മാഡ്രിഡ്: പിഎസ്ജിയില് നിന്നും സ്വന്തം കൂടാരത്തില് നെയ്മറെ എത്തിക്കാനുള്ള റയലിന്റെ ശ്രമങ്ങളെല്ലാം പാളിപ്പോയെങ്കിലും നെയ്മറിന്റെ പാത പിന്തുടര്ന്ന് എത്തിയ മറ്റൊരു ബ്രസീലിയന് റയലിന്റെ മുന്നേറ്റത്തില് കുന്തമുനയാകുന്നു. യുവേഫാ ചാമ്പ്യന്സ് ലീഗില് ഹാട്രിക് കുറിച്ച് ബ്രസീലിയന് താരം റോഡ്രിഗോ നടത്തിയ തേരോട്ടത്തില് മുങ്ങിപ്പോയത് തുര്ക്കി ക്ളബ്ബ് ഗളത്താസറേ. ഫ്രഞ്ച്താരം കരീം ബെന്സേമയുടെ ഇരട്ടഗോളും നായകന് റാമോസിന്റെ പെനാല്റ്റിയും ചേര്ന്നപ്പോള് റയല് ജയിച്ചു കയറിയത് 6-0 നായിരുന്നു.
നെയ്മറുടെ പാത പിന്തുടര്ന്ന് ബ്രസീലിയന് ക്ളബ്ബ് സാന്റോസില് നിന്നും സ്പെയിനിലേക്ക് എത്തിയ 18 കാരന് റോഡ്രിഗോ സില്വാ ഡി ഗോസിന്റെ ഹാട്രിക്കായിരുന്നു മത്സരത്തിലെ പ്രത്യേകത. നാലാം മിനിറ്റില് തന്നെ ഗോളടിച്ച് വരവറിയിച്ച പയ്യന് ഏഴാം മിനിറ്റിലും കളിയുടെ അവസാന ഇഞ്ചുറി ടൈമിലും ഗോള് നേടി. 14 ാം മിനിറ്റില് റാമോസ് പെനാല്റ്റിയില് നിന്നും 45 ാം മിനിറ്റില് ബെന്സേമയും ഗോളടിച്ചതോടെ ആദ്യ പകുതിയില് റയല് എതിരാളികളുടെ വല കുലുക്കിയത് നാലു തവണയായിരുന്നു.
ക്ളബ്ബിന്റെ എല്ലാ മത്സരങ്ങളിലുമായി ആദ്യ ആറ് മത്സരങ്ങളില് അഞ്ചു ഗോളുകള് നേടിയ റോഡ്രിഗോ നാലാം മിനിറ്റില് തന്നെ ഗളത്താസറേയുടെ വലയനക്കി. നാട്ടുകാരനായ മാഴ്സലോ നല്കിയ പാസ് ഉഗ്രന് ഇടങ്കാലനടിയിലൂടെ ലക്ഷ്യം കണ്ട റോഡ്രിഗോയുടെ ക്ളിനിക്കല് ഫിനിഷിംഗ് കണ്ടുകൊണ്ടാണ് കളി തുടങ്ങിയത്. മൂന്നു മിനിറ്റ് കഴിയും മുമ്പ് തന്നെ എതിരാളികളെ പയ്യന് വീണ്ടും ഞെട്ടിച്ചു. ഇതിനും പിന്നില് മാഴ്സലോയുടെ ക്രോസായിരുന്നു. ഇതോടെ ചാമ്പ്യന്സ് ലീഗിലെ ആദ്യ ഏഴു മിനിറ്റില് രണ്ടു തവണ ഗോള് നേടുന്ന ആദ്യ താരമായി പയ്യന് മാറി.
എന്നാല് ആദ്യ പകുതിയില് തന്നെ ഹാട്രിക് നേടാനുള്ള അവസരം ടീം നായകന് റാമോസ് നിഷേധിച്ചു. ടോണി ക്രൂസിനെ ബോക്സില് സ്റ്റീവന് സോന്സി വീഴ്ത്തിയതിന് കിട്ടിയ പെനാല്റ്റി എടുത്തത് റാമോസായിരുന്നു. എന്നാല് കളിയിലെ തന്റെ മികവ് വീണ്ടും തെളിയിച്ച റോഡ്രിഗോ ഒന്നാംപകുതി പൂര്ത്തിയാകുന്നതിന് തൊട്ടു മുമ്പ് ബെന്സേമയ്ക്ക് ഗോളടിക്കാന് പാകത്തിന് പന്തു നല്കിക്കൊണ്ടാണ് ക്ളാസ്സ് തെളിയിച്ചത്. രണ്ടാം പകുതിയിലും ആഞ്ഞടിച്ച റയല് ബെന്സേമയിലൂടെയാണ് അഞ്ചാം ഗോള് നേടിയത്. 81 ാം മിനിറ്റില് കളിയില് തന്റെ രണ്ടാം ഗോള് നേടിയ ബെന്സേമ ലയണേല് മെസ്സിക്ക് ശേഷം തുടര്ച്ചയായി 15 ചാംപ്യന്സ് ലീഗ് മത്സരങ്ങളില് ഗോളടിക്കുന്ന താരമായി മാറുകയും ചെയ്തു.
ആദ്യ പകുതിയില് ഹാട്രിക് നേടാനുള്ള അവസരം നായകന് നല്കിയില്ലെങ്കിലും ഇഞ്ചുറി ടൈമില് റോഡ്രിഗോ ആ കടം വീട്ടി. കളി തീരാന് സെക്കന്റുകള് ബാക്കി നില്ക്കേ ഉഗ്രന് വലംകാലനടിയിലൂടെ പയ്യന് റയലിന്റെ പട്ടിക പൂര്ത്തിയാക്കി. 2004 ല് തുര്ക്കി ക്ളബ്ബായ ഫെനര്ബാഷേയ്ക്ക് എതിരേ മാഞ്ചസ്റ്റര് യുണൈറ്റഡിനായി ചാംപ്യന്സ് ലീഗിലെ അരങ്ങേറ്റ മത്സരത്തില് ഇംഗ്ളീഷ് താരം വെയ്ന് റൂണി ഹാട്രിക് നേടുമ്പോഴും പ്രായം 18 ആയിരുന്നു. അതിന് ശേഷം ചാംപ്യന്സ് ലീഗില് ഹാട്രിക് നേടുന്ന പ്രായം കുഞ്ഞതാരമായി മാറിയിരിക്കുകയാണ് റോഡ്രിഗോ.
പയ്യനെക്കുറിച്ച് മാനേജര് സിഡാനും സഹതാരങ്ങള്ക്കും ഏറെ അഭിമാനമുണ്ട്. റോഡ്രിഗോ തന്നെ അതിശയിപ്പിക്കുന്നില്ലെന്നും അവന് എല്ലാ മികവും ഉണ്ടെന്നും സിഡാന് പറഞ്ഞു. ''അവന് മിടുക്കനാണ്. കാര്യങ്ങള് വേഗത്തില് മനസ്സിലാക്കുകയും പഠിക്കുകയും ചെയ്യുന്നു. ശാരീരികമായ അവന് ഇനിയും മെച്ചപ്പെടാനുണ്ട്. എന്നാല് സാങ്കേതികമായി മികവുണ്ട്. പന്തിനെ എന്തു ചെയ്യണമെന്ന് അവന് വ്യക്തതയുണ്ട്.'' കരീം ബെന്സേമയ്ക്കും സഹതാരത്തെക്കുറിച്ച് നൂറ് നാവാണ്. ''വെറും 18 വയസ്സേ ഉള്ളെങ്കിലൂം അവന് നിര്ഭയനാണ്. ഒരു കൗമാരക്കാരന് ഈ രീതിയില് കളിക്കുന്നത് കാണുന്നത് മനോഹരമാണ്.''
