പിലിഭിറ്റ്(യുപി): സ്ത്രീധനം കുറഞ്ഞ് പോയെന്ന് ആരോപിച്ച് യുവതിയോട് ഭര്ത്താവിന്റെയും കുടുംബത്തിന്റെയും കൊടും ക്രൂരത. മണ്ണെണ്ണ ഒഴിച്ച് പ്രതികള് യുവതിയെ ജീവനോടെ കത്തിച്ച് കൊലപ്പെടുത്താന് ശ്രമിച്ചു. 90 ശതമാനം പൊള്ളലേറ്റ യുവതി ആശുപത്രിയില് അത്യാഹിത വിഭാഗത്തിലാണ്. ഉത്തര്പ്രദേശിലെ പിലിഭിറ്റിലുള്ള ബാറി ഗ്രാമത്തിലാണ് സംഭവം ഉണ്ടായത്. ന്യൂറിയ പോലീസ് സ്റ്റേഷന് പരിധിയിലാണ് കൊടും ക്രൂരത അരങ്ങേറിയത്. സംഭവത്തില് പ്രതികളായ ഭര്ത്താവ് ഉള്പ്പെടെയുള്ള ആറ് പേര്ക്കെതിരെ പോലീസ് എഫ്.ഐ.ആര് റജിസ്റ്റര് ചെയ്തു.
അഞ്ച് മാസങ്ങള്ക്ക് മുമ്പാണ് തന്റെ മകള് രാജ്കുമാരിയും ധര്മ് പ്രകാശും തമ്മിലുള്ള വിവാഹം നടന്നതെന്നും ധര്മ് പ്രകാശിന്റെ ആവശ്യപ്രകാരം എല്ലാ സ്ത്രീധന മാനദണ്ഡങ്ങളും പാലിച്ചായിരുന്നു വിവാഹമെന്നും യുവതിയുടെ പിതാവ് ആനന്ദ് കുമാര് പറഞ്ഞു. വിവാഹത്തിന് ശേഷും രണ്ട് ലക്ഷം രൂപകൂടി സ്ത്രീധനമായി വേണമെന്ന് ധര്മ് പ്രകാശും വീട്ടുകാരും ആവശ്യപ്പെടുകയായിരുന്നു. ഇക്കാര്യം ആവശ്യപ്പെട്ട് മകളെ ശാരീരികമായും മാനസികമായും ഇവര് പീഡിപ്പിച്ചിരുന്നെന്നും ആനന്ദ് കുമാര് പറഞ്ഞു. വെള്ളിയാഴ്ച രാത്രി ഭര്ത്താവും ബന്ധുക്കളും ചേര്ന്ന് രാജ്കുമാരിയുടെ ശരീരത്തില് മണ്ണെണ്ണ ഒഴിച്ച ശേഷം കത്തിക്കുകയായിരുന്നെന്നും അദ്ദേഹം പോലീസിന് നല്കിയ പരാതിയില് പറഞ്ഞു.
സംഭവവുമായി ബന്ധപ്പെട്ട് രാജ്കുമാരിയുടെ ഭര്ത്താവ് ധര്മ് പ്രകാശ്, ഇളയ സഹോദരന് സഞ്ചീവ് കുമാര്, പിതാവ് ദയ റാം, അമ്മ കമല ദേവി, സഹോദരി സുനിത, സുനിതയുടെ ഭര്ത്താവ് മനോജ് എന്നിവര്ക്കെതിരെ കേസെടുത്തു. പ്രതികള് ഒളിവിലാണെന്നും ഉടന് പിടിയിലാകുമെന്നും പോലീസ് വ്യക്തമാക്കി.
