നീണ്ട ഇടവേളയ്ക്ക് ശേഷം സുരേഷ് ഗോപിയുടെ ശക്തമായ തിരിച്ചു വരവായിരുന്നു അനൂപ് സത്യന് ചിത്രമായ 'വരനെ ആവശ്യമുണ്ട്' എന്നതിലൂടെ. ദുല്ഖര് സല്മാന് നായകനായ ചിത്രത്തില് കൈയ്യടി നേടിയത് സുരേഷ് ഗോപിയാണ്. അദ്ദേഹത്തിന്റെ നീണ്ട ഇടവേളക്ക് ശേഷമുള്ള തിരിച്ചു വരവ് പ്രേക്ഷകര് ഇരു കയ്യും നീട്ടി സ്വീകരിച്ചു. ചിത്രത്തില് സംവിധായകന് ജോണി ആന്റണിയും ഒരു പ്രധാന കഥാപാത്രത്തെ അവതരിപ്പിച്ചിരുന്നു.
സുരേഷ് ഗോപിയുടെ സഹായ മനസ്കതയെ കുറിച്ച് തുറന്നു പറയുകയാണ് ഇപ്പോള് ജോണി ആന്റണി. ഒരു മാധ്യമത്തിന് നല്കിയ അഭിമുഖത്തിലാണ് സുരേഷ് ഗോപി തന്റെ സുഹൃത്തിന്റെ കുഞ്ഞിന്റെ ചികിത്സയ്ക്കായി എല്ലാ സഹായവും ചെയ്തതിനെ കുറിച്ച് ജോണി ആന്റണി വെളിപ്പെടുത്തിയത്. '' സുഹൃത്തിന്റെ കുഞ്ഞിന്റെ ചികിത്സയ്ക്കായി ധാരാളം പണം ആവശ്യമായി വന്ന സാഹചര്യം ഉണ്ടായിരുന്നു. സഹായത്തിന് ആദ്യം വിളിച്ചത് സുരേഷ് ഗോപിയെ ആണ്. കുട്ടിയുടെ ചികിത്സയ്ക്കു പണം ആവശ്യപ്പെട്ട് കഴിഞ്ഞപ്പോള് വളരെ പെട്ടെന്നു തന്നെ പ്രധാനമന്ത്രിയുടെ ചികിത്സാ പദ്ധതിയില് നിന്നും സഹായം ലഭിക്കാനുള്ള എല്ലാ കാര്യങ്ങളും സുരേഷ് ഗോപി ചെയ്തു തന്നു.
കൂടാതെ ഒഴിവു സമയം കണ്ടെത്തി കുട്ടിയെ കാണാന് അദ്ദേഹം നേരിട്ട് വരികയും ചെയ്തു. ഇത്തരത്തിലുള്ള പ്രവര്ത്തികള് ചെയ്യുന്ന സുരേഷ് ഗോപി മികച്ച നടനെന്നതിലുപരി നല്ലൊരു മനുഷ്യനാണ്. 2001ല് പുറത്തിറങ്ങിയ സുന്ദരപുരുഷനെന്ന ചിത്രത്തിന് വേണ്ടി സഹസംവിധായകനായി പ്രവര്ത്തിക്കുമ്പോള് മുതലാണ് സുരോഷ് ഗോപിയുമായുള്ള ആത്മബന്ദം തുടങ്ങുന്നത്. അതാണിപ്പോള് വരനെ ആവശ്യമുണ്ടെന്ന സിനിമയിലെത്തി നില്ക്കുന്നത് '' - ജോണി ആന്റണി പറഞ്ഞു.
