മാഡ്രിഡ്: യുവേഫാ ചാംപ്യന്സ് ലീഗ് ഫുട്ബോളില് നിലവിലെ ചാംപ്യന്മാര് ലിവര്പൂളും കരുത്തരായ ബാഴ്സിലോണയും ഇംഗ്ളീഷ് ക്ളബ്ബ് ചെല്സിയും രണ്ടുഗോള് ജയവുമായി മുമ്പോട്ട് പോയപ്പോള് കഴിഞ്ഞ സെമിഫൈനലിസ്റ്റുകളായ അയാക്സ് ആംസ്റ്റര്ഡാമും ഇറ്റാലിയന് വമ്പന്മാരായ ഇന്ററും തോറ്റു പുറത്തായി. ബാഴ്സിലോണ് ഇന്റര്മിലാനെ കീഴടക്കിയപ്പോള് ചെല്സി ഫ്രഞ്ച് ക്ളബ്ബ് ലില്ലിയേയും ലിവര്പൂള് ആര്ബി സാല്സ്ബെര്ഗിനെയുമാണ് തോല്പ്പിച്ചത്.
ഇറ്റാലിയന് വമ്പന്മാരായ ഇന്റര്മിലാനെതിരേ സൂപ്പര്താരം മെസ്സിക്ക് വിശ്രമം അനുവദിച്ച് കളിക്കിറങ്ങിയ ബാഴ്സിലോണയ്ക്കായി കൗമാരതാരം അന്സുഫാറ്റിയും കാര്ലോസ് പെരസുമാണ് സ്കോര് ചെയ്തത്. ബെല്ജിയം താരം ലൂക്കാക്കു ഇന്റര്മിലാന്റെ ഗോള് നേടി. പകരക്കാരനായി എത്തിയ ഫാറ്റി 85 ാം മിനിറ്റില് സുവാരസിന്റെ പാസ് ഗോളാക്കി മാറ്റുകയായിരുന്നു. അരങ്ങേറ്റ മത്സരത്തില് ഗോള് നേടി സ്പാനിഷ് താരം കാര്ലോസ് പെരസ് കാറ്റാലന്മാരെ മുന്നിലെത്തിച്ചിരുന്നു.
നേരത്തേ തന്നെ പ്രീ ക്വാര്ട്ടറില് കടന്നതിനാല് ബാഴ്സിലോണയ്ക്ക് കളി ചടങ്ങ് മാത്രമായിരുന്നു. അതുകൊണ്ടാണ് ഗ്ളാമര് പോരാട്ടമായിട്ടും മെസ്സിയെ ഒഴിവാക്കിയത്. എന്നാല് തോറ്റാല് പുറത്താകുന്ന ഇന്ററിന് ജീവന്മരണ പോരാട്ടമായിരുന്നു. മൂന്ന് തവണ ബാഴ്സയുടെ വല കുലുക്കിയെങ്കിലും എല്ലാം ഓഫ് സൈഡായി പോയത് ഇന്ററിന് ദൗര്ഭാഗ്യമായി. ഗ്രൂപ്പില് രണ്ടാം സ്ഥാനക്കാരായി ബോറൂഷ്യ ഡോര്ട്ട്മുണ്ടും ബാഴ്സ്യ്ക്കൊപ്പം ആദ്യ 16 ല് ഇടംപിടിച്ചു. സ്ളാവിയാ പ്രാഹയെയാണ് ബോറൂഷ്യ വീഴ്ത്തിയത്.
സാഞ്ചോയും ബ്രാന്ഡറ്റും ഗോള് നേടിയപ്പോള് സൂസക്കായിരുന്നു സ്ളാവിയയുടെ ഗോള് കുറിച്ചത്. 77ാം മിനിറ്റില് വെയ്ഗല് ചുവപ്പ് കാര്ഡ് കണ്ടതിനെ തുടര്ന്ന് ബോറുഷ്യ പത്തുപേരായി ചുരുങ്ങിയിരുന്നു.
ഒരൊറ്റ സമനില പോലും പ്രീക്വാര്ട്ടര് ബര്ത്ത് ഉറപ്പിക്കുമെന്നിരിക്കെ ലിവര്പൂള് വിജയിച്ചത് ഏകപക്ഷീയമായ രണ്ടു ഗോളുകള്ക്കായിരുന്നു. റെഡ്ബുള് സാല്സ് ബെര്ഗിനെതിരേ മുഹമ്മദ് സലയും കെയ്തെയുമായിരുന്നു സ്കോര് ചെയ്തത്. ഗ്രൂപ്പിലെ വമ്പന്മാരായ ഇറ്റാലിയന് ക്ളബ്ബ് നാപ്പോളി കെആര് സി ഗെങ്കിനെ 4-0 ന് കീഴടക്കിയതിനെ തുടര്ന്ന് ഗ്രൂപ്പില് ഒന്നാമതാകാന് ലിവര്പൂളിന് സമനില മതിയായിരുന്നു. എന്നാല് സ്റ്റൈലിഷായി തന്നെ അവര് പ്രീക്വാര്ട്ടര് ബര്ത്ത് നേടി.
മരണഗ്രൂപ്പ് എന്നറിയപ്പെടുന്ന എച്ചില് വിജയത്തില് കുറഞ്ഞതൊന്നും ചെല്സിയെ ആദ്യ 16 ല് എത്തിക്കുമായിരുന്നില്ല. എന്നാല് 2-1 ന് അവര് ലില്ലിയെ മറികടന്നതോടെ പുറത്തായത് കഴിഞ്ഞ തവണ സെമി കളിച്ച ഡച്ച് ക്ളബ്ബ് അയാക്സായിരുന്നു. ഫ്രാങ്ക് ലാംപാര്ഡിന്റെ പരിശീലനത്തിന് കീഴില് ആദ്യ ഹോംമാച്ച് ജയം നേടിയ ചെല്സിക്ക് തുണയായത് ടാമി അബ്രഹാമിന്റെയും സീസര് അസ്പിലിക്യൂട്ടയുടെയും ഗോളുകളാണ്. ഒന്നാം സ്ഥാനക്കാരായ വലന്സിയയ്ക്കൊപ്പം പോയിന്റ് നേടിയാണ് ചെല്സി അടുത്ത റൗണ്ടില് എത്തിയത്. 19 ാം മിനിറ്റിലായിരുന്നു ആദ്യഗോള്. ഈ സീസണില് അബ്രഹാം ചെല്സിക്കായി 13 ാം ഗോളാണ് നേടിയത്.
ഇതേഗ്രൂപ്പില് നടന്ന മറ്റൊരു നിര്ണ്ണായക മത്സരത്തില് റോഡ്രിഗോയുടെ ഏക ഗോളിലാണ് വലന്സിയ അയാക്സിനെ വീഴ്ത്തിയത്. പത്തു പോയിന്റുമായി ഒന്നാമത് ഉണ്ടായിരുന്ന അയാക്സ് ഈ ഒരൊറ്റ തോല്വിയോടെ മൂന്നാം സ്ഥാനത്തേക്ക് വീഴുകയും പുറത്താകുകയും ചെയ്തു. ഒളിമ്പിക്സ് ലിയോണുമായി സമനിലയില് കുടുങ്ങിയ ആര്ബി ലീപ്സിഗും പ്രീക്വാര്ട്ടറില് എത്തി.
