തിരുവനന്തപുരം: നിയമസഭാ തെരഞ്ഞെടുപ്പിലെ കനത്തതോല്വിയേത്തുടര്ന്ന് സി.പി.എമ്മില് തലമുറമാറ്റത്തിനു കളമൊരുങ്ങുന്നു. സംസ്ഥാന സെക്രട്ടറി എം.വി. ഗോവിന്ദനും പ്രതിപക്ഷനേതാവ് പിണറായി വിജയനും സ്ഥാനമൊഴിഞ്ഞേക്കുമെന്നു സൂചന. പി. രാജീവ് പാര്ട്ടി സംസ്ഥാന സെക്രട്ടറിയും കെ.എന്. ബാലഗോപാല് പ്രതിപക്ഷനേതാവുമായേക്കും.
തെരഞ്ഞെടുപ്പ് തോല്വിക്കു കാരണമായ ഭരണവിരുദ്ധവികാരവും സ്ഥാനാര്ഥി നിര്ണയത്തിലെ വീഴ്ചയും ഗൗരവമായാണ് പോളിറ്റ് ബ്യൂറോ വിലയിരുത്തുന്നത്. നേതൃമാറ്റംഅടുത്ത മാസം രണ്ടാംവാരം ചേരുന്ന കേന്ദ്ര കമ്മിറ്റി ചര്ച്ചചെയ്യും. നിയമസഭാ തെരഞ്ഞെടുപ്പില് രണ്ടാം പിണറായി സര്ക്കാരിലെ ഭൂരിപക്ഷം മന്ത്രിമാരും പരാജപ്പെട്ടതിന്റെ ഉത്തരവാദിത്വത്തില്നിന്ന് ഇരുവര്ക്കും ഒഴിഞ്ഞുമാറാനാവില്ലെന്നാണ് പി.ബി. വിലയിരുത്തല്.
ജനവികാരം മനസിലാക്കി സ്ഥാനാര്ഥി നിര്ണയം നടത്തുന്നതില് ഗോവിന്ദന്റെ നേതൃത്വം പൂര്ണപരാജയമായി. മന്ത്രിമാരുടെ പ്രവര്ത്തനമികവ് വിലയിരുത്തുന്നതില് മുഖ്യമന്ത്രിയായിരുന്ന പിണറായിക്കും വീഴ്ചപറ്റി. പ്രതിപക്ഷനേതാവെന്ന നിലയിലും പിണറായിയുടെ പ്രകടനം പ്രതീക്ഷയ്ക്കൊത്ത് ഉയരുന്നില്ലെന്ന് ആരോപണമുണ്ട്. വീര്യംകുറഞ്ഞ മദ്യത്തിനു നികുതി ഇളവ് നല്കാനുള്ള നീക്കം നിയമസഭയില് സര്ക്കാരിനെതിരേ ആയുധമാക്കാനായില്ല. ഈ വിഷയത്തില് മുന്സര്ക്കാരിനെതിരേ ഭരണപക്ഷം ഉന്നയിച്ച ആരോപണങ്ങളെ പ്രതിരോധിക്കാനും കഴിഞ്ഞില്ല.
സി.എം.ആര്.എല്-എക്സാലോജിക് കേസില് പിണറായിയുടെ മകള് ടി. വീണയെ ഇ.ഡി. വിളിച്ചുവരുത്തി ചോദ്യംചെയ്തതു പാര്ട്ടി പ്രവര്ത്തകര്ക്കിടയില്പ്പോലും അവമതിപ്പുണ്ടാക്കി. കേസില് വീണ അറസ്റ്റിലായാല് പിണറായി പ്രതിപക്ഷനേതൃസ്ഥാനം ഒഴിയണമെന്ന ആവശ്യം ഭരണപക്ഷവും ബി.ജെ.പിയും ഉന്നയിക്കും. മകനെതിരേ കേസ് വന്നപ്പോള് സംസ്ഥാന സെക്രട്ടറി സ്ഥാനത്തുനിന്നു കോടിയേരിബാലകൃഷ്ണന് മാറിനിന്ന മാതൃക ചൂണ്ടിക്കാട്ടി സി.പി.എമ്മില്നിന്നുതന്നെ ഈ ആവശ്യമുയര്ന്നേക്കാം.
പാര്ട്ടിയുടെ താഴേത്തട്ടിലുള്ള സംഘടനാസംവിധാനം നിശ്ചലമായതാണ് തെരഞ്ഞെടുപ്പ് തോല്വിയുടെ ആഴം കൂട്ടിയതെന്നു ദേശീയനേതൃത്വം വിലയിരുത്തുന്നു. പ്രവര്ത്തകര്ക്കും അനുഭാവികള്ക്കുമുണ്ടായ അതൃപ്തി പരിഹരിക്കാന് ലോക്കല്, ബ്രാഞ്ച് തലങ്ങളില് അടിയന്തര ഇടപെടല് നടത്തണം. ജനകീയപ്രശ്നങ്ങളില്നിന്ന് അകന്ന പ്രാദേശികനേതാക്കളുടെ ശൈലി മാറ്റണം. തെറ്റുകള് തുറന്നുപറഞ്ഞ് ജനങ്ങളിലേക്ക് വീണ്ടും ഇറങ്ങിച്ചെല്ലാനാണ് കേരളഘടകത്തിനു പി.ബി. നല്കിയ നിര്ദേശം.
ജൂലൈ 11 മുതല് മൂന്നുദിവസം ചേരുന്ന പ്രത്യേക കേന്ദ്ര കമ്മിറ്റി യോഗം കേരളത്തിലെ തോല്വി വിശദമായി ചര്ച്ചചെയ്യും. പി.ബി. യോഗത്തില്
ജനറല് സെക്രട്ടറി എം.എ. ബേബി കരട് റിപ്പോര്ട്ട് അവതരിപ്പിച്ചു. പി.ബി. അംഗീകരിക്കുന്ന റിപ്പോര്ട്ട് കേന്ദ്ര കമ്മിറ്റി ചര്ച്ചചെയ്യും. നിയമസഭാ തെരഞ്ഞെടുപ്പിനുശേഷമുള്ള പശ്ചിമബംഗാളിലെ സ്ഥിതിയും പി.ബി. ചര്ച്ചചെയ്തു. സംഘടനാശാക്തീകരണത്തിന്റെ ഭാഗമായി ബംഗാളില് പാര്ട്ടി പ്ലീനം ചേരും.
ജി. അരുണ്
