ന്യൂകാമ്പ്: പിന്നില് നിന്നും പൊരുതി ബാഴ്സിലോണയെ കീഴടക്കി അത്ലറ്റിക്കോ മാഡ്രിഡ് സ്പാനിഷ് കപ്പ് ഫൈനലില് കടന്നു. രണ്ടിനെതിരേ മൂന്ന് ഗോളുകള്ക്കാണ് ബാഴ്സയെ അത്ലറ്റിക്കോ മറികടന്നത്. കൊക്കേ, മൊറാട്ട, കൊറേറ എന്നിവര് അത്ലറ്റിക്കോയുടെ ഗോളുകള് കുറിച്ചപ്പോള് മെസ്സിയും ഗ്രീസ്മാനുമായിരുന്നു ബാഴ്സയുടെ സ്കോറര്മാര്.
രണ്ടാം പകുതിയ്ക്ക് തൊട്ടുമുമ്പ് കൊക്കേയിലൂടെ ആദ്യം മുന്നിലെത്തിയ അത്ലറ്റിക്കോ തുടര്ന്ന് രണ്ടാം പകുതിയില് രണ്ടു ഗോളുകള് വഴങ്ങി പിന്നിലായി. ക്ളിനിക്കല് സ്ട്രൈക്കിലൂടെയായിരുന്നു കൊക്കേ ടീമിനെ മുന്നിലെത്തിച്ചത്. എന്നാല് ഒരു ലോംഗ് റേഞ്ചറിലൂടെ മെസ്സി ബാഴ്സയെ ഒപ്പമെത്തിച്ചു. പിന്നാലെ തന്റെ പഴയ ടീമിനെതിരേ ഗ്രീസ്മാനും ഗോളടിച്ചതോടെ ബാഴ്സിലോണ മുന്നിലായി. എന്നാല് പിന്നാലെ കിട്ടിയ പെനാല്റ്റി മുതലാക്കി മൊറാട്ട അത്ലറ്റിക്കോയെ ഒപ്പമെത്തിച്ചു. ഇഞ്ചുറി സമയത്ത് കളിയുടെ വിധി നിര്ണ്ണയിച്ച ഗോള് കൊറേറ നേടുകയായിരുന്നു.
രണ്ടാം പകുതിയില് മെസ്സി മറ്റൊരു ഗോള് കൂടി നേടിയെങ്കിലും വീഡിയോ പരിശോധിച്ചപ്പോള് ഹാന്ഡ്ബോളാണെന്ന സംശയം ഉയര്ന്നതോടെ നിഷേധിക്കപ്പെട്ടു. ബുധനാഴ്ച വലന്സിയയെ 3-1 ന് പരാജയപ്പെടുത്തിയ റയല് മാഡ്രിഡാണ് ഫൈനലില് അത്ലറ്റിക്കോയ്ക്ക് എതിരാളിയാകുന്നത്.
കോപ്പാ ഡെല്റേയിലും ലാലിഗയിലും ആദ്യ രണ്ടു സ്ഥാനങ്ങള് വരുന്ന ടീമുകള് പരസ്പരം ഏറ്റുമുട്ടുന്ന രീതിയിലാണ് സ്പാനിഷ് കപ്പിന്റെ പുതിയ ഫോര്മാറ്റ്. എന്നാല് ബാഴ്സിലോണ ലാലിഗ നേടുകയും ഡെല്റേയില് രണ്ടാം സ്ഥാനത്ത് വരികയും ചെയ്തതോടെയാണ് മൂന്നാം സ്ഥാനക്കാരായ റയലിന് അവസരം കിട്ടിയത്.
