മോഹന്ലാല് നായകനായ അഭിമന്യുവിലെ രാമയണക്കാറ്റേ....എന്ന സൂപ്പര്ഹിറ്റ് ഗാനത്തിന് മോഹന്ലാലിനോടൊപ്പം ചുവടു വെച്ച സുന്ദരിയെ ആരും മറന്നിട്ടുണ്ടാകില്ല. എം.ടി വാസുദേവന് നായരുടെ സിനിമയില് നായികയായി അഭിനയ ജീവിതം തുടങ്ങിയ ഷര്മ്മിലിയെന്ന നടിയായിരുന്നു ഇത്. വര്ഷങ്ങള്ക്ക് ശേഷം പുലിമുരുകനില് മോഹന്ലാലിനോടൊപ്പം ഒരു വേഷം ചെയ്യാന് ഷര്മ്മിലിക്ക് അവസരം ലഭിച്ചിരുന്നു. എന്നാല് തന്റെ അമിത ശരീരഭാരം കാരണം ഈ അവസരം നഷ്ടപ്പെടുകയായിരുന്നു. ഇതേ കുറിച്ചും താന് അഭിനയിച്ച ഗ്ലാമര് ചിത്രങ്ങളെ കുറിച്ചുമൊക്കെ പ്രമുഖ മാധ്യമത്തിന് നല്കിയ അഭിമുഖത്തില് ഷര്മ്മിലി തുറന്നു പറഞ്ഞിരുന്നു.
'' നല്ല ടീം, ലാല് സാറിനൊപ്പം കോമ്പിനേഷന് വിട്ടുകളയാന് തോന്നിയില്ല. പക്ഷേ എന്നെ കാണാതെയാണ് അവര് ഈ ചിത്രത്തിലേക്ക് വിളിച്ചത്. ഈ ശരീരഭാരം വച്ച് ജൂലിയാകാന് കഴിയില്ലെന്ന് എനിക്ക് ഉറപ്പായിരുന്നു. എന്റെ പുതിയ ഫോട്ടോകള് ഞാന് ആന്റണി സാറിന് മെയില് ചെയ്തെങ്കിലും അമിതവണ്ണം കാരണം ആ ചിത്രം എനിക്ക് നഷ്ടപ്പെട്ടു. പിന്നീട് ആ കഥാപാത്രം ചെയ്തത് നമിതയാണ്. 2000 ന്റെ പകുതിയില് മലയാള സിനിമയില് നിന്നു വീണ്ടും വിളി വന്നു. 'ചെഞ്ചായം' എന്ന ചിത്രത്തില് മോഹിനി ടീച്ചര് ഗ്ലാമറസ് വേഷം ചെയ്യാന് താല്പര്യമുണ്ടോ എന്നു ചോദിച്ചു. ഞാനപ്പോള് ഗ്ലാമര് കഥാപാത്രങ്ങളെ വിട്ടിരുന്നു. തടി നന്നായി കൂടി. ഒടുവില് ചില നിബന്ധനകളോടെ അഭിനയിക്കാമെന്നു സമ്മതിച്ചു. എന്നാല്, എം.ടി. വാസുദേവന് നായരുടെയും കെ.എസ് സേതുമാവന്റെയും സിനിമയില് അഭിനയം തുടങ്ങിയിട്ട് ഗ്ലാമര് സിനിമകളില് അഭിനയിക്കുന്നത് ശരിയല്ല എന്നു തോന്നി. തിരിച്ച് പോകാമെന്ന് മനസ് പറഞ്ഞു.
പക്ഷേ അറിയാവുന്ന തൊഴില് അഭിനയമാണ്. എന്തായാലും പേടിച്ചത് പോലെ ഒന്നും സംഭവിച്ചില്ല. സന്തോഷത്തോടെയാണ് ലൊക്കേഷനില് നിന്നു മടങ്ങിയത്. 2 മാസം കഴിഞ്ഞു കാണും. വീട്ടിലേക്ക് നിരന്തരം ഫോണ് കോളുകള് വന്നു. മാഡം ഡേറ്റ് വേണം, ശമ്പളം ഇത്ര തരാം, അഡ്വാന്സ് ഇത്ര തരാം എന്നൊക്കെ പറഞ്ഞാണ് വിളി. പിന്നീടാണ് സംഭവമറിയുന്നത്. 'ചെഞ്ചായം' സൂപ്പര് ഹിറ്റായിരുന്നു. ഷക്കീലയെ പോലെ ആളുകള്ക്ക് ഷര്മിലിയെയും ഇഷ്ടപ്പെട്ടു. മലയാളത്തില് ആറു മാസത്തിനുള്ളില് ഒമ്പത് ഗ്ലാമര് സിനിമകളില് മാത്രമാണ് അഭിനയിച്ചത്. പലതിന്റെയും പേര് അറിയില്ല. നമ്മളോട് പറയുമ്പോള് ഒന്നും റിലീസ് ചെയ്യുമ്പോള് മറ്റൊന്നും ആയിരിക്കും. 'സാഗര'യുടെ സെറ്റില് വച്ചാണ് ഷക്കീലയുമായി അടുക്കുന്നത്. അവള് തികച്ചും പ്രൊഫഷനലായ നായിക ആയി മാറിയിരുന്നു.
ഡാന്സ് മാസ്റ്റര് കുമാര് വഴിയാണ് അഭിമന്യുവിലേക്ക് എത്തുന്നത്. അഭിമന്യുവില് മോഹന്ലാലിനൊപ്പം നൃത്തം ചെയ്യാന് സുന്ദരിയായ ഒരു പെണ്ണിനെ വേണം. ഷര്മ്മിലിയ്ക്ക് പറ്റുമോ എന്നായിരുന്നു ബാപ്പയോട് കുമാര് സാര് ചോദിച്ചത്. ഗ്ലാമറസ് ആയി നൃത്തം ചെയ്യണമെന്ന് കേട്ടപ്പോള് ബാപ്പയ്ക്ക് വിഷമം തോന്നി. ഉമ്മയ്ക്ക് അതിലേറെ എതിര്പ്പ്. പ്രിയദര്ശന് മലയാളത്തിലെ നമ്പര് വണ് സംവിധായകനാണെന്നും അദ്ദേഹം നായികമാരെ മോശമായി അവതരിപ്പിക്കാറില്ലെന്നും കുമാര് സര് പറഞ്ഞു. ഈ കുട്ടി ഓക്കെ ആണെന്ന് കണ്ടപാടെ പ്രിയദര്ശന് സാര് പറഞ്ഞു. രാമയണക്കാറ്റേ എന് നീലാംബരി കാറ്റേ എന്ന പാട്ടിന്റെ ഷൂട്ടാണ്. ലാല് സാറുമായി നല്ല കമ്പനിയായതിനാല് ആസ്വദിച്ചാണ് നൃത്തം ചെയ്തത്.'' - ഷര്മ്മിലി പറഞ്ഞു.
