ലണ്ടന്: ഇംഗ്ളീഷ് പ്രീമിയര് ലീഗ് ഫുട്ബോളില് ചരിത്രം കുറിച്ച വിജയവുമായി മുന് ചാമ്പ്യന്മാരായ ലെസ്റ്റര്സിറ്റി. സൗത്താംപ്ടണെ അവരുടെ കൂടാരത്തില് ഏകപക്ഷീയമായ ഒമ്പതു ഗോളിന് തകര്ത്ത് പ്രീമിയര് ലീഗിലെ ഏറ്റവും വലിയ എവേ വിജയത്തിനുടമകളായി. മുന്നേറ്റക്കാരന് ജാമി വാര്ഡിയുടെയും സ്പാനിഷ് താരം അയോസ് പെരസിന്റെയും ഹാട്രിക്കായിരുന്നു ലെസ്റ്ററിന്റെ വിജയത്തില് തിളങ്ങി നിന്നത്.
മഴയില് കുതിര്ന്ന മത്സരത്തില് പത്തുപേരുമായാണ് സൗത്താംപ്ടണ് കളിച്ചത്. ആദ്യ പകുതിയില് തന്നെ അഞ്ചുഗോളിന് പിന്നിലായിപോയ സൗത്താംപ്ടണെ ഏറ്റവും വലച്ചത് പന്ത്രണ്ടാം മിനിറ്റില് തന്നെ ബെട്രന്ഡ് ചുവപ്പുകാര്ഡ് കണ്ട് പുറത്തുപോയതാണ്. തുടര്ന്ന് കളിയില് പത്തുപേരുമായി പകുതിയില് കൂടുതല് സമയം കളിക്കേണ്ടി വന്ന അവരുടെ വലയില് ലെസ്റ്റര് തുരുതുരാ ഗോളുകള് അടിച്ചു കയറ്റി. പത്താം മിനിറ്റില് തന്നെ ചില്വെല് ലെസ്റ്ററിനെ മുന്നിലെത്തിച്ചു. പിന്നാലെ ടീല്മാന്സ് സ്കോര് മെച്ചപ്പെടുത്തി. രണ്ടു മിനിറ്റിന് ശേഷം പെരസ് രണ്ടു തവണ സ്കോര് ചെയ്തതോടെ സ്കോര്ബോര്ഡില് ലെസ്റ്ററിന് ഗോളുകള് നാലായി. ഒടുവില് ഇടവേളയ്ക്ക് പിരിയും മുമ്പ് ജാമി വാര്ഡി ആദ്യ ഗോളും നേടി.
രണ്ടാം പകുതിയിലെ 57 ാം മിനിറ്റില് പെരെസ് ഹാട്രിക് പൂര്ത്തിയാക്കി. തൊട്ടടുത്ത മിനിറ്റില് തന്നെ വാര്ഡി വീണ്ടും സ്കോര് ചെയ്തു. കളി അവസാനിക്കാന് അഞ്ചു മിനിറ്റ് മാക്കി നില്ക്കുമ്പോള് മാഡിസണിന്റെ വകയായിരുന്നു എട്ടാം ഗോള്. സുന്ദരമായ ഫ്രീകിക്കില് നിന്നുമായിരുന്നു ഈ നേട്ടം. ഇഞ്ചുറി സമയത്തിന്റെ ഒടുവില് പെനാല്റ്റിയില് നിന്നും അവസാനഗോള് നേടി വാര്ഡി ടീമിന്റെ ഗോള് പട്ടികയും സ്വന്തം ഹാട്രിക്കും പൂര്ത്തിയാക്കി. ഇതോടെ ഒരുപിടി റെക്കോഡും നീലപ്പടയ്ക്ക് സ്വന്തമായി.
വിജയത്തോടെ പ്രീമിയര്ലീഗിലെ ഏറ്റവും വലിയ ഏവേ മത്സര വിജയമെന്ന ചരിത്രവും ലെസ്റ്റര്സിറ്റി കുറിച്ചു. വിജയങ്ങളില് മാഞ്ചസ്റ്റര് യുണൈറ്റഡ് 1995 ല് ഇപ്സ്വിച്ച് സിറ്റിയെ 9-0 ന് തകര്ത്തതായിരുന്നു ഇതുവരെ പ്രീമിയര് ലീഗിലെ വലിയ വിജയം. വമ്പന് ജയം ലെസ്റ്ററിന് പോയിന്റ് നിലയിലും നേട്ടമുണ്ടാക്കിക്കൊടുത്തു. പട്ടികയില് മാഞ്ചസ്റ്റര് സിറ്റിക്ക് മുകളിലും ലിവര്പൂളിന് പിന്നിലുമായി രണ്ടാം സ്ഥാനത്തേക്കാണ് നീലപ്പടയെ ഉയര്ത്തിയിരിക്കുന്നത്. ലിവര്പൂളിന് 25 പോയിന്റുണ്ട്. ലെസ്റ്ററിന് 20 പോയിന്റയും സിറ്റിക്ക് 19 പോയിന്റമാണ് ഉള്ളത്.
