ഹൈദരാബാദ്: ലൗജിഹാദിലൂടെ ഹിന്ദു പെണ്കുട്ടികളെ വശീകരിച്ചു പിടിച്ചു കൊണ്ടുപോകുമെന്ന ഭീതിയില് നവരാത്രി ആഘോഷങ്ങളില് അഹിന്ദുക്കളെ പുറത്താക്കാന് ബജ്റംഗദള് നിര്ദേശം. തെലുങ്കാനയിലാണ് വിവാദ നിര്ദേശം ഉയര്ന്നിരിക്കുന്നത്. കഴിഞ്ഞ തവണ നടന്ന ആഘോഷങ്ങളില് പങ്കെടുക്കാനെത്തിയ അഹിന്ദുക്കള് ഹിന്ദു പെണ്കുട്ടികളോട് മോശമായി പെരുമാറിയെന്നും ആരോപിക്കുന്നു.
ആഘോഷങ്ങളില് പങ്കെടുക്കാനെന്ന പേരില് വേദിയില് പ്രവേശിക്കുന്ന അഹിന്ദുക്കളായ യുവാക്കള് ഹിന്ദു പെണ്കുട്ടികളെ വശീകരിച്ച് ലൗജിഹാദിലേക്കു നയിക്കുന്നു എന്നാണ് ന്യായീകരണം. ആഘോഷത്തിനായി എത്തുന്നവരുടെ ആധാര് വിവരങ്ങള് പ്രവേശന കവാടത്തില് തന്നെ പരിശോധന നടത്തണമെന്നും അഹിന്ദുക്കളായി എത്തിയവരെ കൈകകാര്യം ചെയ്യാന് സംവിധാനം ഒരുക്കിയിട്ടുണ്ടെന്നും കത്തില് പറഞ്ഞിട്ടുണ്ട്.
അഹിന്ദുക്കളായി പ്രവേശിക്കുന്നവരുടെ വിവരം ഉടന് അറിയിക്കണമെന്നും നിര്ദേശത്തില് പറയുന്നു. നവരാത്രി ആഘോഷങ്ങളുടെ ഭാഗമായ ദണ്ഡിയ, ഗര്ഭ നൃത്തങ്ങള് സംഘടിപ്പിക്കുന്ന എല്ലാ സംഘാടകര്ക്കും ബജ്റംഗദള് കത്ത് നല്കിയിട്ടുണ്ട്. അഹിന്ദുക്കള് വരുന്നത് ഭക്തി കൊണ്ടല്ല സുന്ദരികളായ ഹിന്ദു സ്ത്രീകളെ കാണാനും അപമാനിക്കാനും അവരെ ലവ് ജിഹാദ് പോലെയുള്ള കെണികളില് പെടുത്താനുമാണെന്ന് പറയുന്നു.
അനാവശ്യ സാഹചര്യം ഉണ്ടാക്കാതിരിക്കാന് സംഘാടകരും വേദിയുടെ ഉടമകളും കര്ശന നടപടി സ്വീകരിക്കാനും പറഞ്ഞിട്ടുണ്ട്. രണ്ടു വര്ഷം മുമ്പ് അഹിന്ദുക്കളായ യുവാക്കള് പരിപാടിയില് പ്രവേശിച്ച് അതിന്റെ ആത്മീയ പരിവേഷം കണക്കിലെടുക്കാതെ ദണ്ഡിയ ഗര്ഭാ നൃത്തക്കാരികളോട് മോശമായി പെരുമാറിയെന്നും പെണ്കുട്ടികളെ രക്ഷിക്കാനെത്തയ യുവാക്കളെ പോലും കയ്യേറ്റം ചെയ്തതായും പറയുന്നു.
നിഷ്ക്കളങ്കയായ പെണ്കുട്ടികളെ ലവ് ജിഹാദില് പെടുത്തുകയാണ് ഇവരുടെ പതിവ്. ദണ്ഡിയയും ഗര്ഭയുമെല്ലാം ഹിന്ദുക്കള് അവരുടെ ഭക്തി പ്രകടിപ്പിക്കുന്ന ആത്മീയ കലാരൂപങ്ങളാണ്. ഹിന്ദു ദൈവങ്ങളിലും അവരുടെ പൂജയിലും വിശ്വാസമില്ലാത്തവര്ക്ക് ഇതില് എന്തുകാര്യം? അത്തരക്കാര് വരുന്നത് തന്നെ ഈ ദൈവങ്ങളെ അപമാനിക്കാനല്ലേയെന്ന് ബജ്രംഗദളിന്റെ മാധ്യമ കണ്വീനര് പറയുന്നു.
ബജ്രംഗദളിന്റെ ആരോപണം ഹൈദരാബാദ് പോലീസ് തള്ളിയിട്ടുണ്ട്. ഇത് തെറ്റായ ആരോപണമാണ്. നവരാത്രി ആഘോഷത്തില് ഇതുവരെ കുഴപ്പം ഉണ്ടായിട്ടില്ലെന്നും ഇക്കാര്യത്തില് ആരെങ്കിലും പരാതി നല്കുകയോ മറ്റോ ചെയ്തിട്ടില്ലെന്നും പോലീസ് പറയുന്നു. കഴിഞ്ഞ രണ്ടുവര്ഷമായി അഹിന്ദുക്കള് വരാറുണ്ടെന്നും അവര് സ്ത്രീകളോടു മോശമായി പെരുമാറാറുണ്ടെന്നും കത്തില് ആരോപിക്കുന്നുണ്ട്.
ആഘോഷങ്ങളുടെ പശ്ചാത്തലത്തില് ഹരിയാനയിലെ ഗുരുഗ്രാമില് ഹിന്ദുത്വ സംഘടനയായ സംയുക്ത് ഹിന്ദു സംഘര്ഷ് സമിതി ഇറച്ചിക്കടകള് നിര്ബന്ധപൂര്വം അടപ്പിച്ചിരുന്നു. 2017-ല് പൊലീസ് സംരക്ഷണം നല്കുമെന്ന ഉറപ്പില് തുറന്ന 300 കടകള് ശിവസേന അടപ്പിച്ചിരുന്നു.
