ന്യൂഡല്ഹി: ബാബ്റി മസ്ജിദ് തകര്ത്ത കേസില് പ്രതികളെ വെറുതെ വിട്ട സി.ബി.ഐ കോടതി വിധിക്കെതിരെ അപ്പീല് നല്കുമെന്ന് മുസ്ലീം വ്യക്തി നിയമ ബോര്ഡ്. വര്ക്കിംഗ് കമ്മറ്റി യോഗത്തിലാണ് തീരുമാനം. സി.ബി.ഐ കോടതിയുടെ വിധി നിരാശാജനകമാണെന്ന് ബോര്ഡ് പ്രതികരിച്ചു.
വിധിയില് തൃപ്തിയില്ലെന്നും ഇതിനെതിരെ ഹൈക്കോടതിയെ സമീപിക്കുമെന്നും ബാബ്റി മസ്ജിദ് ആക്ഷന് കമ്മറ്റി കണ്വീനര് സഫര്യാബ് ജിലാനി നേരത്തെ വ്യക്തമാക്കിയിരുന്നു. ബി.ജെ.പി, വി.എച്ച്.പി നേതാക്കള്ക്കെതിരെ തെളിവുകള് ലഭിച്ചിട്ടും ശക്തമായി കേസ് നടത്തുന്നതില് സി.ബി.ഐ പരാജയപ്പെട്ടുവെന്നും അദ്ദേഹം കൂട്ടിച്ചേര്ത്തു.
ബാബ്റി മസ്ജിദ് തകര്ത്ത കേസില് എല്.കെ അദ്വാനി അടക്കമുള്ള എല്ലാ പ്രതികളെയും ലഖ്നൗവിലെ പ്രത്യേക സി.ബി.ഐ കോടതി വെറുതെ വിട്ടിരുന്നു. 28 വര്ഷം പഴയ കേസില് സെപ്റ്റംബര് 30നാണ് വിധി പറഞ്ഞത്. കേസിലെ പ്രതികളില് ജീവിച്ചിരിക്കുന്ന 32 പേരെയും സി.ബി.ഐ കോടതി വെറുതെവിട്ടു.
ബാബ്റി മസ്ജിദ് തകര്ത്തതില് ഒരു ഗൂഢാലോചനയും നടന്നിട്ടില്ലെന്നും പെട്ടെന്നുള്ള പ്രകോപനം കാരണമാണ് ബാബ്റി മസ്ജിദ് തകര്ത്തതെന്നുമാണ് കോടതിയുടെ കണ്ടെത്തല്. എല്.കെ അദ്വാനി, മുരളീ മനോഹര് ജോഷി തുടങ്ങിയ മുതിര്ന്ന നേതാക്കള് അക്രമികളെ തടയാനാണ് ശ്രമിച്ചതെന്ന വിചിത്രമായ കണ്ടെത്തലും കോടതി നടത്തി.
