തിരുവനന്തപുരം : വട്ടിയൂര്ക്കാവ് ഉപതെരഞ്ഞെടുപ്പില് തിരുവനന്തപുരം മേയര് വി.കെ പ്രശാന്ത് എല്.ഡി.എഫ് സ്ഥാനാര്ത്ഥിയാകുമെന്ന് റിപ്പോര്ട്ട്. ചൊവ്വാഴ്ച നടക്കുന്ന സംസ്ഥാന സെക്രട്ടേറിയേറ്റില് ഇതുസംബന്ധിച്ച അന്തിമ തീരുമാനം ഉണ്ടായേക്കും. സിപിഎം ജില്ലാ സെക്രട്ടേറിയറ്റാണ് പ്രശാന്തിനെ സ്ഥാനാര്ത്ഥിയാക്കാന് ശിപാര്ശ ചെയ്തിരിക്കുന്നത്.
മേയര് എന്ന നിലയ്ക്കുള്ള മികച്ച പ്രവര്ത്തനവും യുവനേതാവ് എന്ന നിലയ്ക്കുള്ള പരിഗണനയുമാണ് വി.കെ പ്രശാന്തിനെ സ്ഥാനാര്ത്ഥിയായി പരിഗണിക്കാന് കാരണം. സാമുദായിക സമവാക്യങ്ങള് നോക്കാതെ ഒരു പരീക്ഷണമെന്ന നിലയില് പ്രശാന്തിനെ മത്സരിപ്പിക്കണമെന്ന ആവശ്യമാണ് ജില്ലാ സെക്രട്ടേറിയേറ്റില് ഉയര്ന്നത്.
ഈ വര്ഷം പ്രളയം ഉണ്ടായപ്പോള് സഹായം എത്തിക്കാനുള്ള സാധന സാമഗ്രഹികള് എത്തിച്ചതിന്റെ പേരില് വലിയ അഭിനന്ദന പ്രവാഹമാണ് പ്രശാന്തിന് ലഭിച്ചത്. യുവജനങ്ങള്ക്കിടയില് പ്രശാന്തിന് നല്ല പിന്തുണയുള്ളതിനാല് മികച്ച പ്രകടനം കാഴ്ചവെക്കാന് കഴിയുമെന്നാണ് നേതൃത്വം കരുതുന്നത്. ജില്ലാ സെക്രട്ടേറിയേറ്റ് ഒന്നാമതായി നല്കിയിരിക്കുന്നത് വി.കെ പ്രശാന്തിന്റെ പേരും രണ്ടാമത് തിരുവനന്തപുരം ജില്ലക പഞ്ചായത്ത് പ്രസിഡന്റ് വി.കെ മധുവിന്റെ പേരുമാണ്.
