തിരുവനന്തപുരം: സാങ്കേതികസര്വകലാശാലയില് അദാലത്ത് സംഘടിപ്പിച്ചതിന് മന്ത്രി കെ.ടി.ജലീലിനെതതിരെ ഗവര്ണര് ആരിഫ് മുഹമ്മദ് ഖാന്റെ റിപ്പോര്ട്ട്. സര്വകലാശാല അധികൃതര്ക്ക് നിര്ദേശങ്ങളും ശുപാര്ശകളും നല്കാനായി അദാലത്തുകള് സംഘടിപ്പിക്കാമെന്ന് സര്വകലാശാല ചട്ടങ്ങള് അനുശാസിക്കുന്നില്ലെന്നും ഗവര്ണറുടെ റിപ്പോര്ട്ടില് വ്യക്തമാക്കുന്നു. സര്വകലാശാലയുടെ ആഭ്യന്തര കാര്യങ്ങളില് സര്ക്കാര് ഇടപെടരുതെന്നും ഗവര്ണര് റിപ്പോര്ട്ടില് ചൂണ്ടിക്കാട്ടുന്നു.
മന്ത്രി കെ.ടി ജലീലും പ്രൈവറ്റ് സെക്രട്ടറിമാരും സര്വകലാശാല ഉദ്യോഗസ്ഥരും പങ്കെടുത്ത് അദാലത്ത് സംഘടിപ്പിച്ചതും തീരുമാനങ്ങള് കൈകൊണ്ടതും ചട്ടവിരുദ്ധം ആണെന്നാണ് റിപ്പോര്ട്ടില് പറയുന്നത്. അദാലത്ത് സംഘടിപ്പിച്ചതും തോറ്റ ബിടെക് വിദ്യാര്ത്ഥിയെ വീണ്ടും മൂല്യനിര്ണയം നടത്തി വിജയിപ്പിക്കാന് തീരുമാനിച്ചതും ചോദ്യം ചെയ്ത് സേവ് യൂണിവേഴ്സിറ്റി ക്യാമ്പയിന് കമ്മിറ്റി ഗവര്ണര്ക്കു പരാതി നല്കിയിരുന്നു.
സര്വകലാശാല സ്വയംഭരണ സ്ഥാപനം ആയതുകൊണ്ട് സര്വകലാശാലയുടെ ആഭ്യന്തരകാര്യങ്ങളില് സംസ്ഥാന സര്ക്കാര് ഇടപെടാന് പാടില്ലെന്ന 2003 ലെ സുപ്രീംകോടതി ഉത്തരവ് ചൂണ്ടിക്കാട്ടിയാണ് ചട്ടവിരുദ്ധം റിപ്പോര്ട്ടില് തുറന്നുകാടട്ടിയിരിക്കുന്നത്. മുന്നോട്ട് ചട്ടങ്ങളും നടപടിക്രമങ്ങളും യൂണിവേഴ്സിറ്റി അധികൃതര് കൃത്യമായി പാലിക്കണമെന്നും ചാന്സലര് കൂടിയായ ഗവര്ണര് വ്യക്തമാക്കിയിട്ടുണ്ട്.
അതേസമയം തോറ്റ വിദ്യാര്ത്ഥിയുടെ ഉത്തരക്കടലാസ് മൂല്യനിര്ണയം നടത്തിയ അദാലത്ത് തീരുമാനത്തില് വിദ്യാര്ത്ഥിയുടെ ഭാവിയെ കരുതി ഇടപെടുന്നില്ലെന്നും ഗവര്ണര് വ്യക്തമാക്കിയിട്ടുണ്ട്. എന്നാല് ഇതൊരു കീഴ്വഴക്കമായി കാണരുതെന്നും ഉത്തരവില് ഗവര്ണര് വ്യക്തമാക്കുന്നുണ്ട്.
