കൊച്ചി : ഗ്രാമഫോണ് കാലത്തുനിന്ന് മലയാളിയുടെ സംഗീതപ്രേമത്തെ കാസറ്റുകളിലേക്കു പറിച്ചുനട്ടയാള്... പിന്നീട് ഹിറ്റ് സിനിമകളുടെ നിര്മാതാവ്.... ഇങ്ങനെ മാറുന്ന കാലത്തിനൊപ്പം പുതിയ സംരംഭങ്ങളിലേക്ക് കൂടുമാറിയ സംരംഭകനാണ് ജോണി സാഗരിക.
ഇപ്പോഴിതാ ഈ കോവിഡ് കാലത്തും ആ പതിവ് 'മാറ്റത്തിന്’ മാറ്റം വരുത്താതെ ജോണി തന്റെ പുതിയ തട്ടകത്തിനു തുടക്കമിടുന്നു. 'ജോണി സാഗരിക മെഡിക്കല്സ്'.
നാലു ജില്ലകളിലായി മെഡിക്കല്സ്റ്റോര് ശൃംഖല തുടങ്ങുകയാണ് അദ്ദേഹം. തൊണ്ണൂറുകളില് ഓഡിയോ കാസറ്റ് രംഗത്തെ രാജാവായിരുന്നു സാഗരിക. പിന്നീട് സിനിമാ നിര്മാണരംഗത്തും വിജയകഥകള്. ''മാറിയ കാലത്തിനൊപ്പം സഞ്ചരിക്കണം. അവശ്യവസ്തുക്കളുടെ രംഗത്തേക്ക് കൂടുമാറുകയാണ്''ജോണി പറയുന്നു.
ചിങ്ങം ഒന്നിന് കടവന്ത്രയിലെ എസ്.എ. റോഡില് ജോണി സാഗരിഗ മെഡിക്കല്സിനു തുടക്കമാകും. ''ഇതൊരു ചെറിയ തുടക്കമാണ്. പുതിയ സംരംഭമാണെങ്കിലും പരിചയമുള്ള മേഖലയാണ്.'' സിനിമയും കലാമേഖലയുമൊക്കെ തളര്ച്ചയിലായതിനാല് സമയമനുസരിച്ചുള്ള മാറ്റത്തെ ഉള്ക്കൊള്ളുന്നുവെന്നും അദ്ദേഹം പറഞ്ഞു.
1984-ല് ചേര്ത്തലയിലാണ് ജോണി സാഗരിഗ മ്യൂസിക് സ്റ്റോര് ആരംഭിക്കുന്നത്. 'നൂറും പാലും' എന്ന ഭക്തിഗാന ആല്ബത്തിലൂടെ തുടങ്ങി. 1992-ല് എറണാകുളത്തും മ്യൂസിക് സ്റ്റോര്. അയ്യായിരത്തിലധികം പാട്ടുകളുമായി കമ്പനി വളര്ന്നു. തുടര്ന്ന് സിനിമാരംഗത്തേക്കും കടന്നു.
മലയാളത്തിലും തമിഴിലുമായി ജോണി സാഗരിഗ ഫിലിം പ്രൊഡക്ഷന്സ് ആന്ഡ് ഡിസ്ട്രിബ്യൂഷന് കമ്പനി 40 സിനിമകളിറക്കി.
നിറം, മധുരനൊമ്പരക്കാറ്റ്, താണ്ഡവം, ഹരിഹരന്പിള്ള ഹാപ്പിയാണ്, ഫോര് ദി പീപ്പിള്, കിളിച്ചുണ്ടന് മാമ്പഴം, വടക്കുംനാഥന്, ബോഡിഗാര്ഡ് തുടങ്ങിയവ പ്രിയ ചിത്രങ്ങള്.
