റാഞ്ചി: ദക്ഷിണാഫ്രിക്കക്കെതിരായ മൂന്നാം ടെസ്റ്റില് ഇന്ത്യ കൂറ്റന് സ്കോറിലേക്ക്. രണ്ടാം ദിനമായ ഇന്ന് രോഹിത് ശര്മ്മ കരിയറിലെ ആദ്യ ഇരട്ട സെഞ്ചുറി നേടി. ഇന്നലെ സിക്സറടിച്ച് സെഞ്ചുറി തികച്ച താരം ഇരട്ട സെഞ്ചുറി നേടിയതും സിക്സറിലൂടെയാണ്. 249 പന്തില് നിന്നായിരുന്നു രോഹിത്തിന്റെ ഇരട്ട സെഞ്ചുറി. ഇന്നലെ രോഹിത് സെഞ്ചുറി നേടിയപ്പോള് അജിങ്ക്യ രഹാനെ ഇന്ന് സെഞ്ചുറി നേടി. 212 റണ് നേടി രോഹിത് ശര്മ്മ പുറത്തായി. അഞ്ച് വിക്കറ്റുകള് നഷ്ടമായപ്പോള് രവീന്ദ്ര ജഡേജയും വൃദ്ധിമാന് സാഹയുമാണ് ക്രീസില്.
ആദ്യ ദിനമായ ഇന്നലെ വെളിച്ചക്കുറവ് മൂലം മത്സരം നേരത്തെ അവസാനിപ്പിക്കുകയായിരുന്നു. ഇന്നലെ ഇന്ത്യ 3 വിക്കറ്റ് നഷ്ടത്തില് 224 റണ്സ് നേടിയിരുന്നു. തുടര്ന്ന് ഇന്ന് കളി ആരംഭിച്ചപ്പോള് അജിങ്ക്യ രഹാനെ തന്റെ കരിയറിലെ 11-ാം ടെസ്റ്റ് സെഞ്ച്വറി കുറിച്ചു. രോഹിത്തിനൊപ്പം 267 റണ്സിന്റെ തകര്പ്പന് കൂട്ടുകെട്ട്. 116 റണ്സുമായാണ് രഹാനെ മടങ്ങിയത്. പിന്നാലെ രോഹിത് ശര്മ്മ തന്റെ കരിയറിലെ ആദ്യ ഇരട്ട സെഞ്ചുറി നേടി. 243 പന്തില് 28 ബൗണ്ടറികളും 4 സിക്സറുകളോടെയായിരുന്നു രോഹിത്തിന്റെ ഇരട്ട സെഞ്ചുറി.
മൂന്നാം ടെസ്റ്റിലും സെഞ്ച്വറി നേടിയതോടെ രോഹിത് മുന് ഇന്ത്യന് താരം സുനില് ഗവാസ്കറിന്റെ റെക്കോര്ഡിനൊപ്പമെത്തിയിരിക്കുകയാണ്. ഏറെ നാളത്തെ കാത്തിരിപ്പിനു ശേഷം ഇന്ത്യയുടെ ടെസ്റ്റ് ഓപ്പണറായി സ്ഥാനക്കയറ്റം ലഭിച്ചതോടെ മികച്ച ഫോമിലാണ് രോഹിത്. ആദ്യ ടെസ്റ്റിന്റെ രണ്ട് ഇന്നിംഗ്സുകളിലും സെഞ്ച്വറി നേടിയ താരം റാഞ്ചിയിലും മൂന്നക്കം കടന്നതോടെ ഒരു ടെസ്റ്റ് പരമ്പരയില് മൂന്നോ അതിലധികമോ സെഞ്ച്വറി നേടുന്ന രണ്ടാമത്തെ ഓപ്പണറായി രോഹിത് മാറി.
