ന്യുഡല്ഹി: ഡല്ഹി ഷഹീന്ബാഗില് സി.എ.എക്കെതിരായ പ്രതിഷേധ സമരത്തിനായി മാതാപിതാക്കള് കൊണ്ടുപോയ നാലു മാസം പ്രായമായ കുഞ്ഞ് മരണമടഞ്ഞ സംഭവത്തില് ഇടപെട്ട് സുപ്രീം കോടതി. ജനുവരി 30ന് തിങ്ങിനിറഞ്ഞ സമരപ്പന്തലില് കൊടുംതണുപ്പിലാണ് കുഞ്ഞ് മരണമടഞ്ഞത്. സംഭവത്തില് കേന്ദ്ര-ഡല്ഹി സര്ക്കാരുകള്ക്ക് സുപ്രീം കോടതി നോട്ടീസ് അയച്ചു.
നാലു മാസം പ്രായമുള്ള കുഞ്ഞിന് സമരത്തിന് പോകാന് കഴിയുമോയെന്ന് ചീഫ്ജസ്റ്റീസ് എസ്.എ ബോബ്ഡെ അധ്യക്ഷനായ ബെഞ്ച് ചൂണ്ടിക്കാട്ടി. ദേശീയ ധീരത പുരസ്കാര ജേതാവായ സെന് ഗുണ്രത്തന് സദവര്ത്തെ (12)യാണ് ഈ വിഷയം ചൂണ്ടിക്കാട്ടി ചീഫ് ജസ്റ്റീസിനിന് അയച്ച കത്തിന്റെ അടിസ്ഥാനത്തിലാണ് സ്വമേധയാ കേസെടുത്തത്.
മാതാപിതാക്കള്ക്കെപ്പം സമരത്തിനെത്തിയ മുഹമ്മദ് ജഹാന് എന്ന കുഞ്ഞാണ് സമരപ്പന്തലില് മരിച്ചത്. സ്വീഡീഷ് പരിസ്ഥിതി പ്രവര്ത്തകയായ ഗ്രേറ്റ തുണ്ബെര്ഗ് സമരത്തില് പങ്കെടുക്കുമ്പോള് കുട്ടിയായിരുന്നുവെന്ന് ഓര്ക്കണമെന്ന് പ്രതിഷേധക്കാരുടെ അഭിഭാഷകര് ചൂണ്ടിക്കാട്ടി. പരിസ്ഥിതി സമരത്തിന്റെ പേരില് നിരവധി രാജ്യാന്തര സമ്മാനങ്ങള് 13കാരിയായ ഗ്രേറ്റ ഇതിനകം നേടിയിട്ടുണ്ട്. ഷഹീന്ബാഗ് മേഖലയില് നിന്നുള്ള കുട്ടികളെ സ്കൂളുകളില് 'പാകിസ്താനി', 'ഭീകരര്' എന്നാണ് വിളിക്കുന്നതെന്നും അഭിഭാഷകര് കോടതിയുടെ ശ്രദ്ധയില്പെടുത്തി.
എന്നാല് അനാവശ്യ വാദങ്ങള് ഒഴിവാക്കണമെന്ന് ചീഫ് ജസ്റ്റീസ് പറഞ്ഞു. അനാവശ്യ വാദങ്ങള് ഉയര്ത്താനാണെങ്കില് വാദം കേള്ക്കുന്നത് നിര്ത്തും. ഇത് കോടതിയാണ്. മാതൃത്വത്തിന് അങ്ങേയറ്റം ആദരവ് ഞങ്ങള് നല്കുന്നു. കുട്ടികളുടെ കാര്യത്തില് വലിയ ആശങ്കയുണ്ട്. അവരോട് മോശമായി പെരുമാറരുതെന്നും കോടതി പറഞ്ഞു.
