ബസുകളില് കയറി ഇറങ്ങി യാത്രക്കാരോട് ദൈവീക പ്രഭാഷണം നടത്തുന്നതിനിടെ പ്രഭാഷകന് കിട്ടിയത് മുട്ടന് പണി. പ്രഭാഷണം നടത്തുന്നതിനിടെ പ്രഭാഷകന്റെ പക്കല് നിന്നും കോണ്ടം താഴെ വീഴുകയായിരുന്നു. തുടര്ന്ന് ജനക്കൂട്ടം ഇയാളെ മര്ദ്ദിച്ച് അവശനാക്കി. തെക്കുപടിഞ്ഞാന് നൈജീരിയയിലെ അനാംബ്ര എന്ന സ്ഥലത്താണ് ഇത്തരത്തില് ഒരു സംഭവം നടന്നത്.
നൈജീരിയയിലെ ഒരു മാധ്യമമായ 'നൈജ ന്യൂസ്' ആണ് ഇക്കാര്യം റിപ്പോര്ട്ട് ചെയ്തത്. ഒരു ദൃക്സാക്ഷിയുടെ വിവരണം ഉള്പ്പെടെയായിരുന്നു നൈജ ന്യൂസ് റിപ്പോര്ട്ട് പുറത്തുവിട്ടത്. തിരക്കുള്ള നഗരത്തിലോടുന്ന പബ്ലിക് ബസില് വച്ചാണ് സംഭവം ഉണ്ടായത്. യാത്രക്കാര്ക്ക് സുരക്ഷിത യാത്രയും ദൈവാനുഗ്രഹവും നേര്ന്നുകൊണ്ട് ബസില് കയറിയ പ്രഭാഷകന് തുടര്ന്ന് ദൈവത്തെക്കുറിച്ച് സംസാരിക്കാന് തുടങ്ങി. ഇതിനിടെ യാത്രക്കാരില് ചിലര് ഇയാള്ക്ക് പണം നല്കുകയും ചെയ്തു.
ഇതിനിടെ കൈയ്യില് ഉണ്ടായിരുന്ന ബൈബിള് തുറന്നതോടെ അതിനുള്ളില് നിന്നും മൂന്ന് കോണ്ടം താഴേക്ക് വീണു. ഇത് കണ്ടതോടെ യാത്രക്കാര് പ്രഭാഷകനെ മര്ദ്ദിക്കുകയായിരുന്നു. മര്ദ്ദനമേറ്റയാളുടെ ചിത്രവും 'നൈജ ന്യൂസ്' പുറത്തുവിട്ടിട്ടുണ്ട്.
ദൈവീക പ്രഭാഷണം എന്ന പേരില് നിരവധി പേര് തട്ടിപ്പ് നടത്തുന്നുണ്ടെന്നും, യഥാര്ത്ഥത്തില് ദൈവമാര്ഗത്തില് സഞ്ചരിക്കുന്ന പ്രഭാഷകര് ഭിക്ഷാടനത്തിന് ഇറങ്ങില്ലെന്നും യാത്രക്കാര് അഭിപ്രായപ്പെട്ടതായും ദൃക്സാക്ഷിയുടെ വിവരണങ്ങളിലുണ്ട്. എന്തായാലും പ്രഭാഷകനെ മര്ദ്ദിച്ചവരില് രണ്ട് പേര് അറസ്റ്റിലായിട്ടുണ്ടെന്നാണ് പുതിയ വിവരം.
