കോഴിക്കോട്: എലത്തൂരിലെ ഓട്ടോ ഡ്രൈവര് രാജേഷിന്റെ മരണ കാരണം ഗുരുതരമായ പൊള്ളലെന്ന് പോസ്റ്റ്മോര്ട്ടം റിപ്പോര്ട്ട്. സി.പി.എം പ്രവര്ത്തകര് മര്ദ്ദിച്ചതാണ് മരണകാരണമെന്ന് കുടുംബവും ബി.ജെ.പി നേതൃത്വവും ആരോപിച്ചിരുന്നു. എന്നാല് തീപ്പൊള്ളലേറ്റതിനെ തുടര്ന്നുണ്ടായ അണുബാധയാണ് മരണകാരണമെന്ന് പോസ്റ്റ്മോര്ട്ടത്തില് കണ്ടെത്തി.
ഈ മാസം 22നാണ് രാജേഷ് മരിച്ചത്. എലത്തൂര് സ്റ്റാന്ഡില് ഓട്ടോ ഓടിക്കുന്നതുമായി ബന്ധപ്പെട്ട് സി.പി.എം പ്രവര്ത്തകരുമായി സംഘര്ഷമുണ്ടായിരുന്നു. ഇതില് മനംനൊന്ത് രാജേഷ് തീകൊളുത്തി ആത്മഹത്യയ്ക്ക് ശ്രമിക്കുകയായിരുന്നു. തുടര്ന്ന് ചികിത്സയില് കഴിയവെ രാജേഷ് മരണത്തിന് കീഴടങ്ങി.
എലത്തൂരിലെ ബി.ജെ.പി പ്രവര്ത്തകന് കൂടിയാണ് രാജേഷ്. ഇയാളുടെ മരണം രാഷ്ട്രീ വിവാദമായിരുന്നു. സി.പി.എം പ്രവര്ത്തകരുടെ മര്ദ്ദനത്തെ തുടര്ന്നാണ് രാജേഷ് മരിച്ചതെന്ന് രാജേഷിന്റെ കുടുംബവും ബി.ജെ.പിയും ആരോപിച്ചിരുന്നു. ബി.ജെ.പി പ്രവര്ത്തകര് രാജേഷിന്റെ മൃതദേഹവുമായി എലത്തൂര് പോലീസ് സ്റ്റേഷന് ഉപരോധിക്കുകയും ചെയ്തിരുന്നു.
