റോം: ക്രിസ്ത്യാനോ റൊണാള്ഡോയുടേയും പിയര്ലൂജി ബഫന്റേയും യുവന്റസിനെ കലാശപ്പോരാട്ടത്തില് വീഴ്ത്തി നാപ്പോളി കോപ്പാ ഇറ്റാലിയ ഉയര്ത്തി. സാധാരണ സമയത്തും അധികസമയത്തും ഇരു ടീമും ഗോളടി മറന്നതിനാല് പെനാല്റ്റിയില് ആയിരുന്നു വിധി നിര്ണ്ണയിക്കപ്പെട്ടത്. 4-2 നായിരുന്നു യുവന്റസിനെ ഷൂട്ടൗട്ടില് നാപ്പോളി മറികടന്നത്.
സൂപ്പര്താരം ക്രിസ്ത്യാനോ റൊണാള്ഡോയുടെ കരിയറിലെ 32 ാം കിരീടം എന്ന സ്വപ്നമാണ് നാപ്പോളി പ്രതിരോധത്തില് തട്ടിവീണത്. ഷൂട്ടൗട്ടില് അര്ജന്റീന സൂപ്പര്താരം ഡെയ്ബാലയുടെ കിക്ക് നാപ്പോളി ഗോളി അലക്സ് മെറേറ്റ് രക്ഷപ്പെടുത്തിയപ്പോള് ഡാനിലോയുടെ കിക്ക് ബാറിന് മുകളിലൂടെയാണ് പറന്നത്. ആളും ആരവവുമില്ലാതെ അടഞ്ഞ ഒളിമ്പിക്കോ സ്റ്റേഡിയത്തില് മാനേജര് എന്ന നിലയില് മുന് ഇറ്റാലിയന് താരം ഗെന്നാരോ ഗട്ടൂസോ നാപ്പോളിക്കായി ആദ്യ കിരീടം യര്ത്തി.
നേരത്തേ കളിക്കാരന് എന്ന നിലയില് സീരി എ, ചാംപ്യന്സ് ലീഗ് എന്നിവ നേടിയിട്ടുള്ള ഗട്ടുസോ ലോകകപ്പ് നേടിയ ഇറ്റാലിയന് ടീമിന്റെ മിഡ്ഫീല്ഡറും ആയിരുന്നു. 2017 ല് എസി ബിലാനില് കളിക്കുമ്പോള് യുവന്റസിനോട് 4-0 ന് ചാംപ്യന്സ് ലീഗ് ഫൈനലില് പരാജയപ്പെട്ടിരുന്നു. മറുവശത്ത് യുവന്റസ് പരിശീലകന് മൗറീഷ്യോ സാറിക്ക് ഇത് രണ്ടാം കപ്പാണ് നഷ്ടപ്പെടുത്തത്. സീസണിന്റെ തുടക്കത്തില് ലാസിയോയോട് പരാജയപ്പെട്ട അവര്ക്ക് സൂപ്പര്കപ്പ് നഷ്ടമായിരുന്നു.
