ആർട്ടിക്കിലെ ഏറ്റവും പഴക്കം ചെന്നതും അവസാനത്തേതുമായ മഞ്ഞുപാളിയും ദുർബലമാകുന്നുവെന്ന് ഞെട്ടിക്കുന്ന കണ്ടെത്തൽ. ഈ മഞ്ഞുപാളി ശോഷിച്ചു വരുന്ന ദൃശ്യങ്ങൾ ഗവേഷകർ പുറത്തു വിട്ടു. ഭൂമിയിലെ മഞ്ഞുപാളികളിൽ ഏറ്റവും അവസാനം മഞ്ഞുരുകുന്ന മേഖലയാണ് ആർട്ടികിലെ വടക്കൻ മേഖല. അതുകൊണ്ടു തന്നെ ആർട്ടിക്കിലെ ഏറ്റവും പഴക്കം ചെന്ന ഈ മഞ്ഞുപാളിയിൽ ഉണ്ടാകുന്ന ഇപ്പോഴത്തെ ശോഷണം അതീവ ഗൗരവമായി തന്നെയാണ് ഗവേഷകർ വിലയിരുത്തുന്നത്.
ആർട്ടിക്കിലെ അവസാന ആശ്രയം എന്നാണ് ഈ മഞ്ഞുപാളിയെ വിളിച്ചിരുന്നത്. ആർട്ടിക്കിൽ ശൈത്യ കാലത്ത് കൂടുതൽ മഞ്ഞുപാളി രൂപപ്പെടുന്നതിനും ഭൂമിയിലെ താപനില നിയന്ത്രിക്കുന്നതിലും നിർണായക പങ്ക് വഹിക്കുന്നത് ഈ മഞ്ഞുപാളിയുടെ സാന്നിധ്യമാണ്.
1984 മുതൽ ഈ മഞ്ഞുപാളിയ്ക്ക് ഉണ്ടായ മാറ്റങ്ങൾ സാറ്റ്ലെറ്റിന്റെ സഹായത്തോടെയാണ് ഗവേഷകർ നിരീക്ഷിച്ചിരുന്നത്. ഈ സാറ്റ്ലെറ്റ് ദൃശ്യങ്ങൾ കോർത്തിണക്കിയാണ് മഞ്ഞുപാളി ശോഷിച്ചതിന്റെ വീഡിയോ അമേരിക്കൻ ജ്യോഗ്രഫിക്കൽ സൊസൈറ്റി സമൂഹമാധ്യമങ്ങളിലൂടെ പങ്കുവെച്ചത്.
കാലങ്ങളായി നിലകൊള്ളുന്ന ഈ മഞ്ഞുപാളി ഇനിയും ഏറെക്കാലം നീണ്ടു നിൽക്കുമെന്ന് കരുതാനാകില്ലെന്നും ഇപ്പോഴത്തെ പഠനത്തിന് നേതൃത്വം നൽകിയ ടൊറന്റോ സർവകലാശാലയിലെ കാലാവസ്ഥാ നിരീക്ഷണ വിഭാഗം മേധാവിയായ കെന്റ് മൂർ പറയുന്നു.
