിവാദത്തില് പ്രതികരണവുമായി ഉപരാഷ്ട്രപതി വെങ്കയ്യ നായിഡു. ഏതെങ്കിലും ഭാഷ അടിച്ചേല്പ്പിക്കാനില്ലെന്ന് ഉപരാഷ്ട്രപതി പറഞ്ഞു. ഏതെങ്കിലും ഭാഷയോട് പ്രത്യേക എതിര്പ്പോ ഇല്ല. സാധിക്കുന്ന അത്ര ഭാഷ പഠിക്കുന്നത് നല്ലതാണെന്നും ഉപരാഷ്ട്രപതി പറഞ്ഞു. കര്ണാടകയിലെ ഒരു സ്കൂളിലെ വിദ്യാര്ത്ഥികളുമായി സംവദിക്കവെയാണ് ഉപരാഷ്ട്രപതി നിലപാട് വ്യക്തമാക്കിയത്.
യു.എസ് ബഹിരാകാശ ഏജന്സിയായ നാസ സന്ദര്ശിച്ച് മടങ്ങി വന്ന വിദ്യാര്ത്ഥികളുമായാണ് രാഷ്ട്രപതി സംവദിച്ചത്. മാതൃഭാഷയ്ക്ക് പ്രാധാന്യം നല്കുന്നതിനോടൊപ്പം മറ്റ് ഭാഷകളും പഠിക്കണമെന്ന് ഉപരാഷ്ട്രപതി ആവശ്യപ്പെട്ടു. പഠിക്കാനും പുതിയ അനുഭവങ്ങള് നേടാനും യാത്ര സഹായിക്കുമെന്ന് പറഞ്ഞ ഉപരാഷ്ട്രപതി ഇന്ത്യയിലെ പ്രധാനപ്പെട്ട ടൂറിസ്റ്റ് കേന്ദ്രങ്ങളെല്ലാം സന്ദര്ശിക്കാന് വിദ്യാര്ത്ഥികള് ശ്രമിക്കണമെന്നും ഓര്മ്മിപ്പിച്ചു.
ചരിത്രപ്രാധാന്യവും സാംസ്കാരിക പ്രാധാന്യവുമുള്ള സ്ഥലങ്ങള് സന്ദര്ശിക്കണമെന്ന് രാഷ്ട്രപതി വിദ്യാര്ത്ഥികളോട് ആവശ്യപ്പെട്ടു. ഇത്തരം സന്ദര്ശനങ്ങളിലൂടെ അറിവ് വര്ദ്ധിക്കുകയും ഭൂതതകാലത്തേക്കുറിച്ചുള്ള കാഴ്ചപ്പാട് ലഭിക്കുകയും ചെയ്യുമെന്നും ഉപരാഷ്ട്രപതി വിദ്യാത്ഥികളെ ഓര്മ്മിപ്പിച്ചു. പ്രകൃതിയില് സമയം ചെലവഴിക്കണമെന്നും പ്രകൃതിയെ സംരക്ഷിക്കാന് ശ്രമിക്കണമെന്നും അദ്ദേഹം ഓര്മ്മിപ്പിച്ചു.
പ്ലാസ്റ്റിക്കിന്റെ ഉപയോഗം നിര്ത്തുമെന്ന് ഒക്ടോബര് രണ്ടിന് പ്രതിജ്ഞയെടുക്കണമെന്ന് വിദ്യാര്ത്ഥികളോട് ഉപരാഷ്ട്രപതി ആവശ്യപ്പെട്ടു. കുടാതെ വിദ്യാഭ്യാസ സമ്പ്രദായം ഉടച്ചുവാര്ക്കണമെന്നും വിദ്യാര്ത്ഥികളുടെ ആശയവിനിമയ ശേഷിയും ക്രിയാത്മക ചിന്തയും പരിപോഷിപ്പിക്കുന്ന വിധത്തിലായിരിക്കണം വിദ്യാഭ്യാസ സമ്പ്രദായത്തിന്റെ ഉടച്ചുവാര്ക്കലെന്നും ഉപരാഷ്ട്രപതി കൂട്ടിച്ചേര്ത്തു.
