മലപ്പുറം: സ്വര്ണക്കടത്ത് കേസുമായി ബന്ധപ്പെട്ട് എന്ഫോഴ്സ്മെന്റ് ചോദ്യം ചെയ്തതിനെക്കുറിച്ച് കൂടുതല് പ്രതികരിക്കാതെ മന്ത്രി കെ.ടി ജലീല്. ഇക്കാര്യത്തില് തനിക്ക് പറയാനുള്ളതെല്ലാം ഫെയ്സ്ബുക്കില് പറഞ്ഞിട്ടുണ്ടെന്ന് പ്രതികരണം തേടിയ മാധ്യമങ്ങളോട് മന്ത്രി പറഞ്ഞു.
സുഭിക്ഷ കേരളം പദ്ധതി പ്രകാരം തയാറാക്കിയ തവനൂരിലെ പച്ചക്കറി തോട്ടം സന്ദര്ശിക്കവെയാണ് മാധ്യമങ്ങള് മന്ത്രിയുടെ പ്രതികരണം തേടിയത്. അതേസമയം തിരുവനന്തപുരത്തേയ്ക്കുള്ള മന്ത്രിയുടെ യാത്രയില് വഴിനീളെ പ്രതിഷേധം ഇരമ്പുകയാണ്.
പ്രതിഷേധം കണക്കിലെടുത്ത് കനത്ത പോലീസ് വലയത്തിലാണ് ഞായറാഴ്ച വൈകിട്ടോടെ വളാഞ്ചേരിയിലെ വീട്ടില് നിന്ന് മന്ത്രി തിരുവനന്തപുരത്തേക്ക് തിരിച്ചത്. വളാഞ്ചേരിയിലെ മന്ത്രിയുടെ വീടിനു സമീപം പ്രതിഷേധിച്ച യുവമോര്ച്ച, യൂത്ത് കോണ്ഗ്രസ് പ്രവര്ത്തകര് മന്ത്രിയുടെ കാറിന് നേരെ കരിങ്കൊടി കാട്ടിയിരുന്നു.
'കല്ലുവെച്ച നുണകുളും കെട്ടുകഥകളും യാതൊരു മനസാക്ഷിക്കുത്തുമില്ലാതെ ഓരോ ദിവസവും വിളമ്പുന്നവരോട് കാര്യങ്ങളുടെ നിജസ്ഥിതി വെളിപ്പെടുത്താന് മനസില്ലെന്നായിരുന്നു നേരത്തെ ഫെയ്സ്ബുക്കിലൂടെ മന്ത്രിയുടെ പ്രതികരണം. മറച്ചുവെക്കേണ്ടത് മറച്ചുവെച്ചും പറയേണ്ടത് പറയേണ്ടവരോട് പറഞ്ഞുമാണ് എല്ലാ ധര്മ്മയുദ്ധങ്ങളും വിജയിച്ചിട്ടുള്ളതെന്നും മന്ത്രി പറഞ്ഞിരുന്നു.
