മലയാളത്തില് സൂപ്പര്ഹിറ്റുകള് സമ്മാനിച്ച തിരക്കഥാകൃത്താണ് ഡെന്നിസ് ജോസഫ്. മോഹന്ലാല്, മമ്മൂട്ടി എന്നീ താരങ്ങളെ സൂപ്പര്താര പദവിയിലേക്ക് ഉയര്ത്തിയ സിനിമകളായ രാജാവിന്റെ മകനും ന്യൂഡല്ഹിയും ഡെന്നിസ് ജോസഫിന്റെ തിരക്കഥയില് പിറന്നതാണ്. ശ്യാമ, ഭൂമിയിലെ രാജാക്കന്മാര്, നമ്പര് 20 മദ്രാസ് മെയില്, കോട്ടയം കുഞ്ഞച്ചന്, മനു അങ്കിള്, ഇന്ദ്രജാലം, ആകാശദൂത് തുടങ്ങി നിരവധി ഹിറ്റുകള് അദ്ദേഹം മലയാളികള്ക്ക് സമ്മാനിച്ചു.
എന്നാല് മലയാളത്തില് നിരവധി ഹിറ്റുകള് സമ്മാനിച്ച ഡെന്നിസ് ജോസഫിന് തന്റെ കരിയറില് മോശം അവസ്ഥയിലൂടെയും കടന്നു പോകേണ്ടി വന്നിട്ടുണ്ട്. ഒരു മാധ്യമത്തിന് നല്കിയ അഭിമുഖത്തില് ഡെന്നിസ് ജോസഫ് തന്നെയാണ് തന്റെ ജീവിതത്തില് സംഭവിച്ച മോശം അവസ്ഥയെ കുറിച്ച് തുറന്നു പറഞ്ഞത്. '' എഫ്.ഐ.ആര് എന്ന ചിത്രം എഴുതി തുടങ്ങുന്ന സമയമാണ്. 14 സീന് കഴിഞ്ഞപ്പോള് ഞാന് ദുരവസ്ഥയിലായി. മലയാളം അക്ഷരങ്ങളൊക്കെ മറന്നു പോയി. സീന് നമ്പര് വണ് എന്ന് എഴുതണമെങ്കില് 'സ' എന്ന അക്ഷരം എങ്ങനെയാണ്, 'ന്' എങ്ങനെയാണ് എഴുതുന്നത് എന്നൊക്കെ ഓര്ക്കാന് പറ്റാത്ത അവസ്ഥ. ഉടന് തന്നെ ഞാന് ഒരു പെഗ് കഴിക്കും. അപ്പോ സമനില കിട്ടും. അങ്ങനെ 24 മണിക്കൂറും മദ്യമില്ലെങ്കില് ഞാന് അബ്നോര്മല് ആകും എന്ന അവസ്ഥയിലായി.
നിനക്ക് വെള്ളമടിക്കാതെ പഴയതുപോലെ ഇരുന്ന് എഴുതിക്കൂടെ, നീ വിചാരിച്ചാല് ഒന്നോ രണ്ടോ ന്യൂഡല്ഹി ഇനിയും എഴുതാമല്ലോ എന്ന് പലരും ചോദിച്ചു. ഒന്നോ രണ്ടോ അല്ല ഒരായിരം ന്യൂഡല്ഹി എഴുതണം എന്ന് എനിക്ക് ആഗ്രഹമുണ്ട്. പക്ഷേ ന്യൂ എന്ന് എഴുതണമെങ്കില് ന എങ്ങനെ എഴുതും. മനസ് ശൂന്യം. മാസങ്ങളോളം വീടിന്റെ മുകള് നിലയില് നിന്ന് താഴെ ഇറങ്ങാത്ത അവസ്ഥയിലായി ഞാന്. മരിച്ചിരുന്നെങ്കില് നന്നായിരുന്നു എന്നു വരെ തോന്നി. അത് സ്വാഭാവികമായി സംഭവിച്ചേക്കും, അല്ലെങ്കില് ആത്മഹത്യ ചെയ്തുപോകും എന്ന അവസ്ഥ. ഷാജി കൈലാസും, അരോമ മണിയും സിബി മലയിലും ജോഷിയുമൊക്കെ മുകളില് വന്നാണ് എന്നെ കാണുന്നത്. ഒടുവില് ഒരു ബന്ധുവിന്റെ നിര്ദേശ പ്രകാരം കോര ജേക്കബ് എന്ന വ്യക്തിയുടെ സാമീപ്യത്താലാണ് തനിക്ക് ജീവിതം തിരികെ പിടിക്കാന് കഴിഞ്ഞത് '' - ഡെന്നിസ് പറയുന്നു
