പരിപ്പുവട കഴിച്ചിരിക്കുന്ന മമ്മൂക്ക: ആ ചിരി ആത്മാവില്‍ നിന്നും ഹൃദയത്തില്‍ നിന്നും വരുന്നതാണ്, കുറിപ്പ്

'ഈ ചിരി ആത്മാവില്‍ നിന്നോ ഹൃദയത്തില്‍ നിന്നോ വന്നതാണ്..' ഡബ്ബിങ് സ്റ്റുഡിയോയില്‍ ഇടവേള സമയത്ത് പരിപ്പുവട കഴിച്ചുകൊണ്ടിരുന്ന മമ്മൂട്ടിയോട് ചെന്ന് സെല്‍ഫി ചോദിച്ചാല്‍ എങ്ങനെയായിരിക്കും. ദേ ഇങ്ങനെ ചിരിക്കുമെന്നാണ് ഡബ്ബിംഗ് ആര്‍ട്ടിസ്റ്റ് കൂടിയായ ശ്രീജാ രവിയുടെ അനുഭവം. വിസ്മയ സ്റ്റുഡിയോയില്‍ വച്ചായിരുന്നു ഈ നിമിഷം. ചിത്രം പങ്കുവെച്ച് ഒരു കുറിപ്പും ശ്രീജ പങ്കുവെച്ചു.

കുറിപ്പിന്റെ പൂര്‍ണരൂപം

മമ്മൂക്കയെ വിസ്മയ സ്റ്റുഡിയോയില്‍ വച്ച് കാണാനിടയായി. അതിന്റെ സന്തോഷത്തിലാണ് ഞാന്‍. ഇടവേള സമയത്ത് അദ്ദേഹം പരിപ്പുവട കഴിച്ചുകൊണ്ടിരിക്കുമ്പോഴാണ് ഞാന്‍ ചെല്ലുന്നത്. ഒരു ഫോട്ടോ എടുത്തോട്ടെ എന്ന് ഞാന്‍ ചോദിച്ചു. അപ്പോള്‍ തന്നെ അദ്ദേഹം അതിന് തയ്യാറായി. എന്നാല്‍ അതിലും രസകരമായ കാര്യം അദ്ദേഹത്തോട് ഒന്ന് ചിരിക്കാമോ എന്ന് ഞാന്‍ ചോദിച്ചപ്പോള്‍ മമ്മൂക്ക ചിരിച്ചതാണ്. ഫോട്ടോ എടുക്കുമ്പോള്‍ എപ്പോഴും വിചാരിക്കുന്നത് ചിരിച്ച് കൊണ്ട് നില്‍ക്കാനാണ്. എന്നാല്‍ ഒരിക്കലും അങ്ങനെ സംഭവിക്കാറില്ലെന്നും മമ്മൂക്ക പറഞ്ഞു. അങ്ങനെ അദ്ദേഹത്തിന്റെ ചിരിക്കുന്ന മുഖം കണ്ടു. അദ്ദേഹമൊരു നിഷ്‌കളങ്ക കുട്ടിയെ പോലെയാണ് ചിരിച്ചത്. ആ ചിരി ആത്മാവില്‍ നിന്നും ഹൃദയത്തില്‍ നിന്നും വരുന്നതാണ്. ഈ ചിരി ഒരിക്കലും മായരുതേ ഈശ്വരാ' ശ്രീജ ഫേയ്‌സ്ബുക്കില്‍ കുറിച്ചു.