ന്യൂഡല്‍ഹി: ലഡാക്കിന് പിന്നാലെ ഇന്ത്യയുടെ അരുണാചല്‍ പ്രദേശ് ഉന്നമിട്ട് ഭുട്ടാനുമായി ചൈനയ്ക്ക് അതിരുതര്‍ക്കം. അരുണാചല്‍ പ്രദേശുമായി അതിര്‍ത്തി പങ്കിടുന്ന കിഴക്കന്‍ മേഖലയോട് ചേര്‍ന്നുള്ള പ്രദേശത്താണ് തര്‍ക്കം. 'തെക്കന്‍ ടിബറ്റ്' എന്ന പേരിട്ടാണ് അതിരു കയ്യേറ്റം ചൈന നടത്തുന്നത്. ഇന്ത്യയുടെ സൗഹൃദരാഷ്ട്രങ്ങളുടെ പട്ടികയില്‍ പെടുന്ന രാജ്യമായ ഭൂട്ടാനുമായുള്ള തര്‍ക്കങ്ങള്‍ അരുണാല്‍ പ്രദേശില്‍ കണ്ണ് വെച്ചാണെന്നാണ് രാഷ്ട്രീയ നിരീക്ഷകര്‍ കരുതുന്നത്.
ഇവിടം പൂര്‍ണ്ണമായും തെക്കന്‍ ടിബറ്റിന്റെ ഭാഗമാണെന്നാണ് ചൈനയുടെ വാദം. ജൂണില്‍ നടന്ന പരിസ്ഥിതിയുമായി ബന്ധപ്പെട്ട ആദ്യ ഉച്ചകോടിയില്‍ ഇന്ത്യയുടെ സാന്നിദ്ധ്യത്തിലാണ് ചൈനീസ് വിദേശകാര്യ മന്ത്രാലയം കിഴക്കന്‍ മേഖലയില്‍ ഭൂട്ടാനുമായി അതിര്‍ത്തി തര്‍ക്കമുണ്ടെന്ന് പറഞ്ഞത്. ഇത് പലരെയും ഞെട്ടിച്ചിരുന്നു. ഇന്ത്യയുമായി ദശകങ്ങളായി നില നില്‍ക്കുന്ന അതിര്‍ത്തി സംഘര്‍ഷത്തിനൊപ്പമാണ് ചൈന ചെറു രാജ്യമായ ഭൂട്ടാനുമായും തര്‍ക്കത്തിന് മുതിര്‍ന്നിരിക്കുന്നത്.
2006 ല്‍ ഇന്ത്യയും ഭൂട്ടാനും ഒപ്പുവെച്ച അതിരില്ലാ കരാറിനെ ചൈന എതിര്‍ത്തിരുന്നു. അതിന് കാരണം കിഴക്കന്‍ അതിരില്‍ ഭൂട്ടാന്‍ അരുണാല്‍ പ്രദേശുമായി അതിര്‍ത്തി പങ്കിടുന്ന മേഖല ലക്ഷ്യമിട്ടാണെന്നാണ് വിലയിരുത്തല്‍. എന്നാല്‍ ഭൂട്ടാനുമായി കിഴക്കന്‍, പടിഞ്ഞാറന്‍, മദ്ധ്യ ഭാഗങ്ങളില്‍ അതിര്‍ത്തി തര്‍ക്കമുണ്ടെന്ന് കഴിഞ്ഞയാഴ്ച ചൈന പ്രസ്താവന പുറത്തിറക്കിയിരുന്നു. ഇതിനൊപ്പം ചൈനാ - ഭൂട്ടാന്‍ അതിര്‍ത്തി തര്‍ക്കത്തില്‍ മൂന്നാമന്‍ കൈകടത്തേണ്ട എന്നും ചൈന പറഞ്ഞിരുന്നു.
അതേസമയം ഈ തര്‍ക്കം ഇന്നോ ഇന്നലെയോ തുടങ്ങിയതായിരുന്നില്ല എന്നും ഇന്ത്യാ - ചൈനാ ബന്ധം വഷളായി നില്‍ക്കുന്ന സാഹചര്യത്തില്‍ ചൈന ഇങ്ങിനെ പ്രതികരിക്കുന്നത് വളരെ പ്രാധാന്യമുണ്ടെന്നുമാണ് വിലയിരുത്തല്‍. ഒരേ സമയം രണ്ടു രാജ്യങ്ങളെയും സമ്മര്‍ദ്ദപ്പെടുത്തുകയാണ് ചൈന ഇതിലൂടെ ലക്ഷ്യമിടുന്നത്. 20 വര്‍ഷം മുമ്പ് അതിര്‍ത്തി തര്‍ക്കം ചൈനയും ഭൂട്ടാനും തമ്മില്‍ പറഞ്ഞു തീര്‍ത്തതാണ്. എന്നാല്‍ ഇപ്പോള്‍ ഇത് ഉയര്‍ന്നു വരാന്‍ കാരണം ഇന്ത്യയാണെന്നും രാഷ്ട്രീയ വിദഗ്ദര്‍ വിലയിരുത്തുന്നു. ഭൂട്ടാനും ചൈനയും തമ്മില്‍ നയതന്ത്ര ബന്ധം ഇല്ലാതാക്കുന്നത് ഇന്ത്യയാണെന്നാണ് ചൈന പതിവായി കുറ്റപ്പെടുത്തുന്നത്.
2018 ജൂലൈയില്‍ വിദേശകാര്യ മന്ത്രി കോംഗ് സുവാന്‍യു ചൈനയില്‍ നിന്നും ഭൂട്ടാന്‍ സന്ദര്‍ശിക്കാന്‍ എത്തിയിരുന്നു. ചൈനയുടെ ഇന്ത്യന്‍ നയതന്ത്ര ഉദ്യോഗസ്ഥന്‍ ലിയു സാവോഹുയി ആയിരുന്നു കൂടെ വന്നത്. ചൈന ഭൂട്ടാനുമായുള്ള നയതന്ത്ര, സൗഹൃദ ബന്ധങ്ങള്‍ക്ക് വളരെ പ്രാധാന്യം നല്‍കുന്നു. ഭൂട്ടാന്റെ പരമാധികാരം, സ്വാതന്ത്ര്യം, അവരുടെ ദേശീയ സാഹചര്യങ്ങള്‍, രാഷ്ട്രീയം, വിദേശനയത്തിന്റെ കാര്യത്തിലുള്ള സ്വാതന്ത്ര്യം എന്നിവയെല്ലാം തങ്ങള്‍ വില മതിക്കുന്നു എന്നാണ് ചൈന കഴിഞ്ഞയാഴ്ച പുറത്തു വിട്ടിരിക്കുന്ന പ്രസ്താവനയില്‍ പറഞ്ഞിരിക്കുന്നത്.
Comments