കൊച്ചി: അഭിഭാഷകവൃത്തിയില് 26 വര്ഷത്തെ പരിചയം, സൈബര് നിയമങ്ങളില് അഗാധ പാണ്ഡിത്യം. മുംബൈയില്നിന്നുള്ള എന്.എസ്. നപ്പിനൈ എന്ന അഭിഭാഷകയെ സര്ക്കാര് സ്പ്രിങ്ളര് കേസ് ഏല്പ്പിച്ചതിനു പ്രധാനകാരണം ഇവയാണ്. നപ്പിനൈ സംസ്ഥാനസര്ക്കാരിന്റെ നിരവധി ഐടി അധിഷ്ഠിത പദ്ധതികളില് ഭാഗമായിട്ടുണ്ട്.
സുപ്രീം കോടതിയിലും ബോംബെ ഹൈക്കോടതിയിലും സൈബര് കേസുകളില് മാത്രം ഹാജരാകാറുള്ള നപ്പിനൈ, കേന്ദ്ര സര്ക്കാരിനെതിരേയുള്ള പ്രജ്ജ്വല കേസില് സുപ്രീം കോടതിയുടെ അമിക്കസ് ക്യൂറിയായി പ്രവര്ത്തിച്ചിട്ടുണ്ട്. കുട്ടികള്ക്കെതിരേയുള്ള ലൈംഗിക അതിക്രമം, ഇന്റര്നെറ്റിലൂടെയുള്ള ചൈല്ഡ് പോണ് വ്യാപനം തുടങ്ങിയവ തടയുന്നതിനുള്ള മാര്ഗങ്ങള് കണ്ടെത്താന് നിയോഗിച്ച സാങ്കേതിക സമിതിയില് അംഗമായിരുന്നു. ആധാര് കേസില് സുപ്രീംകോടതി ഭരണഘടനാ ബെഞ്ചിനു മുന്നില് കേന്ദ്ര സര്ക്കാരിനെതിരേ ഹാജരായിട്ടുണ്ട്.
"ടെക്നോളജി ലോസ് ഡീകോഡഡ്" എന്ന എന്.എസ്. നപ്പിനൈയുടെ പുസ്തകം സെബര് നിയമങ്ങളെ വളരെ വിശദമായി വിശകലനം ചെയ്യുന്നു. ടെക്നോളജി ലോ ഫോറം എന്ന സംഘടനയുടെ സ്ഥാപകാംഗങ്ങളിലൊരാളാണ്. സൈന്യം, പോലീസ്, രഹസ്യാന്വേഷണ വിഭാഗം തുടങ്ങിയവര്ക്കു നിയമപരിശീലനം നല്കുന്നതില് നപ്പിനൈയുടെ സേവനം പ്രയോജനപ്പെടുത്താറുണ്ട്. സൈബര് ലോ സംബന്ധമായ രാജ്യാന്തര, ദേശീയ സെമിനാറുകളില് പ്രഭാഷകയായിട്ടുണ്ട്.
ജനീവ ആസ്ഥാനമായ വേള്ഡ് ഇന്റലക്ച്വല് പ്രോപ്പര്ട്ടി ഓര്ഗനൈസഷനില്നിന്നു ബൗദ്ധികസ്വത്തവകാശം സംബന്ധിച്ച കേസുകളില് മാധ്യസ്ഥത്തിനുള്ള ഉന്നതപരിശീലനം നേടി.
ഇന്റലക്ച്വല് പ്രോപ്പര്ട്ടി അഥവാ ബൗദ്ധികസ്വത്തവകാശ രംഗത്തെ ഉന്നതപഠനത്തിന് ശേഷം ബ്രിട്ടനിലെ ക്രാന്ഫീല്ഡ് സര്വകലാശാലയുടെ ഷെവനിങ് സ്കോളര്ഷിപ്പോടെ സൈബര് സെക്യൂരിറ്റി ആന്ഡ് സൈബര് പോളിസീസ് എന്ന വിഷയത്തില് ഡിപ്ലോമ നേടി. അമേരിക്കയിലെ സ്റ്റാന്ഫോര്ഡ് സര്വകലാശാലയില് നിന്ന് സി.ഡി.ഡി.ആര്.എല്. ഫെലോഷിപ്പ് നേടിയ അവര് ഡെമോക്രസി ഡെവലപ്പ്മെന്റ് ആന്ഡ് റൂള് ഓഫ് ലോ എന്ന പ്രോഗ്രാമും പൂര്ത്തിയാക്കി. ബൗദ്ധിക സ്വത്തവകാശം, സൈബര് പോളിസി വിഷയങ്ങളിലെ എണ്ണംപറഞ്ഞ വിദഗ്ധരിലൊരാളാണ് അഡ്വ. നപ്പിനൈ.
