മാഡ്രിഡ്: ഒരു കളി കൂടി ബാക്കി നില്ക്കേ സ്പാനിഷ് ലീഗില് കിരീടം റയല് മാഡ്രിഡ് തിരിച്ചുപിടിച്ചു. ഇന്നലെ നടന്ന മത്സരത്തില് ഫ്രഞ്ച് ഇതിഹാസതാരം സിനഡിന് സിഡാന്റെ ടീം വിയ്യാ റയലിനെതിരേ വിജയം നേടുകയും നിലവിലെ ചാംപ്യന്മാരായ ബാഴ്സിലോണ ഒസാസുനയോട് 2-1 ന് തോല്ക്കുകയും ചെയ്തതോടെയാണ് റയലിന് ഒരു മത്സരം കൂടി കളിക്കാന് ബാക്കിയിരിക്കെ തന്നെ കിരീടം ഉയര്ത്താനായത്. 34 ാം തവണയാണ് റയല് ലാലിഗയില് കിരീടം ചൂടുന്നത്.
വിയ്യാറയലിനെ 2-1 നായിരുന്നു റയല് തോല്പ്പിച്ചത്. ഈ സീസണില് ലീഗില് തുടര്ച്ചയായി പത്താം ജയമായിരുന്നു. ഇരട്ടഗോളുകള് കുറിച്ച് ബെന്സേമ കളിയില് ഹീറോയായപ്പോള് വിസെന്റെ ഇബോറ വിയ്യാറയലിന്റെ ഗോള് നേടി. ലഗാനസിനെതിരേയാണ് റയലിന്റെ അവസാന മത്സരം. കോവിഡ് പ്രതിസന്ധിയില് കളി താല്ക്കാലികമായി നിര്ത്തി വെച്ച ശേഷം പുനരാരംഭിച്ചപ്പോള് മറ്റൊരു റയല് മാഡ്രിഡിനെയാണ് ആരാധകര് കണ്ടത്. സിഡാന് കീഴില് അവര് തുടര്ച്ചയായി പത്തു മത്സരങ്ങളിലും ജയിച്ചു കയറി. സിഡാന് വിടപറഞ്ഞ കഴിഞ്ഞ സീസണില് കിരീടം നേടിയ ബാഴ്സിലോണയുമായി 19 പോയിന്റ് പുറകിലായിരുന്നു റയല്. ഈ മാര്ച്ചിലാണ് സിഡാന് വീണ്ടും ടീമിന്റെ ചുമതല ഏറ്റെടുത്തത്.
ഡിഫന്സും അറ്റാക്കിംഗും ഒരുമിപ്പിക്കുന്ന സിഡാന് ശൈലി റയലിന്റെ കളിയില് സ്ഥിരത കൊണ്ടുവന്നു. ഈ സീസണില് 37 കളികളില് അവര് വഴങ്ങിയത് 23 ഗോളുകളാണ്. കഴിഞ്ഞ സീസണീല് 46 ഗോളുകള് വഴങ്ങിയ റയല് അതിന് മുമ്പത്തെ സീസണില് 44 ഗോളുകള് വഴങ്ങി. കരിം ബെന്സേമ ഉജ്വല പ്രകടനം നടത്തിയപ്പോള് സീസണിലെ ടോപ്പ് സ്കോററായ മെസ്സിക്ക് തൊട്ടു പിന്നില് രണ്ടാമനായി. 21 ഗോളുകള് നേടിയ ബെന്സേമ എട്ടെണ്ണത്തിന് വഴിയൊരുക്കി. നായകന് റാമോസും ഗോളുകള് അടിച്ചുകൂട്ടി. പത്തു ഗോളുകള് നേടിയ റാമോസ് ടീമിലെ രണ്ടാമത്തെ മികച്ച ഗോള് സ്കോററായി. ആറ് പെനാല്റ്റി ഗോളുകളാണ് കുറിച്ചത്.
പരിചയസമ്പന്നരെയും യുവാക്കളെയും ഒരുമിപ്പിക്കുന്ന സിദാന് മാജിക്കാണ് വിജയം നേടിയത്. റാമോസ് (34), മോഡ്രിക് (34) ബെന്സേമ (32) എന്നിവര് പ്രായത്തില് മുപ്പതുകള് പിന്നിടുമ്പോള് വിനീഷ്യസ്, റോഡ്രിഗോ, വാല്വെര്ദേ എന്നിവരില് പുതുനിരയെയാണ് സിഡാന് സൃഷ്ടിച്ചത്. വാല്വെര്ദേ ഈ സീസണില് 42 മത്സരങ്ങളിലാണ് റയലിനായി ഇറങ്ങിയത്. സിഡാന് ക്ളബ്ബില് തുടരുമെന്നാണ് പ്രതീക്ഷിക്കുന്നതെന്നാണ് നായകന് സെര്ജിയോ റാമോസ് പറഞ്ഞത്.
