രാത്രിയില് ഉള്ള യാത്രകളില് വാഹനാപകടത്തില് പെട്ട് മരണപ്പെടുന്നവരുടെ എണ്ണം ഒ്ാരോ ദിവസം ചെല്ലും തോറും കൂടി വരികയാണ്. പലപ്പോഴും ഡ്രൈവര് ഉറങ്ങി പോകുന്ന അപകടങ്ങളാണ് പറഞ്ഞ് കേള്ക്കുന്നത്. കഴിഞ്ഞ ദിവസം അവിനാശിയില് കെ എസ് ആര് ടി സി വോള്വോ ബസിലേക്ക് കണ്ടെയിനര് ലോറി ഇടിച്ചു കയറിയുണ്ടായ അപകടത്തില് 19 പേരാണ് മരിച്ചത്. കണ്ടെയ്നര് ലോറിയുടെ ഡ്രൈവര് ഉറങ്ങിയതാണ് അപകട കാരണം എന്ന് പറയപ്പെടുന്നു. ഈ വിഷയത്തില് ഇന്ഫോക്ലിനിക് പങ്കുവച്ച കുറിപ്പ് ശ്രദ്ധേയമാണ്. ഡോക്ടര് ജിനേഷ് പി എസ് ആണ് കുറിപ്പെഴുതിയിരിക്കുന്നത്.
ഫേസ്ബുക്ക് കുറിപ്പിന്റെ പൂര്ണരൂപം;
അപകടങ്ങള് പതിയിരിക്കുന്ന രാത്രികാല യാത്രകള്:
കഴിഞ്ഞ രണ്ടുമൂന്നു ദിവസങ്ങളില് ചില വാഹനാപകട വാര്ത്തകള് സമ്മാനിച്ച മരവിപ്പ് ചെറുതല്ല.
ഓരോ വര്ഷവും കേരളത്തില് വാഹനാപകടങ്ങളില് പെട്ട് 4200-ല് അധികം മരണങ്ങള് ഉണ്ടാവുന്നു. അതായത് ഒരു ദിവസം 12 പേര് മരിക്കുന്നു. നാം ഏറെ ഭയപ്പെടുന്ന, പ്രതിരോധ നടപടികള് സ്വീകരിക്കുന്ന നിപ്പയോ, കൊറോണയോ, എലിപ്പനിയോ, ഡെങ്കിപ്പനിയോ ഇത്രയും മരണങ്ങള് ഇവിടെ സൃഷ്ടിക്കുന്നില്ല എന്നോര്ക്കണം. ഈ മരണങ്ങളില് ബഹുഭൂരിപക്ഷവും സംഭവിക്കുന്നത് രാത്രിയിലാണ്, സന്ധ്യാസമയം കഴിഞ്ഞാണ്.
ഉത്തര്പ്രദേശ്, മഹാരാഷ്ട്ര, തമിഴ്നാട് സംസ്ഥാനങ്ങളില് ആണ് ഇന്ത്യയില് ഏറ്റവും കൂടുതല് റോഡ് അപകട മരണങ്ങള് റിപ്പോര്ട്ട് ചെയ്യപ്പെടുന്നത്. ബഹുഭൂരിപക്ഷം അപകടങ്ങളും ഹൈവേയില്. ഹൈവേയിലെ അപകടങ്ങളില് മരണസംഖ്യയും കൂടുതലാണ്, ബസ്സുകള് തമ്മിലോ ബസും ലോറിയും ആയോ ഉണ്ടാകുന്ന അപകടങ്ങളില് മരണ സംഖ്യ വളരെ കൂടുതലാണ്.
പല കാരണങ്ങള് കൊണ്ട് അപകടം സംഭവിക്കാം. വണ്ടിയുടെ മെക്കാനിക്കല് പ്രശ്നങ്ങള്, റോഡിലെ പ്രശ്നങ്ങള് തുടങ്ങി ഓടിക്കുന്ന വ്യക്തികളുടെ ആരോഗ്യപ്രശ്നങ്ങള് വരെയുള്ള ധാരാളം കാരണങ്ങള്.
1. ക്ഷീണം
രാത്രികാല അപകടങ്ങളുടെ പ്രധാന കാരണക്കാരിലൊന്നാണ് ക്ഷീണം.
വാഹനം ഓടിച്ചു കൊണ്ടിരിക്കുമ്പോള് ഉറങ്ങി പോകാനുള്ള സാധ്യത ഒട്ടും ചെറുതല്ല. ഏകാഗ്രതയിലും ജഡ്ജ്മെന്റിലും ഉണ്ടാകുന്ന പോരായ്മ റിഫ്ലക്സിനെ ബാധിക്കാം.
സാധാരണ ഉറങ്ങുന്ന സമയത്ത് ഡ്രൈവ് ചെയ്യുമ്പോഴും ആവശ്യത്തിന് ഉറക്കം ലഭിക്കാതെ ഡ്രൈവ് ചെയ്യുമ്പോഴും തുടര്ച്ചയായി കൂടുതല് സമയം ഉണര്ന്നിരുന്ന് വാഹനം ഓടിക്കുമ്പോഴും ഉറങ്ങി എണീറ്റ് ഉടനെതന്നെ വാഹനം ഓടിക്കുമ്പോഴും ഇടയ്ക്ക് വിശ്രമം എടുക്കാതെ തുടര്ച്ചയായി (2 മണിക്കൂറില് കൂടുതല്) വാഹനം ഓടിക്കുമ്പോഴും ക്ഷീണം ഉണ്ടാവാം.
പലപ്പോഴും നമ്മള് ഇത് തിരിച്ചറിയില്ല എന്നതാണ് പ്രശ്നം. എനിക്ക് ഇതുവരെ അപകടം പറ്റിയിട്ടില്ല അതുകൊണ്ട് ഇന്നും അപകടം പറ്റില്ല എന്നും ചിന്തിച്ചേക്കാം. ലക്ഷ്യത്തില് എത്താന് വളരെ കുറച്ചു ദൂരമേ ഉള്ളൂ, അതിനാല് ലക്ഷ്യ സ്ഥാനത്ത് എത്തിയ ശേഷം വിശ്രമിക്കാം എന്ന് തീരുമാനിക്കുന്നവരും വിരളമല്ല.
ക്ഷീണം എങ്ങനെ തിരിച്ചറിയാം ? ലക്ഷണങ്ങള്...
ഇടയ്ക്കിടെ കോട്ടുവാ ഇടുക, അറിയാതെ ലെയ്ന് മാറി പോവുക, കണ്ണുകള് കൂമ്പി വരിക, കാഴ്ച അവ്യക്തമാവുക, തല ഉയര്ത്തി വെക്കാന് ബുദ്ധിമുട്ട് തോന്നുക, ഇച്ഛാപൂര്വ്വമല്ലാതെ വേഗത കൂടുകയോ കുറയുകയോ ചെയ്യുക, തൊട്ടുമുന്പ് കഴിഞ്ഞുപോയ സ്ഥലങ്ങളെക്കുറിച്ച് ഓര്മ്മ ഇല്ലാതിരിക്കുക, ദിവാ സ്വപ്നം കാണുക.
എന്താണ് പരിഹാരം ?
ക്ഷീണം തോന്നിയാല് വിശ്രമിക്കുക എന്നത് മാത്രമാണ് പരിഹാരം. വാഹനം നിര്ത്തി 15 മിനിറ്റ് എങ്കിലും ഉറങ്ങാന് ശ്രമിക്കുക. കുറച്ചു നേരം പവര് നാപ് എടുത്താല് പോലും അപകടങ്ങളില് പെടാനുള്ള സാധ്യത വളരെയധികം കുറയും.
ദീര്ഘദൂര ഹൈവേകളില് സുരക്ഷിതമായ പവര് നാപ്പ് സൗകര്യങ്ങള് ഒരുക്കാന് ശ്രദ്ധ കൊടുക്കേണ്ട കാലം അതിക്രമിച്ചിരിക്കുന്നു. സുരക്ഷിതമായി വാഹനത്തിനുള്ളിലെങ്കിലും കുറച്ചുസമയം ഉറങ്ങാനുള്ള സൗകര്യവും പുറത്തിറങ്ങി മലമൂത്ര വിസര്ജനം ചെയ്യാനുള്ള സൗകര്യങ്ങളും മുഖം കഴുകാനും മറ്റുമുള്ള സൗകര്യങ്ങളും ഉണ്ടാവണം.
യാത്രയ്ക്ക് മുന്പേ ശ്രദ്ധിക്കാന് പറ്റുന്ന ചില കാര്യങ്ങള് ഉണ്ട്;
സ്ഥിരമായി ഉറങ്ങുന്ന സമയത്ത് ദീര്ഘദൂര യാത്ര ഒഴിവാക്കുക, ഉദാഹരണമായി രാത്രി പത്തു മുതല് രാവിലെ ആറുമണി വരെ. ഉറക്കത്തിന് കാരണമാകുന്ന മരുന്നുകള് ഉണ്ടെങ്കില് ശ്രദ്ധിക്കുക. ദീര്ഘ ദൂര യാത്രയ്ക്ക് മുന്പുള്ള ദിവസം നന്നായി ഉറങ്ങുക, നന്നായി വിശ്രമിക്കുക. സാധിക്കുമെങ്കില് യാത്രയില് ഒരാളെ കൂടെ കൂട്ടുക, ഡ്രൈവിംഗ് അറിയാവുന്ന ആളാണെങ്കില് മാറിമാറി ഓടിക്കുക. സംസാരിച്ചുകൊണ്ട് ഡ്രൈവ് ചെയ്യുക. യാത്രയില് ആവശ്യത്തിന് വിശ്രമം വേണം. ദീര്ഘസമയം കഠിന ജോലികള് ചെയ്തതിനുശേഷം ഉടനെയുള്ള യാത്ര ഒഴിവാക്കുക.
ഒരു കാര്യം കൂടി, ക്ഷീണം മൂലമുള്ള അപകടങ്ങള് രാത്രി മാത്രമല്ല പകലും സംഭവിക്കാം.
ദീര്ഘദൂര ബസുകളിലും ലോറികളിലും രണ്ട് ഡ്രൈവര്മാര് ഉണ്ടാകുന്നത് എപ്പോഴും നല്ലതാണ്.
2. മദ്യവും ലഹരിയും
വാഹനാപകടങ്ങളില് പ്രധാന കാരണങ്ങളില് ഒന്നാണ്.
ലിങ്ക്: https://m.facebook.com/story.php?story_fbid=2315577321893432&id=1056731331111377
3. അമിതവേഗത
അമിത വേഗത മൂലം അപകടത്തിനുള്ള സാധ്യത മാത്രമല്ല വര്ധിക്കുന്നത്, അപകടത്തില് പെടുമ്പോള് ഗുരുതരമായ പരിക്ക് പറ്റാനും മരണം സംഭവിക്കാനുമുള്ള സാധ്യതയും പതിന്മടങ്ങ് വര്ദ്ധിക്കുന്നു.
ലിങ്ക്: https://m.facebook.com/story.php?story_fbid=1604927306291774&id=1056731331111377
ബോധവല്ക്കരണം കൊണ്ടുമാത്രം ഒരു പരിഹാരം കാണാനാവില്ല എന്നുതന്നെ കരുതുന്നു. സ്പീഡ് ക്യാമറകളുടെ സാന്നിധ്യം വര്ധിപ്പിക്കണം. ശക്തമായ ഫൈന് ഈടാക്കണം. കേരളം വിട്ടാല് ഹൈവേകളില് വേഗത പരിശോധനാ സൗകര്യങ്ങള് താരതമ്യേന കുറവാണ് എന്നത് ഒരു പ്രശ്നം തന്നെയാണ്. അത് പരിഹരിക്കാന് രാജ്യവ്യാപകമായി തന്നെ ശ്രമങ്ങള് ഉണ്ടാവേണ്ടതുണ്ട്.
4. ഡിം ലൈറ്റ് ഉപയോഗം
രാത്രികാല യാത്രകളില് നാമെല്ലാം ഹൈ ബീം ലൈറ്റ് താല്പര്യപ്പെടുന്നവര് ആണ്. സ്വതവേ തന്നെ വിസിബിലിറ്റി കുറവായ രാത്രി സമയത്ത് ഹൈ ബീം വളരെ വലിയ സഹായമാണ്. പക്ഷേ എതിര്വശത്തു നിന്നുവരുന്ന ഡ്രൈവര്ക്ക് അത് വലിയൊരു ബുദ്ധിമുട്ടാണ്. പെട്ടെന്ന് കണ്ണിലേക്കൊരു ശക്തിയേറിയ പ്രകാശം വരുമ്പോള് കാഴ്ച്ചയെ ബാധിക്കുകയും അപകടം ഉണ്ടാവാനുള്ള സാധ്യതയും ഉണ്ടാവുന്നു. അതുകൊണ്ട് എതിര്വശത്തു നിന്ന് വണ്ടി വരുന്നുണ്ടെങ്കില് ഡിപ് ചെയ്തു നല്കേണ്ടതാണ്. ഇതൊരു റോഡ് മര്യാദ മാത്രമല്ല, സുരക്ഷയ്ക്ക് അത്യാവശ്യമുള്ള കാര്യം കൂടിയാണ്. ഏകദേശം 200 മീറ്റര് എങ്കിലും അകലത്തില് വാഹനം എത്തുമ്പോള് മുതല് ഡിപ് ചെയ്യണം.
എതിര് വശത്തുനിന്ന് വാഹനം വരുമ്പോള് മാത്രമല്ല ഡിം ലൈറ്റ് ഉപയോഗിക്കേണ്ടത്. നമ്മുടെ തൊട്ടുമുന്പില് വാഹനം ഉണ്ടെങ്കിലും ഡിം ലൈറ്റ് ഉപയോഗിക്കേണ്ടതാണ്. കാരണം റിയര്വ്യൂ മിററില് കൂടി ശക്തിയേറിയ പ്രകാശം പ്രതിഫലിക്കുകയും തൊട്ടു മുന്പിലുള്ള ഡ്രൈവര്ക്ക് അസ്വസ്ഥത ഉണ്ടാവുകയും ചെയ്യാന് സാധ്യതയുണ്ട്. അവിടെയും ഡിം ലൈറ്റ് നല്കാന് 200 മീറ്റര് അകലം പാലിക്കുന്നതാണ് നല്ലത്. പല ആധുനിക മോഡല് വണ്ടികളിലും ഹൈ ബീം പ്രശ്നം ഉണ്ടാകാതിരിക്കാന് അഡ്ജസ്റ്റബിള് റിയര്വ്യൂ മിറര് ഉണ്ട്. എങ്കിലും പിന്നില് നിന്നും വരുന്ന വണ്ടി ഡിം നല്കുന്നതാണ് സുരക്ഷിതം.
അതുപോലെതന്നെ ലൈറ്റ് റോഡില് പോയിന്റ് ചെയ്യുന്ന ദൂരം കൃത്യമായി അഡ്ജസ്റ്റ് ചെയ്യണം. പ്രകാശത്തിന്റെ തീവ്രതയും അഡ്ജസ്റ്റ് ചെയ്യാന് സാധിക്കുന്ന വാഹനങ്ങളുണ്ട്. നമുക്ക് ശരിയായ രീതിയില് വഴി കാണാന് വേണ്ടിയാണ് ഹെഡ്ലൈറ്റ് ഉപയോഗിക്കേണ്ടത്, എതിര്വശത്തു വരുന്ന വണ്ടി ഓടിക്കുന്ന ആളുടെ കണ്ണിലേക്ക് പോയിന്റ് ചെയ്യാന് വേണ്ടി ആവരുത്.
ഹൈ ബീം മൂലം ബുദ്ധിമുട്ട് ഉണ്ടായാല് എന്ത് ചെയ്യണം ?
വേഗത കുറയ്ക്കുക. വാഹനത്തിന്റെ ഇടതുവശത്തെ ലെയ്ന് ശ്രദ്ധിക്കുക, മറ്റു വാഹനങ്ങള് ഇല്ലെങ്കില് ഇടതുഭാഗത്തേക്ക് മാറാന് ശ്രമിക്കുക. അല്പ്പനേരം വണ്ടി നിര്ത്തി വിശ്രമിക്കുക. ഹൈബീം മൂലം ഉണ്ടായ കാഴ്ചാ ബുദ്ധിമുട്ട് മാറുന്നതുവരെ വിശ്രമിക്കുക.
5. മൊബൈല് ഫോണും മറ്റ് ഇലക്ട്രോണിക് ഉപകരണങ്ങളും
ഒരു കൈ കൊണ്ട് ചെവിയില് മൊബൈല് ഫോണ് വെച്ച് സംസാരിച്ചുകൊണ്ട് വാഹനമോടിക്കുന്നതും, വാഹനം ഓടിക്കുന്നതിനിടയില് മെസ്സേജ് ചെയ്യുന്നതും, നോക്കുന്നതും, ഫെയ്സ്ബുക്ക്-വാട്സ്ആപ്പ് സന്ദേശങ്ങള് നോക്കുന്നതും അപകടകരമാണ്. റോഡിലുള്ള ശ്രദ്ധ മാറാനും അപകടങ്ങളില് പെടാനുമുള്ള സാധ്യത വളരെ കൂടുതലാണ്.
ലെയ്ന് തെറ്റുക, ശരിയായ വഴി മിസ്സ് ആവുക, മുന്നിലുള്ള വാഹനത്തോട് വളരെയധികം ചേര്ന്നു പോവുക, ട്രാഫിക് സിഗ്നലുകള് തെറ്റുക എന്നീ കാര്യങ്ങള് മൊബൈല് ഉപയോഗിക്കുമ്പോള് വളരെ സാധാരണമാണ്. ഹാന്ഡ്സ് ഫ്രീ മോഡില് സംസാരിക്കുന്നത് പോലും അപകടസാധ്യത വര്ധിപ്പിക്കുന്നുണ്ട്. വളരെ അത്യാവശ്യമാണെങ്കില് മാത്രം വളരെ കുറച്ചുസമയത്തേക്ക് ഉപയോഗിക്കാം എന്ന് മാത്രം. എങ്കിലും ഇന്കമിംഗ് കോള് വരുകയാണെങ്കില് വാഹനം ഒതുക്കി നിര്ത്തിയ ശേഷം സംസാരിക്കുന്നതാണ് സുരക്ഷിതം.
മൊബൈല്ഫോണ് മാത്രമല്ല ഏകാഗ്രത നഷ്ടപ്പെടുത്തുന്ന ഇലക്ട്രോണിക് ഉപകരണങ്ങള്. സിഡി പ്ലെയര്, റേഡിയോ, കൂടെ യാത്ര ചെയ്യുന്ന വ്യക്തികളുടെ ഫോണ് സംഭാഷണം, വീഡിയോ സ്ക്രീന്, ജിപിഎസ് നാവിഗേഷന് സിസ്റ്റം, ടച്ച് സ്ക്രീന് ഉള്ള ഉപകരണങ്ങള്, ഫോണിലെ ജിപിഎസ് ഉപയോഗം തുടങ്ങി ഏകാഗ്രത നഷ്ടപ്പെടുത്തുന്ന ധാരാളം ഉപകരണങ്ങള് ഉണ്ട്. ബുദ്ധിപൂര്വ്വമായും സുരക്ഷിതമായും മാത്രം ഇവ ഉപയോഗിക്കുക.
വാഹനത്തിനുള്ളിലെ സംഭാഷണം പോലും ചിലപ്പോള് അശ്രദ്ധയ്ക്ക് കാരണമാകാം. ശ്രദ്ധ കൂടുതല് വേണ്ടിവരുന്ന തിരക്കേറിയ ട്രാഫിക് സാഹചര്യങ്ങളില് തീവ്രതയുള്ള സംഭാഷണങ്ങള് ഒഴിവാക്കുക. സങ്കീര്ണമായ സാഹചര്യങ്ങളില് കൂടെ യാത്രചെയ്യുന്നവരോട് മൊബൈല് ഫോണ് ഉപയോഗിക്കരുത് എന്ന് പറയുന്നതില് തെറ്റില്ല.
പ്രത്യേകിച്ച് ഡ്രൈവിംഗ് പഠിച്ചു കൊണ്ടിരിക്കുന്ന കാലത്തും, തുടക്കകാലത്തും ഇത്തരം പ്രവര്ത്തികള് ഒഴിവാക്കുക.
6. ശ്രദ്ധ നഷ്ടപ്പെടാനുള്ള മറ്റുകാരണങ്ങള്
വാഹനം ഓടിച്ചു കൊണ്ട് കഴിക്കുകയും കുടിക്കുകയും ചെയ്യുക, പുകവലിക്കുക, വഴിവക്കിലെ പരസ്യങ്ങളില് ശ്രദ്ധിക്കുക, വാഹനത്തിന് അകത്തുള്ള എന്തെങ്കിലും തിരയുക, എന്തെങ്കിലും സാഹചര്യം കൊണ്ട് കോപാകുലനാവുക, വാഹനത്തിനുള്ളില് മിറര് നോക്കി മുടി ചീവുകയും മറ്റും ചെയ്യുക തുടങ്ങിയ പല കാരണങ്ങള് കൊണ്ട് ശ്രദ്ധ നഷ്ടപ്പെടാന് സാധ്യതയുണ്ട്. ഇത്തരം സാഹചര്യങ്ങള് പരമാവധി ഒഴിവാക്കുക. വഴിവക്കിലെ വലിയ പരസ്യങ്ങള് മിക്കവാറും വളവുകളില് ആയിരിക്കും കാണുക, ഇത്തരം സന്ദര്ഭങ്ങളില് റോഡില് പ്രത്യേകം ശ്രദ്ധിക്കണം.
7. സീറ്റ് ബെല്റ്റ്
ഇരുചക്രവാഹനങ്ങളില് ഒഴികെ എല്ലായ്പ്പോഴും സീറ്റ് ബെല്റ്റ് ജീവന് രക്ഷാ ഉപാധിയാണ്. ആധുനിക ട്രക്കുകളിലും ലോറികളിലും വരെ സീറ്റ് ബെല്റ്റ് ഉണ്ട്. ദീര്ഘദൂര ബസുകളില് സീറ്റ് ബെല്റ്റ് ഉപയോഗം ഗുണകരമാകുമെന്ന് കരുതുന്നു. ചര്ച്ചകള് നടക്കേണ്ട ശ്രദ്ധിക്കേണ്ട മേഖലയാണ്.
മുന്പ് എഴുതിയ ലേഖനത്തിന്റെ ലിങ്ക്: https://m.facebook.com/story.php?story_fbid=1597324863718685&id=1056731331111377
8. ഹെല്മെറ്റ് - ഇരുചക്രവാഹന യാത്രകളിലെ ജീവന് രക്ഷാ ഉപാധി
മുന്സീറ്റില് ഇരിക്കുന്നവര് മാത്രമല്ല പിന്സീറ്റില് ഇരിക്കുന്നവരും ഹെല്മെറ്റ് ധരിക്കേണ്ടതുണ്ട്. ഇരുചക്ര വാഹന അപകടങ്ങളില് മരണപ്പെടുന്നതില് ചെറുതല്ലാത്ത ശതമാനം പിന്സീറ്റില് യാത്ര ചെയ്യുന്നവരാണ്.
ലിങ്ക്: https://m.facebook.com/story.php?story_fbid=1602759966508508&id=1056731331111377
9. ലെയ്ന് ഡിസിപ്ലിന്
പകലായാലും രാത്രിയായാലും വളരെ ശ്രദ്ധിക്കേണ്ട കാര്യമാണ്, പ്രത്യേകിച്ച് ഹൈവേകളില്. കൃത്യമായി ഇന്ഡിക്കേറ്റര് ഉപയോഗിച്ച് സിഗ്നല് നല്കിയതിനു ശേഷം മാത്രമേ ലെയ്ന് മാറാവൂ. വിസിബിലിറ്റി കുറവായ രാത്രികാലങ്ങളില് കൂടുതല് ശ്രദ്ധ വേണം.
10. ടെയില് ഗേറ്റിങ്
മുന്നില് പോകുന്ന വാഹനങ്ങളുടെ തൊട്ടു പിറകെ പോകുന്നത് അപകടകരമാണ്. മുന്പില് പോകുന്ന വാഹനം ബ്രേക്ക് ചവിട്ടിയാല് പിന്നീടുള്ള വാഹനം വളരെ അടുത്താണെങ്കില് തിരിച്ചറിയാന് ബുദ്ധിമുട്ടും. പിന്നീടുള്ള വാഹന ബ്രേക്ക് ചവിട്ടിയാല് പോലും ചിലപ്പോള് മുന്നിലുള്ള വാഹനത്തെ ഇടിച്ചു എന്നിരിക്കും.
മുന്നിലുള്ള വാഹനവുമായി രണ്ട് സെക്കന്ഡ് എങ്കിലും ഗ്യാപ്പ് ഇടണം. അതായത് രണ്ട് സെക്കന്ഡ് കൊണ്ട് വാഹനം സഞ്ചരിക്കുന്ന ദൂരം എങ്കിലും മുന്പിലുള്ള വാഹനവുമായി ഗ്യാപ്പ് ഉണ്ടാവണം. മുന്പിലുള്ള വാഹനവുമായി ഒരു വാഹനത്തിന്റെ അകലം ഗ്യാപ്പ് മതി എന്ന ചിന്ത തെറ്റാണ്. മുമ്പിലുള്ള വാഹനവുമായി സുരക്ഷിതമായ യാത്രയ്ക്ക് സ്വീകരിക്കേണ്ട ഉണ്ട് അകലം വണ്ടികളുടെ വേഗതയെ ആശ്രയിച്ചാണ് നിശ്ചയിക്കേണ്ടത്. ഉദാഹരണമായി രണ്ട് വാഹനങ്ങള് 60 കിലോമീറ്റര് സ്പീഡില് സഞ്ചരിക്കുമ്പോള് ഉണ്ടാവേണ്ട സുരക്ഷിതമായ അകലത്തേക്കാള് കൂടുതല് അകലം വേണം 90 കിലോമീറ്റര് സ്പീഡില് സഞ്ചരിക്കുമ്പോള്.
11. വാഹനങ്ങളുടെ മെയിന്റനന്സ്
ദീര്ഘദൂര യാത്രകള്ക്ക് മുന്പ് വാഹനങ്ങള് കൃത്യമായി പരിശോധിക്കുക. ടയര് സുരക്ഷിതമാണോ എന്ന് പ്രത്യേകം പരിശോധിക്കണം. ടയറിന്റെ കാര്യത്തില് യാതൊരു കാരണവശാലും റിസ്ക് എടുക്കരുത്. വാഹനം യഥാസമയം മെയിന്റനന്സ് ചെയ്തു എന്ന് ഉറപ്പുവരുത്തുക. മെയിന്റനന്സ് നടത്തുമ്പോള് ബ്രേക്ക്, അലൈന്മെന്റ്, മറ്റ് സുരക്ഷാമാനദണ്ഡങ്ങള് ഉണ്ടെങ്കില് അവയും പ്രത്യേകം പരിശോധിക്കുക.
12. ഇതൊക്കെ നമുക്ക് ചെയ്യാന് സാധിക്കുന്ന കാര്യങ്ങള് ആണെങ്കില് മറ്റു ചിലത് നമുക്ക് ഒരിക്കലും ചെയ്യാന് സാധിക്കുന്ന കാര്യങ്ങളല്ല. അത് ഭരിക്കുന്ന സര്ക്കാര് ചെയ്യേണ്ട കാര്യങ്ങളാണ്.
കഴിഞ്ഞ ദിവസം ഒരു സുഹൃത്ത് വാഹനാപകടത്തില് പെട്ട ചിത്രം കണ്ടിരുന്നു. ഹൈറേഞ്ചില് ആണ്, റോഡിന് വശത്ത് കൊക്കയോട് ചേര്ന്നുള്ള റിഫ്ലക്ടറോട് കൂടിയ മെറ്റല് കൈവരി ചെറിയൊരു ഭാഗത്ത് മാത്രം ഡിഫക്ട് ആയി കാണുന്നു. വിസിബിലിറ്റി കുറഞ്ഞ രാത്രികാലങ്ങളില് മഞ്ഞ് ഉണ്ടെങ്കില് അപകടം പറ്റാന് ഇത് മാത്രം മതിയാവും. മറ്റൊന്ന് റോഡ് സാഹചര്യങ്ങളാണ്. റോഡിലെ ഗട്ടറുകള്, അശാസ്ത്രീയമായ ജംഗ്ഷനുകള്, ട്രാഫിക് സിഗ്നലിന്റെ അഭാവം ഇങ്ങനെ പല കാരണങ്ങള് കൊണ്ട് അപകടം ഉണ്ടാവാം. ഇങ്ങനെയുള്ള പ്രശ്നങ്ങള് പരിഹരിക്കാന് സര്ക്കാര് മുന്കൈയെടുക്കുക കൂടി വേണം.
എഴുതിയത്: Dr. Jinesh P S
Info Clinic
#RTA, #Road, #Traffic, #Accident, #Incident
