തൊടുപുഴ: ജാതിവിവേചനത്തിന്റെ ഇടുങ്ങിയ വളയംഭേദിക്കാനൊരുങ്ങി വട്ടവട. താടിയും മുടിയും വെട്ടിക്കിട്ടാന് ചക്ലിയ വിഭാഗക്കാര്ക്ക് ഇനി പത്തും നാല്പ്പതും കിലോമീറ്റര് താണ്ടേണ്ട. ഇവരുടെ തലയില് കത്തിവയ്ക്കാന് പൊതു ബാര്ബര്ഷോപ്പ് സ്ഥാപിക്കാനൊരുങ്ങി പഞ്ചായത്ത്.
വട്ടവടയില് ചക്ലിയ വിഭാഗത്തില്പ്പെട്ട 250 കുടുംബങ്ങളാണുള്ളത്. ഇവര്ക്കായി ബ്ലോക്ക് പഞ്ചായത്ത് കെട്ടിടത്തില് പൊതു ബാര്ബര്ഷോപ്പ് തുടങ്ങാനാണ് പഞ്ചായത്ത് ഭരണസമിതി തീരുമാനം. പക്ഷേ, ഇവിടെ ജോലിചെയ്യാന് ബാര്ബര്മാര് തയാറായിട്ടില്ല.
അതിനാല് വട്ടവടയ്ക്കു പുറത്തുനിന്ന് ആളെ എത്തിക്കാനാണു തീരുമാനം. ജാതിവിവേചനം അവസാനിപ്പിക്കാന് മറ്റു സമുദായങ്ങളിലുള്ളവരുമായി ചര്ച്ചനടത്താനും പഞ്ചായത്ത് അധികൃതര് തീരുമാനിച്ചിട്ടുണ്ട്. താഴ്ന്ന ജാതിയാണെന്നു പറഞ്ഞ് ബാര്ബര്ഷോപ്പുകാര് ഇവരെ ആട്ടിയകറ്റുകയായിരുന്നു.
ഇതോടെ മുടിവെട്ടാന് ഇവര് പോയിരുന്നത് 12 കിലോമീറ്റര് ദൂരെ ചിറ്റുവരയിലോ 42 കിലോമീറ്റര് താണ്ടി മൂന്നാറിലോ. അതിനു പറ്റാതിരുന്നവര് പരസ്പ്പരം മുടിവെട്ടി കൊടിയവിവേചനത്തോടു പടവെട്ടി. ഇതു വാര്ത്തയായതിനു പിന്നാലെ പട്ടികജാതി ക്ഷേമസമിതി സംസ്ഥാന സെക്രട്ടറി കെ. സോമപ്രസാദ് എം.പിയുടെ നേതൃത്വത്തിലുള്ള സംഘം വട്ടവട സന്ദര്ശിച്ചു തെളിവെടുത്തു.
ഇതിനിടെ, വിവേചനം കാട്ടിയ രണ്ടു ബാര്ബര് ഷോപ്പുകള് പഞ്ചായത്ത് പൂട്ടി. പണ്ട് വട്ടവട പഞ്ചായത്തിലെ ഹോട്ടലുകളില് ചക്ലിയ വിഭാഗക്കാര്ക്കു ചായ കൊടുത്തിരുന്നത് ചിരട്ടയിലാണ്. പിന്നീടത് പ്രത്യേകം തിരിച്ചറിയാന് കഴിയുന്ന തരത്തിലുള്ള ഗ്ലാസുകളിലേക്കു മാറി.
1990 കാലഘട്ടത്തില് ഭരണകൂടങ്ങള് ഇടപെട്ടാണ് ഇതിനു മാറ്റംവരുത്തിയത്. പഞ്ചായത്തിന്റെ ഇടപെടല് വിവേചനത്തിനു കുറച്ചെങ്കിലും മാറ്റംവരുത്തുമെന്ന പ്രതീക്ഷയിലാണിവര്.
