കൊല്ക്കത്ത: കൊല്ക്കത്ത ടെസ്റ്റില് ബംഗ്ലാദേശിനെതിരെ ഇന്ത്യയ്ക്ക് ഒന്നാം ഇന്നിങ്സ് ലീഡ്. ബംഗ്ലാദേശിന്റെ 106 പിന്തുടര്ന്ന ഇന്ത്യ 33 ഓവര് പിന്നിടുമ്പോള് രണ്ട് വിക്കറ്റ് നഷ്ടത്തില് 117 റണ്സെന്ന നിലയിലാണ്. ബംഗ്ലാദേശിനെതിരെ 11 റണ്സിന്റെ ലീഡാണ് ഇന്ത്യ ഇതുവരെ ഉയര്ത്തിയിരിക്കുന്നത്. ചേതേശ്വര് പൂജാര( 83 പന്തില് ഏഴു ബൗണ്ടറി ഉള്പ്പെടെ 45 റണ്സ്), വിരാട് കോഹ്ലി( 60 പന്തില് അഞ്ചു ബൗണ്ടറി ഉള്പ്പെടെ 36 റണ്സ്) എന്നിവരാണ് ക്രീസില്.
മറുപടി ബാറ്റിങ്ങിനിറങ്ങിയ ഇന്ത്യയ്ക്ക് മായങ്ക് അഗര്വാളിന്റെ വിക്കറ്റാണ് ആദ്യം നഷ്ടമായത്. 21 പന്തില് മൂന്നു ബൗണ്ടറി ഉള്പ്പെടെ 14 റണ്സായിരുന്നു മായങ്ക് അഗര്വാളിന്റെ സമ്പാദ്യം.അല് അമീന് ഹോസൈന്റെ പന്തിലാണ് മായങ്ക് അഗര്വാള് മടങ്ങിയത്. 35 പന്തില് 21 റണ്സെടുത്ത രോഹിത് ശര്മ്മ ഇബാദത് ഹൊസൈന്റെ പന്തില് വിക്കറ്റിനു മുന്നില് കുരുങ്ങുകയായിരുന്നു. അതേസമയം ഏറ്റവും വേഗത്തില് 5,000 റണ്സ് തികയ്ക്കുന്നവിരാട് ടെസ്റ്റ് ക്യാപ്റ്റനെന്ന റെക്കോര്ഡും കോഹ്ലി മറികടന്നു. ഓസ്ട്രേലിയന് മുന് താരം റിക്കി പോണ്ടിങ്ങിനെയാണ് കോഹ്ലി മറികടന്നത്.
പിങ്ക് പന്തില് ഡേ-നൈറ്റ് മത്സരത്തിന് കൊല്ക്കത്തയിലെ ഈഡന് ഗാര്ഡന്സില് ഇറങ്ങിയ ബംഗ്ലാദേശിന്റെ ഇന്നിങ്സ് 106 റണ്സിന് അവസാനിച്ചു. ഇന്ത്യയ്ക്കെതിരായ രണ്ടാം ടെസ്റ്റ് മത്സരത്തില് 30.3 ഓവറില് 106 റണ്സിന് ബംഗ്ലാദേശിന്റെ ബാറ്റ്സ്മാന്ന്മാര് കൂടാരം കയറി. ഇഷാന്ത് ശര്മ്മയുടെ അഞ്ചു വിക്കറ്റ് നേട്ടവും ഉമേഷ് യാദവിന്റെ മൂന്ന് വിക്കറ്റ് നേട്ടവുമാണ് ബംഗ്ലാവധം എളുപ്പത്തിലാക്കിയത്. ബംാ നിരയില് നാലു ബാറ്റ്സ്മാന്മാര് സംപൂജ്യരായി മടങ്ങിയപ്പോള് രണ്ടു പേര് ഒരു റണ്സ് എടുത്തും മടങ്ങി. മൂന്ന് ബാറ്റ്സ്മാന്മാര് മാത്രമാണ് രണ്ടക്കം കടന്നത്. 52 പന്തില് നിന്ന് 29 റണ്സെടുത്ത ഷദ്മാന് ഇസ്ലാമാണ് ടോപ് സ്കോറര്.
ഡേ നൈറ്റ് ടെസ്റ്റില് പിങ്ക് പന്തില് ആദ്യമായി കളിക്കാനിറങ്ങിയ ബംഗ്ലാദേശിന് ആറാം ഓവറില് ഇഷാന്തിന്റെ പന്തിലാണ് ആദ്യ വിക്കറ്റ് നഷ്ടമായത്. ഇമ്റുള് കയിസ്( 15 പന്തില് നാല് റണ്സ്) നെ ഇഷാന്ത് വിക്കറ്റിനു മുന്നില് കുരുക്കുകയായിരുന്നു. രണ്ടാം വിക്കറ്റ് കൂട്ടുകെട്ട് പത്താമത്തെ ഓവറില് ഉമേഷ് യാദവ് എത്തി മോമിനുള് ഹാഖിനെ(പൂജ്യം) കുടാരം കയറ്റി. ഇതേ ഓവറിലെ മൂന്നാമത്തെ പന്തില് തന്നെ മൂന്നാമത്തെ വിക്കറ്റും യാദവ് പറിച്ചു. മൊഹമ്മദ് മിഥുന്(പൂജ്യം) ആണ് മൂന്നാമനായി മടങ്ങിയത്. തൊട്ടടുത്ത ഓവറില് മൊഹമ്മദ ഷമിക്കായിരുന്നു ഊഴം. സംപൂജ്യനാക്കി മുഷ്ഫിഖര് റഹിമിനേയാണ് ഷമി മടക്കിയത്. ഷദ്മാന് ഇസ്ലാം(52 പന്തില് 29 റണ്സ്) ന്റെ വിക്കറ്റാണ് അഞ്ചാമനായി വീഴ്ത്തിയത്. മഹ്മദുള്ളാഹ്( 12 പന്തില് അഞ്ചു റണ്സ്), നയിം ഹാസന്( 19 റണ്സ്), ഇബാദത്ത് ഹോസൈന്(ഒന്ന്), മെഹിദി ഹസന് മിറാസ്(എട്ട് റണ്സ്) അബു ജയേദ്(പൂജ്യം) എന്നിങ്ങനെയാണ് മറ്റ് ബാറ്റ്സ്മാന്ന്മാരുടെ സമ്പാദ്യം. അല് അമീന് ഹൊസൈന് ഒരു റണ്സോടെ പുറത്താകാതെ നിന്നു. ഇഷാന്തിന്റെ പന്ത് ഹെല്മറ്റിലിടിച്ച് ലിട്ടണ് ദാസ് മടങ്ങി.
പിങ്ക് പന്തില് ചരിത്രം കുറിച്ച് ആദ്യ ഡേ നൈറ്റ് ടെസ്റ്റ് മത്സരത്തിനായി ടോസ് നേടിയ ബംഗ്ളാദേശ് ബാറ്റിങ്ങ് തിരഞ്ഞെടുക്കുകയായിരുന്നു. ചരിത്ര മത്സരത്തിന് സാക്ഷ്യം വഹിക്കാന് ബംഗ്ളാദേശ് പ്രധാനമന്ത്രി ഷേയ്ഖ് ഹസീന ഉള്പ്പെടെയുള്ളവര് ഈഡന്സ് ഗാര്ഡനിലെ വിഐപി സ്റ്റാന്ഡില് എത്തിയിട്ടുണ്ട്. അതിഥികളായ ബംഗ്ളാദേശിന് വേണ്ടി ഇന്നിംഗ്സ് ഓപ്പണ് ചെയ്യാന് എത്തിയത് ഷദ്മാന് ഇസ്ളാമും ഇമ്രുള് കായേസുമായിരുന്നു. ഇഷാന്ത് ശര്മ്മ എറിഞ്ഞ ആദ്യ ഓവര് മെയ്ഡന് ആയിരുന്നു. ഇന്ത്യ കളിക്കുന്ന ആദ്യ പകല് രാത്രി ടെസ്റ്റ് മത്സരം കൊല്ക്കത്ത ആഘോഷമാക്കുകയാണ്. 65,000 പേരാണ് മത്സരം കാണാനെത്തിയത്.
കളികാണാന് വന് ജനാവലിയാണ് എത്തിയിട്ടുള്ളത്്. മണിക്കൂറുകളോളം ക്യൂ നിന്നാണ് പലരും സ്റ്റേഡിയത്തില് പ്രവേശിച്ചത്. ടിക്കറ്റുകള് മുഴുവന് വിറ്റഴിഞ്ഞിരുന്നു. ഇതിന് മുമ്പ് ടെസ്റ്റ് മാച്ചിന് ഈ രീതിയില് കാണികളില് നിന്നും പ്രതികരണം വന്നത് സച്ചിന് തെന്ഡുല്ക്കറുടെ വിടവാങ്ങല് മത്സരത്തിനായിരുന്നു.
നായകന് വിരാട് കോലി, അജിങ്ക്യാ രഹാനേ, രവിചന്ദ്രന് അശ്വിന്, ഉമേഷ് യാദവ്, ശുഭവ് മാന് ഗില് എന്നിവര് ആദ്യമായിട്ടാണ് പിങ്ക് പന്തില് കളിക്കുന്നത്. കഴിഞ്ഞ ആറ് ടെസ്റ്റ് മത്സരങ്ങളും ജയിച്ച ഇന്ത്യ വന് തേരോട്ടമാണ് നടത്തുന്നത്. 2013 ലായിരുന്നു ഇതിന് മുമ്പ് ഇന്ത്യ ആറു തുടര്വിജയങ്ങള് നേടിയിട്ടുള്ളത്.
